A Ezayi 6 - WẼNNAAM SEBRE 2014

A Ezayi boolgo

¹ Rĩm a Oozɩyaas kũumã yʋʋmde, mam yãnda Sẽn-Ka-Saab vẽnegr pʋga, tɩ b zao naam geer sẽn zẽk wʋsg zugu. La bãmb fuugã tẽngr yɛdg n pida Wẽnd doogã.

² Serafẽ-rãmb n dag n yas bãmb zugẽ wã. Bãmb ned kam fãa rag n tara pɩgs a yoobe. Bãmb tara a yiib n lut b nenga, la b tara a yiib n lut b naoã, la b tar a yiibã n yɩgda.

³ Bãmb dag n zẽkda b koees n yet taab yaa: «Pʋ-Peelem-Soaba, Pʋ-Peelem-Soaba, Saasẽ-Pãng-Soabã yaa Pʋ-Peelem-Soaba. Dũniyã fãa pida ne bãmb ziirã.»

⁴ Bãmb koeesã rãamd rag n kɩtame tɩ Wẽnd doogã kʋɩlems tẽngr rĩmda, la roogã rag n pida ne bug-zõose.

⁵ Dẽ, mam yeelame yaa: «Mam paama toog bala! Mam ki yã! Bala, mam yaa nobɩn-dẽgd soaba, la mam bee neb sẽn yaa nobɩn-dẽgd rãmb sʋka. La mam nin yãnda rĩmã sẽn yaa Saasẽ-Pãng-Soabã!»

⁶ Serafẽ a yembr yɩkame n wat mam sẽnẽ, la a rag n yãka bug-saall ne yɩʋʋg tẽn-kugrã zug n zãad a nugẽ.

⁷ Yẽnda sɩɩsa mam noorã ne bug-saallã n yeele: «Yõwã sẽn sɩɩs fo nobɩmsã, b yiisa fo kongrã, la b kõo foom f yel-wẽndã sugri.»

⁸ Dẽ, mam wʋma Zu-soabã sẽn yet yaa: «Ãnda la mam na n tʋme? Ãnda n na n kẽng tõnd yʋʋr yĩnga? La mam leokame: ‹Ad maam, tʋm-y maam!› »

⁹ La bãmb yeelame yaa: «Kẽng n tɩ yeel nin-bãmbã yaa: ‹Yãmb kelgdame, la y ka wʋmd ye! Yãmb getame, la y ka ne ye!›

¹⁰ Riglim nin-bãmbã sũyã, n kɩt tɩ b yɩ tʋb-pa-wʋmdba, n kɩt tɩ b ninã mume, tɩ b ninã ra leb n yãnd ye, tɩ b tʋbã ra tõog n wʋm me ye, tɩ b ra wa tõog n wʋm a võor ye. Maan a woto tɩ b ra wa tek yam n paam maagr ye.»

¹¹ La mam sokame yaa: «Zu-soaba, na n yɩɩ a woto hal tɩ ta dabʋre?» Bãmb leoka maam yaa: Hal tɩ ta wakat ning b sẽn na n sãam tẽmsã tɩ neb ka leb n be b pʋsẽ, la b sẽn na n sãam dotã tɩ neb ka leb n be b pʋsẽ, la b sẽn na n sãam tẽn-gãongã t'a lebg zĩ-vɩʋʋgã,

¹² hal tɩ ta wakat ning Sẽn-Ka-Saab sẽn na n kɩt tɩ nebã zãag zĩiga, n bas tẽngã zãngã.

¹³ Baa tẽngã neb piig sʋk ned a yembr sã n kelle, bugum n na n dɩ-a, la wa b sẽn kɛɛd terebẽnt tɩɩg ne sɛn tɩɩg t'a viukã ketẽ wã, a viukã na n toba yagens sẽn welg toore.