A Ezayi 57 - WẼNNAAM SEBRE 2014

¹ Nin-tɩrg kiidame tɩ ned ba a yembr toog ka ye. B mumda nin-sõamyã tɩ ned ba ye ka mi tɩ b sẽn mum nin-tɩrgã yaa sẽn na n yɩl t'a põs toog ye.

² Sẽn kẽnd-a zemsg sor zug na n kẽe vɩ-bãan pʋga. Yẽnda na n gãanda a gãagẽ n vʋʋse.

³ Yãmb a pʋg-bag-bʋgd kambã, pʋg-koos-m-meng kambã, yãmb dãmb sẽn maand yoobo, kolg-y ka!

⁴ Ãnda soab la yãmb sẽn yaandã? Ãnda la yãmb yaagd y noy hãa n wõogd y zelemd n paoogdẽ wã? Yãmb ka kom-wegems bal la, yãmb ka zĩrẽ-be-neb buud sɩda?

⁵ Yãmb bee tɩ-bɛd tẽngr n wɩngd ne wẽngã ratem, la y be tɩɩs nins fãa sẽn tar maasmã tẽngre, n koot kom-bãoonegã ko-soayã pʋs ne tãmsã sẽgsẽ.

⁶ Yãmb pʋɩɩrã bee ko-soogã kug-saalã sʋka, yãmb pʋɩɩr la rẽndã. Yãmb daagda maand koom bãmb yĩnga, la y kõt bãmb maand sẽn yõogd bugum kũuni. Sẽn-Ka-Saab sokdame yaa: «Bõn-kãensã fãa tõe n belsa mam sũur sɩda?»

⁷ Yãmb dɩgla y gãas tãms sẽn zẽk n yaa lug-lug zutu. Yãmb dʋʋda beenẽ n maand maando.

⁸ Yãmb dɩkda y wẽn-naandgã n ning y kʋɩlengã pẽkẽ, lugrã poore. Bala, yãmb zãaga y meng ne maam, n yees y fut n dʋ y gãag zug n maneg zĩiga, n maand pʋleng ne raopa, la y nong n gãe ne bãmbã, yãmb geta bãmba.

⁹ Yãmb baoo kaam n zoe n kẽng a Melɛk nengẽ, yãmb paasa y parfẽ wã waooglem, la y tʋm y tʋmtʋmdbã tɩ b kẽng zĩ-zãrgẽ, yãmb kɩtame tɩ b sud n tãag hal kɩɩm-kulgu.

¹⁰ Yãmb sẽn kẽn wʋsgã yĩnga, yãmb yɛɛme la y ka yeel tɩ y na n basame tɩ lʋɩ ye! Yãmb ket n tara pãnga, la fo ka tol n yɛ me ye.

¹¹ Ãnda soab la yãmb dag n zoeta, ãnda soab n yɛɛs yãmb tɩ y yag zĩrẽ, n ka leb n tẽr mam yelle, la y ka tagsd mam yelle? Rẽ yĩnga, ka mam sẽn sĩnd m noor hal daar zãrã sɩda? Sẽn paas me, yãmb ka zoet maam ye.

¹² Mam na n moona yãmb tɩrlmã ne y tʋʋmã, la b ka na n tall yõod ne yãmb ye.

¹³ Yãmb kɛleng wakate, bɩ yãmb wẽn-naandsã y sẽn tigsã fãag-yã! Sebg n na n loog ne bõn-kãensã fãa, b na n fʋʋsa bãmb tɩ b looge. La ned ning sẽn dɩka maam n maan a zĩ-soalgdga, a na n sooga tẽngã tɩ yɩ a pʋɩɩre, la a na n deega mam tãng ning sẽn welg toorã n sooge.

Sẽn-Ka-Saab na n maaga b nebã

¹⁴ Sẽn-Ka-Saab na n yeelame yaa: «Tuk-y sore, tuk-y sore, maneg-y sorã, la y yiis bũmb ning fãa sẽn yaa gɩdgr mam nebã sor zugã!

¹⁵ Bala, soab ning sẽn yɩɩd fãa wã, la sẽn paad wakat sẽn kõn sa wã, tɩ b yʋʋrã welg toorã yetame: «Mam bee hal yĩngr zĩig sẽn welg toor pʋgẽ, la m bee ne ned ning sũur sẽn sãame, soab ning sẽn be paoogr pʋgã, mam bee ne soab ning sɩɩgã sẽn yɛ, n na n bels sũ-pa-noaang soabã.

¹⁶ Mam ka na n zab ne bãmb wakat fãa ye, la m ka na n yik m sũur wakat fãa ye. Bala, yaa mam taoor la ninsaal sɩɩgã baasda, yaa vʋʋsem ning mam sẽn naanã.

¹⁷ Bãmb zoe-bõnã yĩnga, mam sũurã puugame tɩ m sɩbg-ba, la m solga m meng m sũ-puugrã pʋga. La bãmb sẽn yaa kɩɩsdbã yĩnga, b maana wa b sẽn date.

¹⁸ Mam yãnda bãmb manesmã, la m na n maag-b lame. Mam na n tɛɛ bãmba, la m bels bãmb wʋsgo, bãmb ne neb nins sẽn yãbd bãmbã.

¹⁹ Mam na n kɩtame tɩ yɩɩl yi bãmb noyẽ wã.» Sẽn-Ka-Saab mengã yetame: «Sẽn be-b zĩ-zãrsã ne neb nins sẽn pẽ wã na n paama vɩ-bãane. Mam na n maag-b lame!»

²⁰ La nin-wẽnsã wẽnda wa ko-kãsengã sẽn lengd n ka tõe n yals sɩɩ wã, tɩ yẽnda koomã kãagd rẽgdã n gudgd begdã.

²¹ Mam Wẽnnaamã yeelame: «Vɩ-bãan ka be nin-wẽns yĩng ye.»