A Ezayi 56 - WẼNNAAM SEBRE 2014

Wẽnnaam kaoolã sakr keoore

¹ Ade, Sẽn-Ka-Saab yetame: «Sak-y tɩ zemsg zĩndi, la y maan wa sẽn zems tɩrlmã. Bala, mam fãagrã waoong kolgame, la mam tɩrlmã rat n pukame.

² Bark bee ned ning sẽn maand mam sẽn yeelã zugu, ninsaal ning fãa sẽn yaa sakda, la a sakd vʋʋsg daarã n ka sãamd-a, n gũusd a meng n ka maand tʋʋm-wẽnse.»

³ Bɩ sãan sẽn sakd Sẽn-Ka-Saab ra yeele: «Sẽn-Ka-Saab na n welga maam ne b nebã» ye! Bɩ zu-soab ra yeele: «Mam yaa tɩ-koɛɛnga.»

⁴ Bala, Sẽn-Ka-Saab yetame: Zu-soben-dãmb nins sẽn sakd mam vʋʋsg rayã, n yãk yam n maand sẽn noom maamã, la b yalsd kãenkãe mam kaoolã pʋgẽ wã,

⁵ mam na n kõo bãmb kug-vigindg ne yʋʋr sẽn yaa sõama n yɩɩd kom-dibli la kom-pugli mam doogẽ wã, la mam zakẽ wã. Mam na n kõo bãmb yʋʋr wakat sẽn ka sɛt yĩnga, la a kõn tol n menem ye.

⁶ Sãamb nins sẽn loe b mens ne Sẽn-Ka-Saabo, n maand bãmb tʋʋmdã la b nong Sẽn-Ka-Saab yʋʋrã, hal n lebg bãmb tʋmtʋmdbã, ne neb nins fãa sẽn sakd vʋʋsg rayã n ka rat n sãam-bã, la b yalsd kãenkãe mam kaoolã pʋgã,

⁷ mam na n talla bãmb n dʋ mam tãng ning sẽn welg toorã zugu, la m kɩt tɩ b paam sũ-noog mam pʋʋsg roogã pʋga. Mam na n deega bãmb maoong sẽn yõogd bugmã ne b maand a taabã mam tẽn-kugrã zugu. Bala, b na n boola mam doogã tɩ ‹pʋʋsg roog buudã fãa yĩnga.›

⁸ Ade, Zu-soab a Wẽnnaam ning sẽn tigim Israyɛll nebã sẽn dag n sãeegã yetame: «Mam na n tigma neb a taab n naag yẽnda nebã m sẽn dag n zoe n tigmã.»

Nanamb-wẽnse

⁹ We-rũmsã fãa ne rũms nins sẽn be tʋgẽ wã, wa-y n dɩ-y-yã!

¹⁰ Israyɛll tẽn-gũudbã fãa yaa zoense, la b ka mi baa fɩ. Bãmb yaa wa baas sẽn yaa mugsi, n ka tõe n wes ye. Bãmb zãmsdame, bãmb tʋʋmd yaa gãaga, bãmb nonga gõeem.

¹¹ Bãmb yaa wa baas sẽn yaa yão-be-rãmba, bãmb ka tol n tɩgd ye. Bãmb yaa pe-kɩɩmb sẽn ka tol n mi baa fɩ ye. B fãa yaa neb sẽn maand b sẽn date, ned kam fãa baooda a meng sõngr bala.

¹² Bãmb yeelame: «Wa-y tɩ m na n waa ne reezẽ rãam, tõnd na n yũu rã-toose! Beoog me, d na n leb n maana a woto. Rãamã sẽn ketã yaa wʋsgo!»