A Ezayi 55 - WẼNNAAM SEBRE 2014

Wẽnnaam nimbãan-zoeer b nebã yĩnga

¹ Hey! Yãmb dãmb fãa ko-yũud sẽn tarã, wa-y koom zĩigẽ! Baa sẽn ka tar-a ligd bɩ a wa! Wa-y n da-y rɩɩb n dɩ, wa-y n da-y reezẽ rãam ne bĩisim! Yaa zaalem, ka yaood ligd ye!

² Bõe yĩng tɩ yãmb dɩkd y ligd n daad bũmb ning sẽn ka rɩɩbo? Bõe yĩng tɩ yãmb namsd y mens bũmb sẽn ka pit pʋg yĩnga? Dẽ wã, kelg-y maam tɩ y na n dɩɩ rɩ-sõngo, la yãmb na n paama rɩ-nood n dɩ n tɩge.

³ Yok-y y tʋbr n kelg la y wa mam nengẽ. Kelg-y-yã, la y na vɩɩmde. Mam na n maana kaool sẽn ka sɛt ne yãmba, yaa nonglem ning mam sẽn tar a Davɩɩd yĩng wakat fãa wã yĩnga.

⁴ Mam kɩtame tɩ yẽnda yɩ kaset soab buud a taabã yĩnga, la a yɩ naab n soog buud a taabã.

⁵ Fo na n boola bu-zẽms fo sẽn ka mi, la bu-zẽms sẽn ka mi foom na n zoee n waa fo nengẽ. Yaa Sẽn-Ka-Saab sẽn yaa fo Wẽnnaam, n yaa Israyɛll Pʋ-Peelem-Soab n kɩt tɩ fo tar waoogrã maasem yĩnga.

⁶ Bao-y Sẽn-Ka-Saab wakat ning yãmb sẽn ket n tõe n yãnd-ba. Bool-y bãmb wakat ning bãmb sẽn ket n pẽ ne yãmba.

⁷ Bɩ nin-wẽng bas sor ning a sẽn tũudã, la bɩ tʋʋm-wẽns maandã bas a tags wẽnsã, n lebg n wa Sẽn-Ka-Saab nengẽ, tɩ tõnd Wẽnnaamã sẽn kõt sugr wʋsgã, tõe n zoe yẽnda nimbãanega.

⁸ Bala, mam tagsdã ka yembr ne yãmb tagsdã ye, la yãmb soayã ka yembr ne mam soayã ye. Yaa Sẽn-Ka-Saab n yeele.

⁹ Yĩngr ne tẽng sẽn zãr ne taab to-to wã, mam soayã me zãra ne yãmb soayã a woto, la mam tagsdã zãra ne yãmb tagsdã.

¹⁰ Ade, wa saag sẽn niidã, la wa neez sẽn yit yĩngr n sigd n ka lebgd n leb t'a ka madg tẽn-gãongã n kɩt t'a bʋkã, tɩ bõn-biisã bul n yi n kõ ka-koaad bõn-koaadla, n kɩt tɩ kom sẽn tar a soabã paam dɩɩbã,

¹¹ woto me, gomd ning sẽn yit mam noorẽ wã, ka na n lebg n wa mam nengẽ n ka maan a tʋʋmde, n ka pids mam tʋlsmã, la a ka maan bũmb ning yĩng mam sẽn tʋm-a t'a maanã ye.

¹² N-yẽe! Yãmb na n yii ne sũ-noogo, la b na n tɛɛ yãmb vɩ-bãan pʋga. Tãmsã ne kunkubã na n kaasa ne sũ-noog yãmb taoore, la weoogã tɩɩs fãa na n pãba nug-pogse.

¹³ Gõosã zĩig na n lebga sɩprɛs tɩɩs zĩiga, la mirt tɩɩs na n deega mood zĩiga. A na n yɩɩ Sẽn-Ka-Saab yʋʋrã zẽkr yĩnga, la a na n yɩɩ bãnd sẽn paad wakat sẽn ka sɛta, la a kõn tol n menem ye.