A Ezayi 53 - WẼNNAAM SEBRE 2014

Sẽn-Ka-Saab tʋmtʋmdã toogo

¹ Ãnda soab n tẽ bũmb ning b sẽn dag n togs tõndã? Sẽn-Ka-Saab wilga ãnda soab b pãngã?

² Bãmb bɩɩ Sẽn-Ka-Saab taoor wa tɩ-bi-polle, bãmb yii wa yẽgend sẽn tob n yi tẽn-koɛɛng zugu. Bãmb dag n ka tar ra-sãnd wall neerem, tɩ tõnd dat n ges-b ye, la bãmbã yasrã rag n ka tar bũmb tõnd sẽn dat ye.

³ Nebã paoog-b lame, b bas-b lame, bãmb dag n yaa ned sẽn paam toogo, la bãmb minima namsgo, bãmb lebga wa soab ning nebã sẽn wẽnemd b nens n base, b paooga bãmba, la tõnd dag n ka nand-b ye.

⁴ Sɩdã, yaa tõnd namsgã la bãmb deeg yã, la bãmb deega tõnd toodã. La tõnd gesa bãmb wa Wẽnnaam sɩbgr sẽn lʋɩ ned zug t'a namsdẽ.

⁵ B kõsa bãmb lʋgrã tõnd tʋʋm-beedã yĩnga, b pogla bãmb tõnd kongrã yĩnga. Sɩbgr ning sẽn wa ne tõnd vɩ-bãanã lʋɩɩ bãmb zugu, la yaa bãmb sẽn paam poglgã yĩng la tõnd paam maagre.

⁶ Tõnd fãa rag n yeebda wa piisi, ned kam fãa rag n maanda a sẽn date. La Sẽn-Ka-Saab kɩtame tɩ tõnd fãa kongrã lʋɩ bãmb zugu.

⁷ B namsa bãmb n leng-ba, la bãmb ka tol n yaag b noor ye. Bãmb sĩnda b noor wa peosg b sẽn tar n dabd kʋʋb zĩigẽ, wa pe-bil sẽn sĩnd a noor a wõrsdbã taoorã, bãmb ka tol n yaag b noor ye.

⁸ B yõka bãmb ne pãnga, n kao b bʋʋdo. Bãmb zamaanẽ wã ned a bõe n maan sũ-sãang bãmb yĩnga? B yiisa bãmb dũni nin-vɩɩs sʋka, la yaa mam nebã tʋʋm-beedã yĩng la bãmb paam sɩbgre.

⁹ Baa ne bãmb sẽn ka tol n maan wẽngã, la baa bãmb noor sẽn ka tol n gom zãmb goamã, b tuu bãmb yaoog nin-wẽnsã yaad sʋka, la b naaga bãmb ne arzegs rãmb n mume.

¹⁰ Sẽn-Ka-Saab n yãk yam n na n sãam b tʋmtʋmdã ne namsgo. Sã n yaa tɩ yãmb dɩka bãmb tɩ b yɩ sugr kũun maoongo, bãmb na n paama yagense, la b na n vɩɩmd n kaoosame, tɩ Sẽn-Ka-Saab tʋlsmã paam pidsg bãmb maasem yĩnga.

¹¹ Bãmb sẽn paam toogã yĩnga, b na n yãnda vẽenem, la b na n tɩga ne bãmb bãngre. Mam tʋmtʋmdã sẽn yaa tɩrlem soabã na n waa ne tɩrlem buud wʋsg yĩnga, la b na n deega bãmb kongrã.

¹² Yaa rẽ n kɩte, tɩ mam na n naag bãmb ne nin-kãsems n kõ kũuni. Bãmb na n naaga pãens rãmb n pʋɩ te-zɛɛdem. Bala, bãmb rɩka b meng n kõ kũum, la b sõda bãmb n naag tʋʋm-beed rãmbã. Dẽ, bãmb deega neb wʋsg yel-wẽna, la bãmb kẽe sʋk n paas zabrã koangdbã yĩnga.