A Ezayi 52 - WẼNNAAM SEBRE 2014

Sẽn-Ka-Saab lebg n leba Zeruzalɛm

¹ Sɩyõ, neke, bɩ f neke! Yeelg f pãngã! Zeruzalɛm tẽng sẽn welg toore, yeelg f fan-teedã! Bala, neb sẽn ka kẽ bãongo, la neb sẽn yaa rẽgd ka na n leb n wa fo pʋgẽ ye.

² Zeruzalɛm, yik n pĩms f wubsgã, la f zĩndi! Sɩyõ tẽn-neer sẽn be yembd pʋgã, lok f sẽbdsã sẽn sẽb f yublã!

³ Bala, Sẽn-Ka-Saab yetame: «B koosa yãmb zaalem yĩnga, la b ka na n yao ligd n fãag foom ye.»

⁴ Bala, Zu-soab a Sẽn-Ka-Saab yetame: «Hal pĩnda, mam nebã rag n kẽng n tɩ zĩnda sãand weoog Ezɩpt tẽnga. La Asiiri nebã namsa bãmb zaalem.»

⁵ Sẽn-Ka-Saab yetame: «La b sẽn yõg mam nebã zaalmã, bõe la mam be ka n maandẽ?» Neb nins sẽn namsd bãmbã kaasdame, Sẽn-Ka-Saab yetame: Mam yʋʋrã paamda paoogr wakat fãa.

⁶ Woto kɩtame tɩ mam nebã na n bãng mam yʋʋrã. Badaare, bãmb na n bãngame tɩ yaa maam n gomd n yetẽ: «Ad maam!»

⁷ Ade, ned ning sẽn dʋʋd tãmsã zut n togsd koe-noogã nao tara ra-sãnde, yẽnda togsda vɩ-bãan koɛɛgã, la a moond sũ-noog koɛɛga, n togsd fãagr koɛɛg n yet Sɩyõ yaa: «Fo Wẽnnaamã yaa rĩma!»

⁸ Fo tẽn-gũudbã koees rãamd zẽkdame. Bãmb naaga taab n zẽkd b koees n kaasd sũ-noog kaasgo. Bala, bãmb nee Sẽn-Ka-Saab neng ne neng tɩ b lebg n wat Sɩyõ.

⁹ Zeruzalɛm raboodo, naag-y taab n kaas sũ-noog kaasgo! Bala, Sẽn-Ka-Saab belsda b nebã, bãmb fãagda Zeruzalɛm.

¹⁰ Sẽn-Ka-Saab wilga b pʋ-peelem kangã tɩ buud a taabã fãa yãnde. La dũniyã kɩremsã fãa na n yãnda tõnd Wẽnnaamã fãagre.

¹¹ Yãmb dãmb fãa sẽn tʋkd Sẽn-Ka-Saab lagdã, yi-y beenẽ n looge! Loog-y-yã! Da sɩɩs-y bũmb sẽn yaa rẽgd ye! Yi-y bõn-kãens sʋka! Yɩlg-y y mense!

¹² Da yi-y ne yãgb ye, da loog-y ne zoees ye. Bala, Sẽn-Ka-Saab bee yãmb taoore, Israyɛll Wẽnnaamã na n pʋga yãmb poore.

¹³ Ade, mam tʋmtʋmdã na n tɩlgame. A na n yikame, a na n dʋʋme n kẽng yĩngri.

¹⁴ Neb wʋsg sẽn yãnd-a n yɛɛs to-to wã, yaa t'a sẽn yaa to-to wã, a nengã sẽn sãamã rag n ka leb n wẽnd ninsaala, la a yalẽ wã rag n ka leb n wẽnd ninsaalbã sẽn yaa a soabã ye.

¹⁵ Woto me, bãmb na n mesa neb wʋsg n yɩlg-ba, Rĩm-dãmb na n sĩnda b noor yẽnda taoore. Bala, bãmb na n yãnda b sẽn zɩ n wʋm tɩ b gomdã, la bãmb na n wʋma bũmb ning b sẽn zɩ n wʋmã võore.