A Ezayi 51 - WẼNNAAM SEBRE 2014

Fãagr wakatã fãa yĩnga

¹ Yãmb dãmb sẽn pʋgd tɩrlmã, yãmb dãmb sẽn baood Sẽn-Ka-Saabã, kelg-y maam! Wẽnemd-y n ges-y pĩig ning b sẽn yãk n pees yãmbã, la bok ning b sẽn tu n yiis yãmb a pʋgẽ wã.

² Wẽnemd-y n ges-y yãmb ba a Abrahaam, la y wẽnemd n ges y ma a Saara. Bala, mam boola yẽnda wakat ninga yẽnda sẽn dag n yaa a yembrã, la mam ning-a-la bark n kɩt t'a fɩɩge.

³ Woto, Sẽn-Ka-Saab zoee Sɩyõ nimbãanega, bãmb zoe a raboodã nimbãanega. Bãmb na n kɩtame t'a we-raoogã lebg wa Edɛn, la b kɩt t'a tẽn-nabd-koɛɛngẽ lebg wa Sẽn-Ka-Saab zẽed zĩiga. Kɩdeng ne sũ-noog na n leb n zĩnda a pʋgẽ, la bark pʋʋsg ne yɩɩl na n leb n zĩnda beenẽ.

⁴ Mam nebã, maag-y y meng n kelg maam! Mam buudu, yok-y y tʋbr n kelge! Bala, tõogã na n yii mam nengẽ. Mam na n kɩtame tɩ mam bʋ-kao-tɩrgã puki, n yɩ vẽenem buud a taabã yĩnga.

⁵ Mam tɩrlmã kolgame, mam fãagrã na n pukame, la mam na n kaoo buud a taabã bʋʋd ne pãnga. Tẽms nins koom sẽn gũbgã na n maana tẽeb ne maam. Bãmb geta mam pãngã.

⁶ Nak-y n ges-y yĩngri, la y sulg n ges dũniyã sẽn be tẽngã. Bala, yĩngr na n looga wa bug-zõose, dũniyã na n kii wa fuugu, a nebã na n kiida wa zõose. Mam fãagrã na n paa wakat fãa, la mam tɩrlmã kõn tol n sɛ ye.

⁷ Yãmb dãmb sẽn mi tɩrlmã, neb nins sẽn ka tar mam tõogã b sũurẽ, kelg-y maam! Ra zoe-y ninsaalbã paoogr ye, la y ra bas tɩ bãmb tʋya yɛɛs yãmb ye.

⁸ Bala, mogd n na n dɩ bãmb wa fuugu, zũnzũiy na n dɩɩ bãmb wa pe-kõbd gĩsga. La mam tɩrlmã na n paa wakat fãa, tɩ mam fãagrã pa zamaan woo zamaane.

Sẽn-Ka-Saab na n puka b pãngã

⁹ Sẽn-Ka-Saabo, nek-y-yã! Wilg-y y pãngã! Wilg-y y pãngã wa kʋdem-wẽndẽ wã, wa zamaan ning sẽn loogã pʋgẽ wã! Ka yãmb n dag n sãam a Rahaab la y kõs wag-bɛɛgã la?

¹⁰ Ka yãmb n dag n kɩt tɩ ko-kãsengã koom kʋɩ sɩda? Ka yãmb n kɩt tɩ zĩ-zulumsẽ koom kʋɩ la? Ka yãmb n pãrg sor zĩ-zulumsẽ wã, n tuk sor tɩ yãmb sẽn fãag-b rãmbã loog sɩda?

¹¹ Woto, Sẽn-Ka-Saab sẽn fãag neb ninsã na n lebg n waame, bãmb na n waa Sɩyõ ne sũ-noogo, b na n paama sũ-noog sẽn ka sɛta. Kɩdeng ne sũ-noog na n sega bãmba, la sũ-sãang ne sidgr na n zoeeme.

¹² Yaa maam bala, maam m yembr bal n belsd foom. Bõe yĩng tɩ fo yɛɛsd ninsaal sẽn yaa kiidã, ninsaal baoosg sẽn yaa wa moodã?

¹³ Fo yĩmda Sẽn-Ka-Saab yelle, yaool n yaa bãmb n naan foom! Bãmb n yɛdg sa-gãongã la b naan dũniyã! Wakat fãa fo zoeta rabeem sẽn namsd-a foomã sũ-puugrã yĩnga, wa a na n pukame n sãam foom, la namsdã sũ-puugrã bee yɛ?

¹⁴ Sã n yɩ bilfu, sẽn dag n be-a bi-bees roog n namsdẽ wã na n paama lohorem. Yẽnda ka na n ki bokã pʋga, la rɩɩb ka na n paoog yẽnda ye.

¹⁵ Maam a Sẽn-Ka-Saab n yaa fo Wẽnnaam, maam n dãmbd ko-kãsengã n kɩt t'a ko-wĩisã guglumdẽ. Bãmb yʋʋr boondame tɩ Saasẽ-Pãng-Soaba.

¹⁶ Mam ninga mam goamã fo noorẽ, la m luda foom ne mam nugã maasem, n yɛdg sa-gãong la m kɩt tɩ tẽn-gãong beẽ, la m yeel Sɩyõ yaa: «Yãmb yaa mam nebã!»

Sẽn-Ka-Saab na n yika Zeruzalɛm

¹⁷ Zeruzalɛm, neke, bɩ f nek n yiki! Fo yũu Sẽn-Ka-Saab sũ-puugr dãamã sẽn be b nugẽ wã, fo yũ-a lame n tãag wamdã sɛɛga, tɩ f neng yilimdẽ!

¹⁸ Kamb nins fãa yẽnda sẽn dogã sʋka, ba a yembr ka be n na n tɛ yẽnda ye. Yẽnda sẽn wub kamb ninsã fãa sʋka, ba a yembr ka be n na n gãd yẽnda nug n peeg-a ye.

¹⁹ Yel-bãmbã b yiibã sẽn paam foomã, ãnda soab n na n yãb foom? Wãabo, la sãoong paama foom, kom la tẽn-kũum paama foom. Ãnda soab n na n bels foom?

²⁰ Fo kambã konga pãnga, n gãe soayã zut zĩigã fãa, wa walg sẽn lʋɩ tãoogẽ. Sẽn-Ka-Saab sũ-puugrã wʋm-b lame, Wẽnnaam tãs-b lame.

²¹ Zeruzalɛm sẽn yaa nimbãan-neda, m kotame tɩ f kelge, fo neng yilimdame, la ka reezẽ rãam n yilimd fo nengã ye.

²² Ade, fo Zu-soab a Sẽn-Ka-Saabo, fo Wẽnnaamã sẽn sõngd b nebã yetame: «Mam na n deega mam sũ-puugr bõn-yũudlã sẽn yilimd nengã fo nugẽ, la fo kõn leb n yũ-a n baas ye!

²³ Mam na n dɩk-a lame n kõ neb nins sẽn dag n namsd foomã. Bãmb dag n yeta foom yaa: ‹Zõond tɩ tõnd tab n looge!› Fo rag n wẽnemda f poor n kõ bãmb tɩ b tab wa tẽn-gãong n looge. So-loaadb taba fo poorã wa sore.»