A Ezayi 5 - WẼNNAAM SEBRE 2014

Reezẽ tɩɩs pʋʋg yɩɩlle

¹ Mam kotame tɩ y bas tɩ m yɩɩl m zoa wã yĩnga. Mam na n yɩɩla yɩɩll m noangã reezẽ tɩɩs pʋʋg yĩnga. Mam zoa wã rag n tara a reezẽ tɩɩs pʋʋg sẽn be tãngã sigdgã zĩ-sõngẽ.

² Mam zoa wã gudga tẽngã n vigs kugã n lebs n sel reezẽ tɩɩs bu-sõngo, la a me gãosg pʋʋgã sʋka, n tu reezẽ rãam wẽkr boko. Yẽnda rag n tagsdame t'a pʋʋgã na n woma reezẽ tɩɩs bi-sõama, la a woma bi-põaasa!

³ Moasã, Zeruzalɛm ne Zʋʋda nebã, m kotame tɩ y yɩ bʋ-kaoodb maam ne m reezẽ tɩɩs pʋʋgã sʋka!

⁴ Bõe la mam dag n tog n maan m reezẽ tɩɩs pʋʋgã yĩng n ka maane? Bõe yĩng tɩ mam tags t'a na n woma reezẽ-sõama t'a wa womd bi-põaasa?

⁵ Moasã, m kotame tɩ y bas tɩ m wilg-y mam sẽn na n maan m reezẽ tɩɩs pʋʋgã bũmb ninga. Mam na n yãka a yãgrã n bas-a tɩ b sãam-a. Mam na n wura a lalgã tɩ b kẽ n tab-a ne nao.

⁶ Mam na n kɩtame t'a lebg raboogo. B ka na n leb n yos-a wall b ko-a ye. Gõos ne gõpayãnds n na n yi a pʋga. Mam na n kõo sawatã noore, n kɩt tɩ b ra leb n bas saag t'a ni beenẽ ye.

⁷ Ade, Saasẽ-Pãng-Soabã reezẽ tɩɩs pʋʋgã yaa Israyɛll nebã. La tɩɩs nins bãmb sẽn dag n nongã yaa Zʋʋda nebã. Sẽn-Ka-Saab rag n tagsdame tɩ b na n yãnda zemsg beenẽ, la b mika zɩɩm daagr bala! Bãmb dag n tagsdame tɩ b na n yãnda tɩrlem beenẽ, la b mikame tɩ yaa b sẽn kʋʋd-b rãmbã kelems n be beenẽ.

Neb sẽn puugd Sẽn-Ka-Saab sũuri

⁸ Tood bee neb nins sẽn baood rot n paasd b rotã, la sẽn baood pʋt n paasd b rẽndã, hal tɩ zĩig ka leb n beẽ wã zugu. Zĩig ka leb n be tẽngã pʋgẽ neb a taab yĩng tɩ ka yãmb bal ye!

⁹ Ad wẽeneg ning Saasẽ-Pãng-Soabã sẽn wẽen tɩ mam wʋme: «Hakɩɩka, ro-bãmbã sẽn yaa wʋsgã na n sãamame, ned kõn leb n zĩnd ro-bɛd-bãmbã sẽn yaa neebã pʋs ye.

¹⁰ Baa reezẽ tɩɩs pʋʋg yalem sã n ta nao-yakem tus piiga, a ka na n wom tɩ yɩɩg konkong la pʋɩ-sʋk ye. La bõn-buud konkong piig na n woma bõn-koaadl konkong a ye la pʋɩ-sʋka.»

¹¹ Toog bee neb nins sẽn yikd yibeoog pĩnd n baood rãam sẽn yilimd nengã zugu, la sẽn yũud reezẽ rãam n lengd ne zaabrã zugu!

¹² Bãmb tigã zĩisẽ, yaa pends wẽebo, ruuds wãagre, gãngãad pãbre, wɩɩs peebgo, la rãam yũubu. La bãmb yaool n ka ne Sẽn-Ka-Saab sẽn maand bũmb ningã ye. Bãmb ka ne Sẽn-Ka-Saab nus tʋʋmã ye.

¹³ Yaa rẽ n kɩte, tɩ b na n yiis mam nebã n tɩ kẽes yembdo, b sẽn ka tar bãngrã yĩnga. Kom na n kʋʋ bãmb nanambsã, la ko-yũud na n kʋʋ mam nebã sẽn yaa kʋʋngã.

¹⁴ Rẽ n kɩte, tɩ kɩɩm-kulg pak a kokoayã wʋsgo, n yaag a noorã yaolengo, tɩ tẽngã nanambsã ne b neb kʋʋngã na n sig beenẽ ne b bʋrgã la ne b sũ-noog kaasgã.

¹⁵ Ninsaal na n paama yãnde. Ninsaal na n paama paoogre, la tɩtaam dãmbã na n paama paoogre.

¹⁶ Saasẽ-Pãng-Soabã na n paama waoogr b bʋʋdã kaoob sẽn yaa tɩrgã pʋgẽ. Wẽnnaam sẽn yaa pʋ-peelem soabã na n wilga b pʋ-peelmã b bʋʋdã kaoob pʋga.

¹⁷ Piisã na n zĩnda beenẽ tɩ yɩ b wãbneg zĩiga, la sãamb n na n wa soog arzegs rãmbã sẽn zoe n basã.

¹⁸ Toog bee neb nins sẽn tɛt yel-wẽnã ne zãmb wĩyã, la sẽn tɛt yel-wẽnã wa b sẽn takd terok ne wĩirã zugu.

¹⁹ Bãmb yetame: «Bɩ Israyɛll Pʋ-Peelem-Soabã maan b tʋʋmdã tao-tao tɩ tõnd yãnde! Bɩ saagr ning bãmb sẽn saagdã paam pidsg tɩ tõnd bãnge!»

²⁰ Toog bee neb nins sẽn boond wẽng tɩ sõama la b boond sõama tɩ wẽngã zutu. Bãmb geelgda lik wa vẽenem, la b geelgd vẽenem wa lika. Bãmb geelgda toog wa noogo, la b geelgd noog wa toogo!

²¹ Toog bee neb nins sẽn tagsd tɩ b yaa yam dãmba, la sẽn tẽed tɩ b yaa bãngdbã zutu.

²² Toog bee neb nins sẽn yaa gãndaad ne reezẽ rãam yũubã, la neb nins sẽn mi rãam kaolengã zutu.

²³ Bãmb deegda kũun n kõt nin-wẽng bʋʋm, la b mongd bʋʋm soab bʋʋm!

²⁴ Woto yĩnga, bug-witim sẽn dɩt mood to-to wã, la bugum sẽn dɩt wudg to-to wã, bãmb yẽgã na n yɩɩ wa bõn-põosgo, la bãmb puudã na n sʋʋga wa wubsgu. Bala, bãmb kɩɩsa Saasẽ-Pãng-Soabã tõogo, la bãmb paooga Israyɛll Pʋ-Peelem-Soabã gomdã.

²⁵ Woto n kɩte, tɩ Sẽn-Ka-Saab sũur yik ne b nebã. Bãmb zẽka b nug n wẽ-ba. Tãmsã rigimdame, kũumã rʋra tẽngã soay zut wa sagdo. La baoosgo, ne yõwã fãa, Wẽnnaam sũurã kell n ka sig ye. Bãmb nugã ket n zẽkame.

Sãamd sẽn wat tɩ gɩdgr kaẽ ye

²⁶ Sẽn-Ka-Saab zẽka tãb-kaoor neb nins sẽn be tẽn-zãrsẽ wã yĩnga. Bãmb fɩɩl n boola bãmb tɩ b yi dũniyã kɩremsã n wa. La gese, bãmb yãgdame n wat tao-tao.

²⁷ Ned ka be bãmb sʋkã n yɛ, wall n keoosdẽ ye. Ned ka be bãmb sʋkã n suusdẽ, wall a gõe ye. Ned ka be bãmb sʋkã t'a sɛɛg sẽbdg loke, wall t'a neooda sẽbds kao me ye.

²⁸ Bãmb pɛɛmã yaa sɩlemse, la b tãbdã rʋʋsame. Bãmb wiidã nao-bendã wẽnda kuga, la b saar-dãmbã nao wẽnda seb-kãsenga.

²⁹ Bãmb kɛlengã yaa wa gɩgem-yãang kɛlenga. Bãmb kelemda wa gɩgem-poala, bãmb wũusdame, bãmb yõkda rũng n tall n loog n kẽng zĩig ning ned sẽn ka tõe n ta, tɩ ned ka tõe n yõk n deeg ye.

³⁰ Badaare, b na n guglma bãmb zut wa ko-kãsengã sẽn guglumdã. B na n gesa tẽngã, la yaa lik ne toog bala. La sawad-taok n na n wa kɩt t'a vẽenemã lebg lika.