A Ezayi 49 - WẼNNAAM SEBRE 2014

Sẽn-Ka-Saab tʋmtʋmda

¹ Tẽms nins koom sẽn gũbgã, kelg-y maam! Neb nins sẽn be zĩ-zãrsã, kelg-y-yã! Sẽn-Ka-Saab boola maam tɩ m ket m ma pʋgẽ. Bãmb pʋda mam yʋʋr tɩ m ma nan ka rog maam ye.

² Bãmb kɩtame tɩ mam noorã yɩ wa sʋ-rɩtga, bãmb lilla maam ne b nugã maasem. Bãmb kɩtame tɩ mam yɩ wa pĩim sẽn yaa sɩlenga, bãmb solga maam bãmb lokã pʋga.

³ La bãmb yeela maam yaa: «Israyɛlle, fo yaa mam tʋmtʋmda, mam na n tũnuga foom n wilg m ziirã.»

⁴ La mam yeelame: «Mam namsa m meng zaalem, mam sɛɛsa m pãngã zaalem yĩnga.» Hakɩɩka, mam bʋʋm bee Sẽn-Ka-Saab nengẽ, mam keoor bee Wẽnnaam nengẽ.

⁵ Moasã Sẽn-Ka-Saab gomdame, bãmb n naan maam m ma pʋgẽ, tɩ mam tõe n yɩ bãmb tʋmtʋmda, n tall a Zakoob yagensã n lebg n wa, tɩ Israyɛll nebã tõe n tigim bãmb nengẽ. Mam paama waoogr Sẽn-Ka-Saab nifẽ, bala, mam Wẽnnaam n yɩ mam pãnga.

⁶ Bãmb yeela maam: «Mam sẽn yãk foom tɩ f yɩ mam tʋmtʋmdã nan ka baa fɩ ye, mam yãka foom tɩ f leb n yik a Zakoob yagensã, la f lebg n tall Israyɛll bu-kellã n wa. Mam yãka foom tɩ f yɩ vẽenem bu-zẽmsã yĩnga, tɩ mam fãagrã tõe n ta dũniyã tɛk fãa.»

⁷ Ade, Sẽn-Ka-Saab sẽn yaa fãagdã, n yaa Israyɛll Pʋ-Peelem-Soabã yeta soab ning sẽn paam paoogrã, soab ning nebã sẽn get wa yel-beedã, soab ning sẽn yaa nanambsã yambã, rĩm-dãmbã na n yãnd-a lame n yik yĩngri, nanambs na n yãnda yẽnda n wõgemde, Sẽn-Ka-Saab sẽn zems teegrã yĩnga, Israyɛll Pʋ-Peelem-Soabã sẽn yãk foomã yĩnga.

Fãag-kãseng yembsã yĩnga

⁸ Sẽn-Ka-Saab yetame: «Nimbãan-zoeerã wakate, mam leoka foom, la fãagrã daare, mam sõnga foom. Mam gũu foom n kɩt tɩ fo yɩ kaool nebã yĩnga, n na n leb n yik tẽngã, la m kõ nebã b soolmã sẽn dag n sãamã.

⁹ Mam na n yeela b sẽn balg-b rãmbã: ‹Yi-y-yã!› La m yeel sẽn be-b lik bida pʋgã: ‹puk-y-yã!› Bãmb na n pukame n paam dɩɩb soayã zutu, la b na n paama yamd so-bugsã fãa zutu.

¹⁰ Kom kõn leb n yõk bãmb ye, ko-yũud kõn leb n yõk bãmb ye. Sob-tʋʋlg ne wĩndg walem kõn leb n nams bãmb ye. Bala, sẽn zoet-a bãmb nimbãanegã n na n tɛ bãmba, la a talla bãmb n kẽng ko-budum zĩigẽ.

¹¹ Mam na n kɩtame tɩ mam tãmsã fãa lebg soayã, la mam na n pidsa londã fãa.

¹² Gese, bãmb ta n sɛɛme, bãmb bee zĩ-zãrsẽ n watẽ, b watame, kẽer yita rɩtg tɩ kẽer yit nin-taoore, la kẽer yita Sinim tẽnga.

¹³ Saase, kils-y ne sũ-noogo! Dũniyã, kɩdme! Tãmse, kaas-y ne sũ-noogo! Bala, Sẽn-Ka-Saab belsda b nebã, bãmb zoeta b nimbãan-nebã nimbãanega.»

B lebs n mee Zeruzalɛm tɩ neb kẽ

¹⁴ Sɩyõ tẽngã rag n yetame: «Sẽn-Ka-Saab basa maam, mam Zu-soabã yĩma mam yelle!»

¹⁵ Sẽn-Ka-Saab leokame: Pag tõe n yĩma biig ning a sẽn yẽsemdã yell sɩda? Yẽnda ka na n zoe biig ning sẽn yi yẽnda pʋgẽ wã nimbãaneg sɩda? Baa yẽnda sã n tõe n yĩm a yelle, mam kõn tol n yĩm fo yell ye.

¹⁶ Gese, mam gʋlsa fo yʋʋrã m nug-pʋsã zug ne kɩtga, fo lalsã bee mam taoor wakat fãa.

¹⁷ Neb nins sẽn na n lebs n me foomã zoet n watame, Sẽn sãam-b foom n kɩt tɩ fo lebg raboogã na n yi fo pʋgẽ n looge.

¹⁸ Zẽk f neng n ges sẽn gilg foomã, bãmb fãa tigma taab n wat fo nengẽ. Sẽn-Ka-Saab sẽn vɩ wã yetame: «Mam wẽendame, tɩ fo na n pida bãmb wa fan-teoogo. Fo na n sẽbg-a-la f sɛɛg wa pʋg-bil sɛɛg sẽbdga.

¹⁹ Ade, fo tẽngã sẽn dag n lebg raboogã, la zĩis nins sẽn dag n sãamã, tẽn-kãngã sẽn dag n wã wã, na n lebga sẽk ne fo nebã sẽn na n wa kẽ beenẽ wã. Neb nins sẽn dag n sãamd foomã na n zãagame.

²⁰ Fo kamb nins f sẽn dag n be kɛɛngã na n wa yeela foom yaa: ‹Zĩigã yaa sẽk ne tõndo. Bao-y zĩig n kõ-d tɩ d zĩndi.›

²¹ Fo na n soka f meng yaa: Ãnda n dog kom-bãmbã n kõ maam? Bala, mam dag n ka leb n tar biig ye. Mam dag n yaa kiiri. B rag n diga maam tɩ m kẽng tẽn-zẽnga. Ãnda n wub bãmba? Mam dag n vɩ m yembre. La kom-bãmbã rag n bee yɛɛnẽ?»

²² Zu-soab a Sẽn-Ka-Saab yetame: «Mam na n zẽka m nug tɩ yɩ bãnd bu-zẽmsã yĩnga, mam na zẽka m tãb-kaoor n tees buud a taabã. Bãmb na n buga fo kom-dibli wã n wa, la b zombg fo kom-pugli wã gʋbl n wa.

²³ Rĩm-dãmb n na n yaool fo kambã, la bãmb rĩm-pogsã na n yɩɩ fo kom-yaoondba. Bãmb na n wõgemda fo taoore, n fõgen b nens tẽnga, n lelem fo naoã wubsgã. Dẽ la fo na n bãng tɩ mam yaa Sẽn-Ka-Saabo, la neb nins sẽn dɩk b teegr n teeg maamã kõn paam yãnd ye.»

²⁴ B tõe n deega bũmb ning gãndaoog sẽn yõkã bɩ? Rẽ yĩnga, nin-toaag sẽn yõk bũmb ningã tõe n fãagame n zoe bɩ?

²⁵ Sɩd me, Sẽn-Ka-Saab yetame: «B na n tõog n deega gãndaoog sẽn dag n yõgã, la b na n fãaga neb nins nin-toaag sẽn dag n yõgã. Mam na n zaba ne neb nins sẽn zabd ne foomã, la mam na n fãaga fo kambã.

²⁶ Mam na n kɩtame tɩ neb nins sẽn namsd foomã wãb b mens nemdo. La m kɩt tɩ b yũ b mens zɩɩm wa reezẽ rã-paalga. Woto, nebã fãa na n bãngame tɩ mam yaa Sẽn-Ka-Saab sẽn yaa fo fãagda, n yaa fo yoalsda la a Zakoob Pãng-Soaba.»