A Ezayi 48 - WẼNNAAM SEBRE 2014

Sẽn-Ka-Saab wilga bõn-paals sẽn wate

¹ A Zakoob buudu, kelg-y-yã, yãmb yʋʋr sẽn yaa Israyɛllã, la yãmb sẽn yaa Zʋʋda yagensã, yãmb maanda yẽesem ne rẽndã. Yãmb wẽenda ne Sẽn-Ka-Saab yʋʋre, la y boond Israyɛll Wẽnnaamã, tɩ yaool n ka ne sɩda la zemsg ye!

² B yaool n boonda yãmb tɩ tẽn-sõngã nebã, la yãmb teega Israyɛll Wẽnnaamã, soab ning yʋʋr sẽn boond tɩ Saasẽ-Pãng-soabã.

³ Mam togsa bũmb ning sẽn maandã yell hal daar zãra. Mam mengã noor n gom n kɩt tɩ b wʋm-a. La tao-tao bala, mam kɩtame tɩ bõn-kãng zĩndi.

⁴ Mam miime tɩ yãmb yaa sũ-keglem dãmba, n miẽ tɩ yãmb yublã yaa kɛgeng wa kutu, la y rĩyã yaa wa zũudu.

⁵ Mam dag n togsa yãmb bõn-kãng hal daar zãra, mam kɩtame tɩ yãmb wʋm bõn-kãng t'a nan ka wa ye, tɩ yãmb ra wa yeel tɩ yaa yãmb wẽn-naandgã wall y bõn-naandgã b sẽn yẽneg kut n dõog a soabã, n maan bõn-kãng n kõ yãmb ye.

⁶ Yãmb wʋmdame! Ges-y bõn-kãensã fãa! Yãmb ka na n dɩk-a n togs la? Sẽn sɩng ne moasã, mam na n kɩtame tɩ yãmb wʋm bõn-paal kibare, yaa bõn-paal sẽn dag n solg tɩ yãmb ka miẽ ye.

⁷ Ka hal daar zãr la b naan bãmb ye, yaa moasã bal la b naan-ba. Hal tɩ ta moasã yãmb dag n nan zɩ n wʋm-a ye, yaa sẽn na n yɩlẽ tɩ yãmb da wa yeel tɩ yãmb dag n mii bõn-kãng tiir ye.

⁸ Yãmb ka wʋm baa fɩ, yãmb ka bãng baa fɩ, yãmb tʋbr ka reng n wʋm bũmb ye. Bala, mam dag n miime tɩ yãmb yaa zãmb dãmba. B rag n boonda foom hal f ma pʋgẽ tɩ ‹tõata.›

⁹ Mam yʋʋrã yĩnga, mam basda m sũ-yikrã. B sẽn kõt maam waoogr ningã yĩnga, mam yõkda m meng ne foom n ka rat n sãam-f ye.

¹⁰ Ade, mam yɩlga foom, la m ka yɩlg-f wa b sẽn yɩlgd wanzuri ye. Mam ninga foom toog boaag pʋgẽ.

¹¹ Yaa mam mengã yĩnga, yaa mam mengã yĩng la m maan-yã. Mam na n yɩ a wãn n bas tɩ b paoog maam! Mam ka na n dɩk m waoogrã n kõ ned a to ye.

Sẽn-Ka-Saab fãagr Israyɛll yĩnga

¹² A Zakoob buudu, kelg-y maam, foom a Israyɛll mam sẽn boole! Yaa maam, yaa maam la dẽenem, leb n yaa maam la yaoolem.

¹³ Mam meng nug n vigl dũniyã, la mam nug-rɩtg n yɛdg saagã. Mam sã n bool-ba, b naagda taab n wa mam taoore.

¹⁴ Bɩ yãmb fãa tigim taab n kelge! Ãnda bãmb sʋkã n tõog n togs bõn-kãnga? Sẽn-Ka-Saab sẽn nong a soabã n na n tõog n maan bãmb raabã, n zab ne Babilonde, la yẽnda nugã na n zɩsga Kalde rãmbã zugu.

¹⁵ Yaa maam, maam m yembr bal n gome, mam boola yẽnda n kɩt t'a wa, la a na n tõoga a tʋʋmdã.

¹⁶ Kolg-y maam n kelge! Hal sɩngr wẽndẽ, mam ka solg n gom ye. La hal yel-kãensã sɩngrẽ, mam dag n beeme. Moasã, Zu-soab a Sẽn-Ka-Saab tʋma maam ne bãmb sɩɩgã.

¹⁷ Sẽn-Ka-Saab sẽn yaa fo fãagda, n yaa Israyɛll Pʋ-Peelem-Soabã yetame: «Maam a Sẽn-Ka-Saab n yaa fo Wẽnnaam, mam na n zãmsa foom f meng sõngr yĩnga, maam n tɛt foom sor ning fo sẽn be wã zugu.

¹⁸ Fo sã n dag n sakẽ-la mam noyã, fo vɩ-bãanã rag n na n yɩɩ wa kʋɩlg koom, la fo tɩrlmã rag n na n zoeta wa ko-kãsengã ko-zoetem!

¹⁹ Fo yagensã rag n na n yɩɩ wʋsg wa bĩisri, tɩ f yagen-tʋbrakẽesã yɩ wa tom. La bãmb yʋʋrã rag n ka na n menem mam taoor ye.»

²⁰ Yi-y n bas-y Babilond tẽngã, zoe-y n yi-y Kalde rãmbã sʋka! Zẽk-y y koɛɛg ne sũ-noog n moon n kɩt tɩ nebã wʋm bõn-kãngã. Togs-y-yã-a t'a sãeeg n ta dũni tɛk fãa, yeel-y tɩ Sẽn-Ka-Saab fãaga b tʋmtʋmd a Zakoobe!

²¹ Ko-yũud kõn tol n yõk bãmb weo-raoog ning pʋg bãmb sẽn tat-bã ye. Bãmb na n kɩtame tɩ koom pusg pĩig zug tɩ b yũ, bãmb na n pãrga pĩig tɩ koom zoe.

²² Sẽn-Ka-Saab yeelame: «Vɩ-bãan ka be nin-wẽns yĩng ye.»