A Ezayi 47 - WẼNNAAM SEBRE 2014

Babilond sɩbgre

¹ Sẽn-Ka-Saab yetame: Babilond tẽn-neere, sig n zĩnd tomẽ! Kalde rãmbã tẽn-neere, zĩnd tẽng tɩ f naamã sɛɛme! B kõn leb n bool foom tɩ tẽn-neere, la tẽng sẽn tar ra-sãnd ye.

² Rɩk ne-biis n wer zom, pilg f nengã peendã, la f kool f fu-yergã n bas f gɛyã n dʋʋg kʋɩlse!

³ B na n yãnda f zaalã, b na n yãnda fo paoogrã. Mam na n doka m sũuri, Mam ka na n bas tɩ ned gɩdg maam ye.

⁴ Tõnd fãagdã yʋʋr boondame tɩ Saasẽ-Pãng-soaba. Bãmb yaa Israyɛll Pʋ-Peelem-Soaba.

⁵ Kalde nebã, zĩnd-y sɩddd... n kẽ lik bida pʋga! B kõn leb n bool foom tɩ soolem-dãmb naab ye.

⁶ Mam sũur dag n yika ne m nebã, mam dag n paooga mam nebã, mam dag n dɩk-b lame n bas fo nugẽ, la fo ka zoe bãmb nimbãaneg ye. Fo namsa bãmb nin-kẽembã wʋsgo.

⁷ Fo rag n yetame: «Mam na n kell n yɩɩ naab wakat fãa!» Fo ka tags bõn-kãensã fãa yell ye, fo ka tags yɛlã sẽn na n wa yɩ to-to wã ye.

⁸ Moasã, vɩ-noanga, kelg koe-kãngã, fo zĩi ne pel-kɛgeng n yetẽ: «Ned ka be n ta maam ye! Mam kõn tol n yɩ pʋg-kõor ye, la b kõn tol n dees mam kambã n bas-m ye!»

⁹ Yel-bãmbã b yiibã n na n paam foom wakat-yɛnga, daar a yembr pʋgẽ: yaa f kambã kaalem ne f pʋg-kõtã. Baa fo bag-bʋgdbã sẽn yaa wʋsgã, la baa ne fo tɩɩmã rɩɩb sẽn tar pãngã, yel-bãmbã b yiibã na n lʋɩɩ fo zug ne b pãngã tɛka.

¹⁰ Fo rag n dɩka f teegrã n teeg wẽng maaneg n yetẽ: «Ned ba a ye ka ne maam ye!» Fo yamã ne f bãngrã lebga f zugã, tɩ fo rag n yetẽ: «Ned ka be n ta maam ye!»

¹¹ Toog n na n paam foom, tɩ fo ka bãng a sẽn yitẽ ye. Sãoong n na n wa fo zugu, tɩ fo ka mi fo sẽn na n maaneg ye. Toog n na n wa ling foom tɩ f ka bãng ye.

¹² Dẽ wã, fo we n kell n pa f tɩ-rɩɩrã pʋga, kell n pa f bag-bʋgrã sẽn yaa wʋsgã pʋga. Fo namsa f meng bãmb yĩng hal f yãadem wakate! Tõeeme tɩ f na n paama nafr a pʋga, tõeeme tɩ f na n tũnuga be n kẽes rabeem!

¹³ Fo saglsã kosg kɩtame tɩ fo yɛ. Dẽ wã, bɩ sẽn mi-b yĩngr yɛla, la sẽn get-b ãds n togsd yɛlã, la sẽn tar-b bũmb ki-paalg fãa n togsdẽ wã, yik n fãag-fo!

¹⁴ Bãmb na n yɩɩ wa moodo, bugum n na n dɩ bãmba. Bãmb ka na n põs bug-witmã ye. Ka na n yɩ bug-saal ned sẽn tõe n wʋm a bur ye, leb n ka na n yɩ bug-saal b sẽn tõe n zĩnd n wood ye.

¹⁵ Bag-bʋgdbã ne tɩtã-rãmb fo sẽn nams f meng b nengẽ wã na n yɩɩ a woto. Neb nins fo sẽn maan leebg ne-b hal f yãadmẽ wã ned kam fãa na n yeebame n tudi. La fo kõn tol n paam fãagd ye!