A Ezayi 44 - WẼNNAAM SEBRE 2014

Sẽn-Ka-Saab bal n yaa Wẽnnaam

¹ Mam tʋmtʋmd a Zakoobe, Israyɛll nebã mam sẽn yãkã, kelg-y moasã!

² Sẽn-Ka-Saab sẽn yaa soab ning sẽn naan-a foomã, la a yag foom f ma pʋgẽ wã, soab ning sẽn sõngd foomã yetame: «Mam tʋmtʋmd a Zakoobe, Israyɛll nebã mam sẽn yãke, da zoe rabeem ye.

³ Bala, mam na n pʋdga koom tẽn-gãong sẽn kʋɩ zugu, la m kɩt tɩ kʋɩls koom zoe tẽn-koɛɛng zugu. Mam na n pʋdga m sɩɩgã yãmb kambã zugu, la m pʋdg m barkã yãmb yagensã zugu.

⁴ Bãmb na n bulame n yi moogã sʋka, wa tãnwĩis sẽn be bãoog noore.»

⁵ Ned a yembr na n yeelame yaa: «Mam yaa Sẽn-Ka-Saab rẽnda!» Tɩ ned a to rat tɩ b bool yẽnda t'a Zakoobe. La ned a to na n gʋlsa a nug zug yaa: «Mam yaa Sẽn-Ka-Saab n so,» la a yeel tɩ b bool yẽnda t'a Israyɛlle.

Bõn-naands pɛɛsdba yalemdo

⁶ Sẽn-Ka-Saab sẽn yaa Israyɛll nebã rĩm la b fãagdã, n yaa Saasẽ-Pãng-Soabã yetame: «Mam yaa dẽenem la yaoolem. Sã n ka maam, Wẽnnaam a to ka be ye.

⁷ Ãnda soab n yaa wa maam? Bɩ a zẽk a koɛɛg n togse! A yik n yals mam taoor n togs sẽn yɩ to-to, bɩ a wilg bũmb ning sẽn zĩnd hal kʋdem-wẽndẽ, wakat ning mam sẽn vigl ninsaalbã! La a togs bũmb ning sẽn na n wa zĩndã, la a wilg bũmb ning sẽn be taoor n watẽ wã!

⁸ Da-y yɛɛs-y ye, Da-y zoe-y rabeem ye. Mam ka togs yãmb bõn-kãng hal daar zãra, la m wilg yãmb sẽn na n yɩ to-to sɩda? Yãmb yaa mam kaset dãmba. Dẽ yĩnga, Wẽnnaam a to beeme tɩ ka maam sɩda? Pĩig a to ka be ye. Mam ka mi pĩig a to sẽn be ye.

⁹ Neb nins sẽn naand-b bõn-naandsã fãa yaa zaalem. La bãmb tʋʋm nins ligd sẽn yaa toogã ka na n leb n tall nafr ye. Bãmb yaa b bõn-naandsã kaset dãmba, bõn-naandsã ka tar nini, b ka tar bãngre, la rẽ n na n yɩ b yãnde.

¹⁰ Ãnda n maand wẽnde wall a rõog bõn-naandg n yaool n ka na n paam nafr ne-a?

¹¹ Ade, yẽnda poorẽ dãmbã fãa na n dɩɩ yãnde. Sẽn naan-b bãmbã yaa ninsaalb bala. Bɩ bãmb fãa naag taaba, bɩ b naag taab n wa, n naag taab n yɛɛs la b rɩ yãnde.

¹² Sãy sẽn kut lar to-to wã, a rɩkda yẽnda n ning bug-saal sẽn moog pʋgẽ, n yiis-a n dɩk zãar n kud-a, la yaa ne yẽnda kangã pãng la a tʋmda. Kom sã n yõk sãyã, a ka tar pãng ye. La a sã n ka yũ koom, a pãngã sɛtame.

¹³ Ra-pɛɛsd tẽegda wĩiri, n dɩk goor n maan a naandã, la a rɩk pɛsg n naan-a, yẽnda rɩkda makdg n maan a naandã. A maand-a lame t'a wẽneg ninsaala, n kɩt t'a tar ninsaal yasre, la a rɩk-a n tɩ ning roogẽ.

¹⁴ Yẽnda kɛɛda sɛɛdr tɩɩs raado, wall a kɛɛg sɩprɛs bɩ sɛn tɩɩg ra-bɩlma, rẽ t'a bas-a lame t'a lebg bedr kãgrã tɩɩs sʋka. Sã n ka rẽ bɩ a sel tɩɩg buud sẽn boond tɩ sedaar tɩ saagã koom kɩt t'a lebg bedre.

¹⁵ Ninsaalbã tar-b lame n tugund bugum. B tugunda raoogã bugum n wootẽ. Wakat kẽere, b yõgend-a-la bugum n segl rɩɩbo, n leb n pɛɛsd-a t'a yaa wẽnnaam, n wõgemded n waoogd-a. Yẽnda rɩkd-a lame n maan bõn-naandg n wõgemded a taoor n pʋʋsdẽ.

¹⁶ Yẽnda rɩkda raadã pʋɩ-sʋk n tugl bugum, raadã pʋɩ-sʋkã la yẽnda tar n sẽed a nemdo, la a kɩɩmdame n dɩt n tɩgda. Yẽnda woota bugmã la a yetẽ: ‹Ha! Ha! Mam woota bugum, mam nee a bug-witmã!

¹⁷ La a rɩk sẽn ketã n maan wẽnnaam sẽn yaa bõn-naandga, n wõgemded yẽnda taoor n waoogd-a, yẽnda wõgemdeda a taoor n pʋʋsd-a,› yẽnda pʋʋsd-a lame n yetẽ: ‹Bɩ f fãag maam, bala, fo yaa mam Wẽnnaam!›

¹⁸ Nin-bãmbã ka tar bãngr wall yam ye. Bãmb ninã mumame tɩ b ka tõe n yãnd ye. La b tagsgã kɩdame tɩ b ka wʋmd a võor ye.

¹⁹ Bãmb ned ba a yembr ka tol n tagsdẽ ye, la a ka tar bãngr wall yam n tõe n yeel tɩ: ‹Mam loba raadã pʋɩ-sʋkã bugmẽ, mam segla rɩɩb bug-saalã zugu, mam kɩɩma nemd n wãbe, la mam dɩka sẽn kellã n maan yel-beedo!› A ka tõe n yeel tɩ yaa raoog la yẽnda sẽn pʋʋsdã ye!

²⁰ Rẽ wã, yaa tompeglem bal la yẽnda pʋgda. A tagsgã belg-a lame n kẽes moogo, la a kõn tol n fãag yẽnda ye. A ka na n yeel tɩ: ‹Rẽ yĩnga, mam sẽn zãad m nug-rɩtgã ka belgr bũmb sɩda?› »

Dũni naandã n so zamaan fãa

²¹ Zakoobe, tẽeg bõn-kãngã, Israyɛll buudu, tẽeg tɩ fo yaa mam tʋmtʋmda. Maam n naan foom tɩ f yɩ mam tʋmtʋmda. Israyɛlle, mam kõn tol n yĩm f yell ye.

²² Mam yẽesa fo tʋʋm-beedã wa sawato, la m yiis f yel-wẽnã wa wulgu. Lebg n wa mam nengẽ, bala, maam n yaa fo fãagda.

²³ Bɩ saasẽ kaas ne sũ-noogo, bala, Sẽn-Ka-Saab tʋmame. Dũniyã zĩ-zulumsi, kils-y-yã! Tãmse, kelm-y sũ-noog kɛlenga! Kãgre, bɩ foom ne f pʋgẽ tɩɩsã me kilsi! Bala, Sẽn-Ka-Saab fãaga a Zakoob buudã, n wilg bãmb ziirã Israyɛll pʋgẽ.

²⁴ Sẽn-Ka-Saab sẽn yaa yãmb fãagdã, sẽn naan-a yãmb y ma pʋgẽ wã yetame: «Mam yaa Sẽn-Ka-Saabo, maam n naan bũmb fãa. Maam m yembr n yɛdg sa-gãongã, yaa maam n naan tẽn-gãongã.

²⁵ Mam kɩtdame tɩ zĩrẽ bãngdbã bãn lebg zaalem, la m kɩt tɩ bagbã yam meneme. Mam kɩtdame tɩ yam dãmbã leb poorẽ, n kɩt tɩ b bãngrã lebg yalemdo.

²⁶ Mam kɩtdame tɩ mam tʋmtʋmdã goam paam pidsgu, la m kɩt tɩ mam koe-toagsdbã saagr pidsi. Mam goma Zeruzalɛm wɛɛngẽ n yeele: ‹Neb na n leb n zĩnda Zeruzalɛm pʋgẽ, la b na n lebs n mee Zʋʋda tẽmsã, mam na n lebs n yika a raboodã.›

²⁷ Mam yeela ko-zulumsã yaa: ‹kʋɩ-y-yã!› Mam na n kʋɩɩsa yãmb kʋɩlsã koom.

²⁸ Mam goma a Siruus wɛɛngẽ n yeel yaa: ‹A Siruus yaa mam pe-kɩɩma! Yẽnda na n pidsa mam datmã fãa. Yẽnda na n yeelame: Bɩ y lebs n me Zeruzalɛm, bɩ y yẽbg Wẽnnaam doogã!› »