A Ezayi 42 - WẼNNAAM SEBRE 2014

Sẽn-Ka-Saab tʋmtʋmda

¹ Ad mam tʋmtʋmd mam sẽn sõngda, yaa mam nin-tũusdg mam sẽn nonge. Mam ninga m sɩɩgã yẽnda zugu. Yẽnda na n kɩtame tɩ tɩrlem zĩnd bu-zẽmsã sʋka.

² Yẽnda ka na n kelem wall zẽk a koɛɛg ye. Ned kõn wʋm yẽnda koɛɛg soay zut ye.

³ Yẽnda ka na n kaoog tãnwĩig ning sẽn gõdã ye. Yẽnda ka na n kiis fɩtl bugum sẽn dat n ki ye. La a na n kɩtame tɩ bʋ-kao-tɩrg zĩndi.

⁴ Yẽnda pãng ka na n sɛ, la a raood ka na n booge, hal t'a wa kɩt tɩ tɩrlem zĩnd dũni zugu. Bala, tẽms nins koom sẽn gũbgã gũuda yẽnda tõogã.

⁵ Ade, Wẽnnaam Sẽn-Ka-Saab sẽn naan saasẽ n ning a zĩigẽ wã, la b yɛdg tẽn-gãongã ne a pʋgẽ teedã, n yaa soab ning sẽn kõt nebã sẽn be a pʋgẽ wã vɩɩmã, la b kɩt tɩ bũmb nins sẽn saagd tẽn-gãongã zugã tar vʋʋsmã yetame:

⁶ «Maam a Sẽn-Ka-Saab n bool foom tɩrlem yĩnga, la mam gãda fo nugu, la m gũuda foom n na n kɩt tɩ f yɩ kaool buud a taabã yĩnga, la f yɩ vẽenem bu-zẽmsã yĩnga,

⁷ n kɩt tɩ zoens nin pugsi, la f yiis yembs bi-bees roogẽ, la f yiis b sẽn balg b rãmb lik-bida pʋgẽ wã.

⁸ Mam yaa Sẽn-Ka-Saabo, mam yʋʋr la woto. Mam kõn dɩk m ziirã n kõ ned a to ye, la m kõn dɩk m waoogrã n kõ wẽn-naands ye.

⁹ Bũmb nins sẽn zĩnd pĩndã loogame, moasã, mam togsda yãmb yel-paala, la mam wilgd-b-la yãmb tɩ b nan ka wa ye.»

Sẽn-Ka-Saab pẽgre

¹⁰ Yɩɩl-y yɩɩn-paalg Sẽn-Ka-Saab yĩnga, yɩɩl-y n pẽg-y bãmb dũni ween-vɩɩsã fãa pʋga. Bɩ sẽn kẽnd-b ko-kãsengã zugã, la yãmb dãmb sẽn be tẽms koom sẽn gũbg pʋgẽ wã ne y nebã, pẽg-y Sẽn-Ka-Saabo!

¹¹ Bɩ we-raoogã ne a tẽmsã, ne Kedaar nebã sẽn be tẽn-bãoonegã pʋgẽ wã zẽk b koeese! Bɩ Sela tẽng nebã kaas ne sũ-noogo! Bɩ b pa tãmsã zut n kaas tõogr kaasgo!

¹² Bɩ b waoog Sẽn-Ka-Saabo, la bɩ b pẽg bãmb tẽms nins koom sẽn gũbgã pʋga!

¹³ Sẽn-Ka-Saab yita wa gãndaoogo, bãmb yaa wa tãpsoab sẽn nong zabre. Bãmb kaasda zabr kaasgo, bãmb kelemdame, bãmb tõogda b bɛɛbã.

¹⁴ Sẽn-Ka-Saab yeelame: «Mam sĩnda m noor hal daar zãra, mam yõka m meng n ka gom ye. Mam dag n yãbda wa pag sẽn kũmd dogem. Mam dag n sesdame tɩ mam vʋʋsmã rat n yõke.

¹⁵ Mam na n kɩtame tɩ tãmsã ne kunkubã lebg we-raoogo, mam na n kɩtame tɩ mo-maasã fãa kʋɩ. Mam na n kɩtame tɩ tẽn-koɛɛng puk kʋɩlg pʋgẽ, la m kɩt tɩ kʋɩlsã koom kʋɩ.

¹⁶ Mam na n kɩtame tɩ zoens kẽn sor b sẽn dag n ka mi zugu. Mam na n tall-b lame n tũ so-bugs b sẽn dag n ka mi pʋga. Mam na n kɩtame tɩ lik-bida lebg vẽenem bãmb taoore, la m kɩt tɩ so-rʋdã lebg saalga. Mam na n maana bõn-kãngã, la m ka na n tol n bas bãmb ye.

¹⁷ Neb nins sẽn dɩk b teegr n teeg bõn-naandsã, ne neb nins sẽn get wẽn-naandsã b sẽn naan ne kutã n yetẽ tɩ bãmb n yaa b wẽnnaam-dãmbã na n targame n paam yãnde.»

Wẽnnaam keoogda b nebã

¹⁸ Wʋmse, kelg-y-yã! Zoense, puk-y y nin n gese!

¹⁹ Ãnda n yaa zoang tɩ sã n ka mam tʋmtʋmdã? Ãnda n yaa wʋng wa koe-toagsd ning mam sẽn tʋmã? Ãnda n yaa zoang wa soab ning sẽn paam vɩ-bãanã, n yaa zoang wa Sẽn-Ka-Saab tʋmtʋmdã?

²⁰ Fo yãnda bũmb wʋsgo, la fo ka maan gũusg ye. Fo yoka f tʋb n yaool n ka wʋm ye.

²¹ Sẽn-Ka-Saab tɩrlmã yĩnga, taa bãmb yam tɩ b kɩt tɩ tõogã yɩ kãsenga, n yaa sõama.

²² B fãa nin-kãense, la b zɛ b teedã! B bẽda bãmb fãa n yõg n tɩ pag bokẽ, b tɩ pʋga bãmb bi-bees roogẽ. B fãa bãmba, tɩ ned ka be n na n fãag-b ye! B zɛɛ bãmb teedã, tɩ ned ka be n na n yeel tɩ b lebs ye!

²³ Ãnda n be yãmb sʋkã n na n sak n kelg bõn-kãnga? Ãnda soab n na n yok a tʋbr n kelg sẽn wat beoogã?

²⁴ Ãnda n bas a Zakoob yagensã fãadb nugẽ, la ãnda n bas tɩ b zɛ Israyɛll nebã? Ka Sẽn-Ka-Saab la? La ka tõnd n beeg bãmb la? Woto fãa yaa bãmb sẽn ka tʋlg n na n tũ Sẽn-Ka-Saab soayã, la b ka kelg bãmb tõodã.

²⁵ Rẽ kɩtame tɩ Sẽn-Ka-Saab sik b sũ-puugrã Israyɛll nebã zugu, la b tʋm zabr bãmb yĩnga. Zabrã widga zĩig fãa tɩ bãmb ka wʋmd a võor ye. A sãama bãmba, la bãmb ka bao yam ye.