A Ezayi 38 - WẼNNAAM SEBRE 2014

A Ezekɩyaas paama maagre

¹ Wakat-kãnga, rĩm a Ezekɩyaas lʋɩɩ bãag sẽn dat n kʋ-a. La a Amots biig a Ezayi sẽn yaa Wẽnnaam no-rɛɛsã wa n yeel-a lame yaa: «Ade, Sẽn-Ka-Saab yetame: Maneg f zakã yɛla. Bala, fo ka na n leb n vɩɩmd ye. Fo na n kiime.»

² Rĩm a Ezekɩyaas wẽnemda a neng n tees roogã lalgã, n pʋʋs Sẽn-Ka-Saab n yeele:

³ Yẽnda pʋʋsame n yeele: «Sẽn-Ka-Saabo, m kotame tɩ y tẽeg m yelle, m kotame tɩ y tẽeg tɩ mam dag n tũuda yãmb ne sɩda la ne m sũur fãa, la mam maana sẽn noom yãmba!» La a Ezekɩyaas yãba nintãm wʋsgo.

⁴ Dẽ, Sẽn-Ka-Saab goma ne a Ezayi n yeele:

⁵ «Kẽng n tɩ yeel a Ezekɩyaas tɩ Sẽn-Ka-Saab sẽn yaa yẽnda ba a Davɩɩd Wẽnnaamã yetame: ‹Mam wʋma fo pʋʋsgã, mam yãnda fo nintãmã. Mam paasda fo vɩɩmã yʋʋm piig la a nu.

⁶ Mam na n fãaga foom ne tẽn-kãngã Asiiri rĩmã nugẽ. Mam na n kogla tẽn-kãngã.› »

⁷ A Ezayi yeelame: «Ad bãnd ning Sẽn-Ka-Saab sẽn kõt foom n wilgdẽ tɩ b na n maana wa b sẽn yeelã:

⁸ ‹Mam na n kɩtame tɩ wĩndgã targe, tɩ maasmã leb poorẽ nao-yakem piig a Akaaz rʋʋdgã zugu. La wĩndgã targ n leba poorẽ nao-yakem piig rʋʋdgã zugu.› »

A Ezekɩyaas pʋʋsgo, a maagrã poore

⁹ Zʋʋda rĩm a Ezekɩyaas sũur gomde. Yaa yẽnda sẽn lʋɩ bãagã n ka ki wã poore.

¹⁰ Mam dag n yeta m meng yaa: «Mam vɩɩmã sẽn wa n noomẽ wã, la mam na n loog n kẽng kɩɩm-kulg rignoorẽ. Mam ka paam m yʋʋmã sẽn ketã ye!»

¹¹ Mam dag n yetame: «Mam ka na n tol n leb n yãnd Sẽn-Ka-Saab nin-vɩɩs sʋk dũni ka ye. Mam ka na n leb n yãnd ned ninsaalb sʋk dũni ka ye!

¹² B viiga mam doogã n zãag ne maam, wa b sẽn viig pe-kɩɩm fu-roogo. Mam vɩɩmã tata a tɛk wa sʋn-wʋgd sẽn wãagd a gĩsga. B yiisa maam m tʋʋmd pʋga. Wĩndg sẽn wat n na n kẽ tɩ yãmb baasa maam!

¹³ Beoogã ne a na n vẽege, tɩ yãmb baasa maam. Bãmb wõra mam kõabã wa gɩgemd sẽn wõrd kõaba. Wĩndg sẽn wat n na n kẽ tɩ yãmb baasa maam!

¹⁴ Mam fɩɩnda wa sɩlaalle, mam wũusda wa manwalle. M nimbãanega pʋga, mam zẽkda m neng yĩngri. Sẽn-Ka-Saabo, sõng-y maam tɩ m namsdame!

¹⁵ Mam na n yeelame tɩ bõe? Bãmb leoka maam, la yaa bãmb mengã n maane. Mam na n kẽna ne sik-m-meng m vɩɩmã tɛka, toog sẽn tar maamã yĩnga.

¹⁶ Sẽn-Ka-Saabo, yaa yãmb sõmblmã n kɩtd tɩ nebã vɩ. Bãmb yĩng n kɩt tɩ mam tar vɩɩm. Yãmb leb n vigla maam n kõ maam vɩɩm.

¹⁷ Mam sũ-sãangã tekame n lebg vɩ-bãane. Yãmb yamã loee ne maam hal tɩ y fãag-m ne yaoogo, bala, yãmb loba mam yel-wẽnã y zãnkuidgẽ.

¹⁸ Bala, ka kɩɩm-kulg n na pẽg yãmb ye, leb n ka kũum n na n waoog yãmb ye. Neb nins sẽn sigd-b bokẽ wã ka leb n maand tẽeb ne yãmb sɩdã ye.

¹⁹ Ad yaa nin-vɩɩsã bal n tõe n pẽg yãmb wa mam sẽn pẽgd yãmb dũndã wã. Ba-rãmb na n kɩtame tɩ b kamb bãng yãmb sɩdã.

²⁰ Sẽn-Ka-Saab fãaga maam! Tõnd na n wẽ d yʋʋm-teedã Sẽn-Ka-Saab roogã pʋg daar fãa n tãag d vɩɩmã tɛka.»

²¹ A Ezayi rag n yeelame: «Bao-y kankam-koeems n to n wa bɛ nod-kɛgengã, la a Ezekɩyaas na n põsame.»

²² A Ezekɩyaas rag n sokame tɩ bãnd ning sẽn wilgd tɩ yẽnda na n leb n kẽnga Sẽn-Ka-Saab roogẽ wã yaa bʋgo.