A Ezayi 37 - WẼNNAAM SEBRE 2014

A Ezekɩyaas soka no-rɛɛs a Ezayi

¹ Rĩm a Ezekɩyaas sẽn wʋm gom-kãensã wã, a pãrsa a fut n yeelg boto, n kẽng Sẽn-Ka-Saab roogẽ wã.

² Rĩm a Ezekɩyaas tʋma a Eliyakim sẽn yaa na-yirã zak naabã ne a Sebna sẽn yaa seb-gʋndã, la maan-kʋʋdbã kãsem-dãmbã, a Amots biig a Ezayi sẽn yaa Wẽnnaam no-rɛɛsã nengẽ. La b fãa yeelga bot n kẽnge.

³ Bãmb yeela a Ezayi yaa: «A Ezekɩyaas yeelame: ‹Rũndã daarã yaa yel-pakr daare, sɩbgr la yãnd daare. Bala, rogem daar taame, la pãng ka be n na n dog ye.

⁴ Daar ninga, Sẽn-Ka-Saab sẽn yaa yãmb Wẽnnaamã na n wʋma goamã Asiiri rĩmã sõgen-kãsengã b sẽn tʋm t'a wa tʋʋs Wẽnnaam sẽn vɩ wã to-to wã. Tõeeme tɩ Sẽn-Ka-Saab sẽn yaa yãmb Wẽnnaamã na n sɩbg-b-la goam nins yẽnda sẽn gom tɩ bãmb wʋma yĩnga. Woto wã, bɩ y pʋʋs Wẽnnaam neb nins sẽn ketã yĩnga.»

⁵ Dẽ, rĩm a Ezekɩyaas sẽn tʋm b rãmbã kẽnga Wẽnnaam no-rɛɛs a Ezayi nengẽ.

⁶ La a Ezayi yeela bãmb yaa: «Ad yãmb sẽn na n kẽng n tɩ yeel y soaalã bũmb ninga: ‹Sẽn-Ka-Saab yetame: Da zoe rabeem ne goam nins Asiiri rĩmã tʋmtʋmdbã sẽn gom n paoog maam tɩ fo wʋmã ye.

⁷ Gese, mam na n tʋma sɩɩg yẽnda nengẽ. Yẽnda na n wʋma yell kibare n lebg n leb a tẽngẽ wã, la mam na n kɩtame tɩ b kʋ yẽnda beenẽ ne zabr sʋʋga.› »

A Senakeriib leb n goma zabr goamã

⁸ Asiiri rĩmã sõgen-kãsengã wʋmame t'a soaalã yii Lakɩɩse, n na n tɩ zab ne Libna tẽngã. La yẽnda kẽng n tɩ paam-a-la beenẽ.

⁹ Dẽ, Asiiri rĩmã wʋmame tɩ b yetẽ tɩ Kuus tẽng rĩm a Tiraka watame n na n wa zab ne yẽnda. La Asiiri rĩmã sẽn wʋm woto, a tʋma koe-toagsdb rĩm a Ezekɩyaas nengẽ tɩ b tɩ yeel-a yaa:

¹⁰ «Kẽng-y n tɩ yeel-y Zʋʋda rĩm a Ezekɩyaas yaa: Ra bas tɩ Wẽnnaam ning fo sẽn teegã belg foom, n yeel tɩ Asiiri rĩmã kõn tõog n deeg Zeruzalɛm ye!»

¹¹ Fo mengã wʋma Asiiri rĩm-dãmbã sẽn dag n maan tẽms a taabã fãa bũmb ningã. B sãam-b-la zãnga. Tɩ fo tagsdẽ tɩ f na n põsame!

¹² Dẽ yĩnga, Goozã ne Haarã la Retsɛf ne Edɛn nebã sẽn be Telasaarã, sẽn yaa buud toay-toay nins mam ba-rãmbã sẽn sãamã wẽnnaam-dãmb tõog n fãag-b lame sɩda?

¹³ Hamat rĩmã ne Arpaad rĩmã la Sefarvayim tẽng rĩmã ne Hena rĩma la Iva rĩmã bee yɛɛnẽ?

Rĩm a Ezekɩyaas pʋʋsgo

¹⁴ Rĩm a Ezekɩyaas reega sebrã koe-toagsdbã nugẽ n karme, la a yik n kẽng Sẽn-Ka-Saab roogẽ wã n tɩ lak sebrã Sẽn-Ka-Saab taoore.

¹⁵ Rĩm a Ezekɩyaas pʋʋsa Sẽn-Ka-Saab n yeel yaa:

¹⁶ «Saasẽ-Pãng-Soabã sẽn yaa Israyɛll Wẽnnaam, n zao serubẽ-rãmb zugu, yaa yãmb y yembr bal n yaa dũniyã soolem-dãmbã fãa Wẽnnaam, yaa yãmb n naan yĩngr la tẽnga.

¹⁷ Sẽn-Ka-Saabo, kɩll-y y tʋbr n kelge! Sẽn-Ka-Saabo, puk-y y nin n gese! Kelg-y goam nins fãa a Senakeriib sẽn tʋm n tʋʋsd yãmb a Wẽnnaam sẽn vɩ wã!

¹⁸ Sẽn-Ka-Saabo, yaa sɩd tɩ Asiiri rĩm-dãmbã sãama soolem-dãmbã ne b tẽmsã zãnga,

¹⁹ n wʋk b wẽnnaam-dãmbã n yõog bugum, n menes-b zãnga. Sɩdã, wẽnnaam-bãmb rag n ka wẽnnaam-dãmb sɩd-sɩd ye. Bala, rag n yaa raad ne kug wẽn-naands ninsaalb nus sẽn maane.

²⁰ Moasã, Sẽn-Ka-Saab sẽn yaa tõnd Wẽnnaam, fãag-y tõnd a Senakeriib nugẽ, tɩ dũniyã soolem-dãmbã fãa bãng tɩ yaa yãmb a Sẽn-Ka-Saab y yembr bal n yaa Sẽn-Ka-Saabo!»

A Ezayi rɩka Wẽnnaam leokrã n taase

²¹ Dẽ, a Amots biig a Ezayi tʋmame tɩ b tɩ yeel rĩm a Ezekɩyaas yaa: «Ad koɛɛg ning Sẽn-Ka-Saab sẽn yaa Israyɛll Wẽnnaamã, fo sẽn pʋʋs a soab Asiiri rĩm a Senakeriib wɛɛngẽ wã la woto:

²² Ad sɩbgr gomd Sẽn-Ka-Saab sẽn gom yẽnda wɛɛngẽ n yetẽ: ‹Sɩyõ tẽn-neere, a yaanda foom, la a paoogd foom, Zeruzalɛm tẽn-neere, a bee fo poorẽ n gõmsda a zugu.

²³ Yaa ãnda la fo sẽn tʋʋs la f paoogã? Yaa ne ãnda la fo sẽn zẽk f koɛɛgã? Fo zẽka f neng yĩngr n zabd ne Israyɛll Pʋ-Peelem-Soabã!

²⁴ Fo tũnuga f tʋmtʋmdbã n paoog Sẽn-Ka-Saab n yeele: Mam sẽn tar saar-dãmb wʋsgã yĩnga, mam tõog n dʋʋ tãms sẽn lug zutu, n tõog n ta hal Libã yaangã. Mam kɛɛ yẽnda sɛɛdr tɩ-wogdã, ne a sɩprɛs tɩɩs nins sẽn yaa neeb n yɩɩdã, mam tãaga a yaoolem tʋg-bɛdã sẽn be tãmsã zutã.

²⁵ Mam tuu buls n yũ b koom, mam nao na n kʋɩɩsa Nill kʋɩlgã ko-soayã fãa koom.

²⁶ Fo ka bãng tɩ yaa hal daar zãr la mam segl bõn-kãensã, la mam maana bãmb hal kʋdem-wẽndẽ? Moasã, mam kɩtdame tɩ b paamd pidsgu, fo tʋʋmd yaa f kɩt tɩ tẽms nins sẽn tar pãngã lebg raboodo.

²⁷ Tẽn-bãmb nebã ka tar pãng ye, rabeem la yãnd n tar-ba. Bãmb wẽnda wa moog sẽn be weoogẽ, la wa mo-maasa, la wa gãosg zug moogo, la wa weoog pʋgẽ moog sẽn kʋɩ n ka paam n bɩ ye.

²⁸ Gese, mam mii fo zĩndg wakate, la f yiib ne f kõom wakate. Mam leb n mii wakat ning fo sẽn gʋngde, n dat n zab ne maamã.

²⁹ Bala, fo yika f sũur ne maam, la fo wuk-m-men-goamã zẽk n taa mam tʋbẽ, mam na n dɩka m bãngã n sog fo yõorã, la m ning fo noorã salbre, n kɩt tɩ f lebg n tũ sor ning fo sẽn tũ n wa wã n lebe.› »

B kõo a Ezekɩyaas bãnde

³⁰ Ad bãnd ning mam sẽn kõt foom a Ezekɩyaase: Rõandã, nebã na n dɩɩ ka-yiisdim, la vẽere, b na n dɩɩ ka-yogdo, la yʋʋm-yɩta, bʋd-y-yã la y tigsi, la y sel reezẽ tɩɩs n dɩ b biisi.

³¹ Neb nins sẽn põs Zʋʋda buudã sʋk n ketẽ wã, na n kɩɩ yẽg tẽn-gãongã pʋga, la b na n woma biis b wilã zutu.

³² Bala, Saasẽ-Pãng-Soabã nonglem-kãsengã na n kɩtame tɩ bu-kell yi Zeruzalɛm, la tɩ neb sẽn põs yi Sɩyõ tãngã zugu.

Rĩm a Senakeriib baoosgo

³³ Bõn-kãng yĩng kɩtame tɩ Sẽn-Ka-Saab gom Asiiri rĩmã wɛɛngẽ n yeele: ‹Yẽnda ka na n kẽ tẽn-kãngã pʋg ye, la a kõn tol n tão peemd ye. Yẽnda kõn tol n zẽk a gãong ye, la a kõn tol n zam tom-dʋr n zab ne-a ye.

³⁴ Yẽnda sẽn tũ sor ning n wa wã, a na n lebg n tũu so-kãng n lebe, la yẽnda kõn tol n kẽ tẽn-kãngã pʋg ye. Maam a Sẽn-Ka-Saab n yeele.

³⁵ Mam na n kogla tẽn-kãngã n fãag-a, mam mengã yʋʋrã yĩnga, la m tʋmtʋmd a Davɩɩd yĩnga.›

³⁶ La Sẽn-Ka-Saab malɛɛkã yiime n kẽng Asiiri nebã tãb-sikẽ, n tɩ kʋ raop tus koabg la pis-nii la a nu. B sẽn yik yibeoogo, b mikame tɩ bãmb fãa yaa kũum n dʋrẽ!

³⁷ Dẽ, Asiiri rĩm a Senakeriib lebg n kẽng n tɩ zĩnda Niniivi.

³⁸ La yẽnda sẽn wa n be a wẽn-naandg a Nisrok pʋʋsg roogẽ wã, yẽnda kambã, a Adarmelɛk ne a Sarɛtsɛɛr kẽng n tɩ kʋ-a-la ne zabr sʋʋga, la b bas n zoe n kẽng Araara tẽnga. La a biig a Asaradon n led yẽnda zĩigẽ n lebg rĩma.