A Ezayi 36 - WẼNNAAM SEBRE 2014

A Senakeriib rat n zaba ne Zeruzalɛm

¹ Rĩm a Ezekɩyaas sẽn deeg a naamã tɩ yʋʋm piig la a naaslẽ, Asiiri rĩm a Senakeriib wa n zaba ne Zʋʋda tẽms nins sẽn gũbg ne lalsã n deeg-ba.

² Asiiri rĩmã zĩnda Lakiis n tʋm a tãb-biis naabã ne tãb-biis wʋsgã rĩm a Ezekɩyaas nengẽ Zeruzalɛm. La tãb-biis naabã kẽng n tɩ yalsa ko-bao-kãsengã sẽn beẽ wã, ga-loasdã pʋʋg sor zugu.

³ Dẽ, a Hilkiiza biig a Eliyakim sẽn yaa rĩm a Ezekɩyaas balem-naabã, ne a Sebna sẽn yaa seb-gʋndã, la a Azaf biig a Yoa sẽn yaa seb-bĩngdã yiime n seg Asiiri rĩmã tãb-biis naabã.

⁴ La tãb-biis naabã yeela bãmb yaa: «M kotame tɩ y yeel a Ezekɩyaas woto: ‹Ade, rĩm-kãsengã sẽn yaa Asiiri rĩmã yetame: Fo teega bõe?

⁵ Mam yeta foom, fo tẽedame tɩ gom-vɩɩd kõta sagls ne pãng tɩ f tõe n kẽng zabr bɩ? Moasã wã, yaa ãnda la fo teeg n yik n dat n kɩɩs maam?›

⁶ Gese, fo rɩka f teegrã n teeg Ezɩpte, Ezɩpt yaool n yaa wa tãnwĩ-kaoongo, n kõsd ned ning fãa sẽn tik yẽnda wã nugu. Ezɩpt rĩm a Faarõ maanda a woto ne neb nins fãa sẽn dɩk b teegr n teeg yẽnda wã.»

⁷ Daar ninga, fo na n yeela maam yaa: «Yaa Sẽn-Ka-Saab sẽn yaa tõnd Wẽnnaamã la tõnd teeg yã. La ka Wẽnnaam-kãng maoong kʋʋb zĩisã ne a tẽn-kugã la a Ezekɩyaas sẽn dag n sãam n bas tẽn-kugr a yembr n yeel Zʋʋda ne Zeruzalɛm nebã tɩ yaa tẽn-kug-kãng taoor la b na n wõgemded n waoogd Wẽnnaamã la!

⁸ Moasã, mam kota foom, tɩ f maan sard ne mam soaalã sẽn yaa Asiiri rĩmã, la sã n mikame tɩ yãmb tara wed-rʋʋdb sẽn tõe n zomb wiidi, mam na n kõo yãmb wiid tus a yiibu.

⁹ Rẽ yĩnga, yãmb tõe n diga mam soaalã tʋmtʋmd ning sẽn yaa-a bilf n yɩɩdã meng t'a serge? Yãmb sẽn teeg Ezɩptã yaa b sẽn tar saar-dãmb ne wed-rʋʋdbã yĩnga.

¹⁰ Sẽn paas me, yãmb tẽedame tɩ maam n soog m meng n wa zab ne tẽn-kãngã n sãam-a tɩ ka tũ ne Sẽn-Ka-Saab raab la? Yaa Sẽn-Ka-Saab n yeel maam yaa: ‹Zab ne tẽn-kãngã n sãam-a.› »

¹¹ A Eliyakim ne a Sebna la a Yoa yeela sõgen-kãsengã yaa: «Tõnd kotame tɩ y gom ne tõnd ne Aram-dãmbã goamã, tɩ tõnd wʋmdame. Da gom-y ne tõnd ne Zʋʋda nebã goam tɩ neb nins sẽn be lalgã zugã wa wʋm ye.»

¹² Sõgen-kãsengã yeela bãmb yaa: «Yãmb tẽedame tɩ mam soaalã koɛɛgã yaa yãmb ne y soaalã yĩng bal la? Koɛɛgã yaa neb nins sẽn be-b lalgã zugã me yĩnga. Bãmb ne yãmb na n dɩ y bĩndã la y yũ y rʋʋd-koomã.»

¹³ Dẽ, sõgen-kãsengã yaasa yĩngr n zẽk a koɛɛg n gom ne Zʋʋda buudã goam n yeele: «Kelg-y Asiiri rĩmã sẽn yaa rĩm-kãsengã koɛɛga.

¹⁴ Asiiri rĩmã yetame: ‹Ra sak-y t'a Ezekɩyaas belg yãmb ye. Bala, yẽnda ka tõe n fãag yãmb ye.

¹⁵ Da bas-y t'a belg yãmb tɩ y wa tẽed tɩ y sã n teeg Sẽn-Ka-Saabo, b na n fãaga yãmba, la b ka na n sak tɩ Asiiri rĩmã tõog yãmb tẽngã ye.

¹⁶ Da kelg-y rĩm a Ezekɩyaas ye.› Asiiri rĩmã yetame: ‹Bɩ y bao zems-n-taar ne maam. Bas-y tɩ m soog-yã. Woto, yãmb ned kam fãa na n dɩ a reezẽ tɩɩsã biis ne a kankamã, la a tõog n yũ a bulgã koom,

¹⁷ hal tɩ mam wa tall yãmb n kẽng tẽng sẽn wẽnd yãmb tẽngã. Yaa tẽng sẽn tar bɩle ne reezẽ rãam, la rɩɩb ne reezẽ tɩɩse.

¹⁸ Da sak-y t'a Ezekɩyaas belg yãmb n yeel tɩ Sẽn-Ka-Saab na n fãag-y lame ye. Rẽ yĩnga, buud a taabã wẽnnaam-dãmb tõog n fãag-b-la Asiiri rĩmã nugẽ sɩda?

¹⁹ Hamat-rãmbã ne Arpaad nebã wẽnnaam-dãmb bee yɛɛnẽ? Sefarvayim wẽnnaam-dãmbã bee yɛɛnẽ? Wẽnnaam-kãens tõog n fãaga Samaari tẽngã mam nugẽ sɩda?

²⁰ Tẽn-bãmb wẽnnaam-dãmbã sʋka, Wẽnnaam bʋg n tõog n fãag a tẽng mam nugẽ, tɩ Sẽn-Ka-Saab na n wa tõog n fãag Zeruzalɛm mam nugẽ?»

²¹ Dẽ, bãmb sĩnda b noore, n ka leok yẽnda tɩ bũmb ye. Bala, rĩm a Ezekɩyaas rag n yeelame yaa: «Da leok-y-yã-a ye.»

²² A Hilkiiza biig a Eliyakim sẽn yaa na-yirã zak naabã, ne a Sebna sẽn yaa seb-gʋndã ne a Azaf biig a Yoa sẽn yaa seb-bĩngdã pãrsa b futu, n lebg n leb rĩm a Ezekɩyaas nengẽ, n tɩ togs-a goam nins fãa Asiiri rĩmã sõgen-kãsengã sẽn gomã.