A Ezayi 35 - WẼNNAAM SEBRE 2014

Kaoos-wetã na n lebg n waame

¹ We-raoogã ne tẽng ning sẽn kʋɩ wã na n maana sũ-noogo. Zĩ-koɛɛngã na n kɩdma ne sũ-noog n ning puud wa sõse.

² A na n ninga puud wʋsg n kɩdem n lange, n yɩɩl kɩdengo, la ne sũ-noog kaasgo. B na n kõo yẽnda Libã ziirã, la a na n paama Karmell ne Saaron neermã. Bãmb na n yãnda Sẽn-Ka-Saab ziirã, b na n yãnda tõnd Wẽnnaamã neermã.

³ Keng-y nus nins sẽn ka tar pãngã, la paas-y rũm nins sẽn keoosdã pãnga.

⁴ Yeel-y neb nins pelens sẽn yɩgdã yaa: «Keng-y y mens n da zoe rabeem ye. Ade, yãmb Wẽnnaamã bee ka! Sũ-dokrã ne Wẽnnaam keoorã watame. Bãmb na n waa b toor n wa fãag yãmba.

⁵ Dẽ, zoens nin na n pugsame, la wʋms tʋb na n yoosame.

⁶ Dẽ, woabg na n yɩk n tiimsa wa yĩisri, la mugs zɛlmã na n lakame tɩ b kaas ne sũ-noogo. Bala, koom na n pusga we-raoogẽ, la ko-soay na n zoee zĩ-koɛɛngã pʋga.

⁷ Rasempʋɩɩg na n lebga bãoogo, la tẽn-koɛɛng na n lebga ko-budum zĩiga. Zĩig ning sẽn dag n yaa we-baas gãag zĩigã, a na n lebga tãnwĩis ne rudum zĩiga.

⁸ B na n tuka so-kõodr beenẽ, n pʋd sorã yʋʋr tɩ ‹sor sẽn welg toore. Ned ning sẽn yaa rẽgd ka rɩkd so-kãng ye. So-kãng yaa sẽn tũud-b yẽnda wã yĩnga, la yalembã sã n dɩk so-kãnga, b ka na n menem ye.

⁹ Gɩgmã ka na n leb n zĩnd so-kãng zug ye. Rũm-toos ka na n wa so-kãng pʋg ye, b kõn tol n leb n yãnd bãmb beenẽ ye. Yaa neb nins sẽn paam fãagrã bal n na n kẽn beenẽ.

¹⁰ Woto, Sẽn-Ka-Saab sẽn yols-b rãmbã na n lebg n waame. Bãmb na n lebg n waa Sɩyõ ne sũ-noog kaasgo. Bãmb nensã na n pɩla ne sũ-noog wakat sẽn kõn sa. Kɩdeng ne sũ-noog na n wa sega bãmba, la sũ-pa-noaang ne sidgr na n zoe n baoo zĩiga.»