A Ezayi 32 - WẼNNAAM SEBRE 2014

Tɩrlem dĩmã naam

¹ Dẽ, rĩma na n dɩɩ naamã ne tɩrlem. La nanambsã na n sooga soolmã ne zemsgo.

² Bãmb ned kam fãa na n yɩɩ wa zĩ-lilldg sobg wakate, la wa soondg zĩig sa-kẽeng wakate, bãmb na n yɩɩ wa ko-soay sẽn zãgsd zĩig sẽn kʋɩ, la wa pĩ-kãseng maasem sẽn buiid tẽn-gãong sẽn yaa koɛɛnga.

³ Woto, neb nins sẽn ne wã nin ka na n leb n mum ye, la neb nins tʋb sẽn wʋmdã na n kell n wʋmdame.

⁴ Neb nins sẽn ka yalsd n wʋm yell n tɩg n yaool n goma na n yaas n bao n wʋma a võore. Bidsã zɛlmã na n lakame tɩ b gomd tʋʋlg-tʋʋlga la sõama.

⁵ B kõn leb n bool yalem tɩ nin-sõng ye. La b kõn bool zɩtbã tɩ nin-sõamyã ye.

⁶ Bala, yalem gomda yalem goamã, t'a sũurã tagsd wẽng maanego, la a maanda tʋʋm-dẽgdo, n gomd n paoogd Sẽn-Ka-Saabo. Yẽnda basda kom sẽn tar b rãmbã tɩ b gãe kom, la a mongd ko-yũud sẽn tar-b rãmbã koom.

⁷ Zãmb soab zab-teed yaa sɩlem-wẽnse. Yẽnda saagda sɩlem saagr n dat n yag zĩrẽ n sãam nimbãan-nebã yelle, baa ne naong rãmb nins sẽn be b bʋʋm zugã.

⁸ La nin-sõng saagda saag-sõmyã, la a ka basd saag-sõmyã tɩ vaal ye.

Keoogr Zeruzalɛm pagbã yĩnga

⁹ Pagb nins sẽn sek b mensã, kelg-y maam! Kom-pugli nins sẽn nand b mensã, yok-y y tʋb n kelg mam koɛɛgã!

¹⁰ Ka ne yʋʋmd la rasem bilf sẽn wate, yãmb sẽn nand y mengã, y na n digame. Bala, reezẽ wobr na n sɛɛme, la tigsg kõn leb n zĩnd ye.

¹¹ Yãmb a nand-m-mens rãmba, zoe-y rabeem! Yãmb a nand-m-mens rãmba, rig-y ne rabeem! Yees-y y futã n bas y zaala, n dɩk bot n sẽgen y sɛɛga!

¹² B yãbdame n wiisdẽ n pĩisd y yãad pʋ-sõama wã yĩnga, la reezẽ tɩɩsã sẽn womdã yĩnga.

¹³ B yãbd n wiisda gõosã ne gõpayãndsã sẽn yit mam nebã tẽn-gãongã zugã yĩnga. B yãbd n wiisda tẽng ning sẽn maand sũ-noog ne a zags nins fãa sẽn dag n kɩdemdã yĩnga.

¹⁴ Bala, b basa na-yirã, b basa tẽng ning sẽn dag n pid ne nebã, Ofɛll ne gãosgã na n lebga bogd wakat fãa yĩnga. Bãmb na n lebga we-bõens ne rũms wãbneg zĩiga.

¹⁵ Na n yɩɩ woto hal n tãag Sẽn-Ka-Saab sɩɩgã sẽn na n yi yĩngr n sig tõnd zugu, tɩ we-raoog lebg zẽed zĩiga, tɩ zẽed zĩig pag wa kãgre.

¹⁶ Dẽ, zemsg na n zĩnda we-raoogẽ wã, la tɩrlem na n zĩnda zẽedã zĩigẽ.

¹⁷ Tɩrlmã tʋʋmd na n yɩɩ vɩ-bãane, la tɩrlmã tʋʋmd biis yaa yam-gãnega, la vɩ-bãan wakat sẽn ka sɛt yĩnga.

¹⁸ Mam nebã na n zĩnda vɩ-bãan zĩig pʋga, n vɩɩmd rot sẽn tar gũudum pʋga, n zĩnd zĩis sẽn tar vʋʋsgo, la yĩn-maasem pʋga.

¹⁹ La sapɩlem n na n sãam kãgrã, la tẽngã na n lʋɩɩ tẽng zãnga.

²⁰ Yãmb na n paama sũ-noogo, yãmb na n bʋda koom sẽn be zĩig ning fãa, la yãmb na n basa y niigã ne y bõensã n ka loe ye.