A Ezayi 30 - WẼNNAAM SEBRE 2014

Manesem sẽn ka noom Sẽn-Ka-Saabo

¹ Sẽn-Ka-Saab yetame yaa: «Kom-tõtsã na n paama toogo! Bãmb maanda yam-yãkr sẽn ka yit mam nengẽ ye. Bãmb maanda kaool mam sẽn ka yeel tɩ b maane, n paasd bãmb yel-wẽnã waooglem.

² Bãmb kẽngda Ezɩpt n ka yals n sok maam ye, n na n tɩ kẽ Faarõ pãng zĩigẽ wã n soonde. La b baooda zĩ-soalgdg Ezɩpt tẽnga.

³ Faarõ pãng zĩigã na n wẽneg n yɩɩ yãmb yãnde. La zĩ-soalgdg ning y sẽn baood Ezɩpt tẽngã na yɩ y paoogre.

⁴ Bãmb nanambsã zoe n bee Soan, tɩ b koe-toagsdbã zoe n ta Haneese.

⁵ Bãmb fãa na n dɩɩ yãnd buud ning sẽn ka tõe n sõng bãmbã yĩnga, buud ning sẽn ka tõe n wa sõng-ba, la sẽn ka tõe n wa kõ-b sõngrã, bu-kãng na n yɩ bãmb yãnd la b paoogre.»

B keoogda sẽn teeg-b Ezɩptã

⁶ Sɩbgr koɛɛg Negɛɛv we-rũmsã yĩnga. Bãmb dɩka b arzegs n zɩlg b bõense, la b rɩk b paoong n zɩlg b yʋgma, n na n pɩʋʋg tẽng ning sẽn tar sũ-sãang la yel-pakrã, zĩig ning gɩgem-yãang ne gɩgem-daoog sẽn yitẽ wã, la ruruug ne wag-toaag sẽn yɩgd n yitẽ wã, n na n tɩ kõ neb sẽn ka na n tol n yɩ sõngr bãmb yĩngã!

⁷ Bala, Ezɩpt tẽng sõngrã yaa zaalem la vɩʋʋgo. Rẽ n kɩt tɩ mam boond tẽn-kãng tɩ ‹Rahaab sẽn ka maand bũmbu.›

Buud sẽn ka rat n kelge

⁸ Moasã, kẽng n gʋls bõn-kãngã wals zut bãmb nifẽ, la f gʋls-a sebr pʋga, tɩ wakat sẽn wate, bɩ bõn-kãng yɩ kaset wakat fãa.

⁹ Bala, bãmb yaa nin-tõtse, b yaa zĩrẽ-be-neb kamba, n yaa neb sẽn ka rat n kelg Sẽn-Ka-Saab tõogã ye.

¹⁰ Bãmb yeta yãtbã yaa: «Bɩ y ra leb n paam pĩnd-n-bãngr goam ye!» La b yet sẽn paamd-b vẽnegrã yaa: «Da leb-y n paam-y vẽnegr sẽn zems tõnd yĩng ye. Gom-y ne tõnd gom-noodo, la y paam vẽnegr sẽn ka sɩd ye!

¹¹ Bʋdg-y n bas-y sorã, bʋdg-y n bas-y so-bukã, Da leb-y n gom-y ne tõnd Israyɛll Pʋ-Peelem-Soab a Wẽnnaam yell ye!»

¹² Rẽ kɩtame tɩ Israyɛll Pʋ-Peelem-Soab a Wẽnnaam yetẽ yaa: «Yãmb sẽn zãgs gom-kãngã wã yĩnga, la yãmb sẽn dɩk y teegrã n teeg y pãngã ne y yel-kɛgã yĩnga, n dɩk bãmb tɩ lebg yãmb bõn-tɛɛgdgã,

¹³ kong-kãng na n lebga wa võor sẽn be lal-zãonglg sẽn kɩll n dat n lʋɩ zugu, la a na n lʋɩɩ tao-tao wakat a yembr pʋgẽ.

¹⁴ A na n wãa zõg-zõg wa yagb rʋko. A na n zõgsame n lebg peese, la b ka na n bas-a t'a põs ye. A pedsã ka na n kell tɩ sek tall n mok bugum bug-toaalgẽ, wall b tall n tɩ toog koom bulgẽ ye.»

Kɩs sɩd sẽn wat ne fãagre

¹⁵ Bala, Sẽn-Ka-Saab sẽn yaa Israyɛll Pʋ-Peelem-Soab a Wẽnnaam yetame: «Yaa yãmb sẽn na n tek yam n zĩnd bãane, la yãmb na n paam fãagre, yaa vɩ-bãan ne kɩs sɩd pʋg la yãmb na n paam pãnga. La yãmb ka tʋlg bõn-kãng ye!»

¹⁶ Yãmb yetame: «Ayo! Tõnd na n zomba wiid n zoe!» Yãmb sɩd na n zomba wiid n zoe! Yãmb yetame: «Tõnd na n zomba wed-tʋʋls n zoe!» Rẽ kɩtame tɩ sẽn digd-b yãmbã na n zoe ne tʋʋlem.

¹⁷ Nin-yend bala, bɛɛbã nin-yend na n tãsa bãmb neb tusr tɩ b zoe. Bãmb neb a nu sã n tãs yãmba, yãmb na n zoeeme. Yãmb na n zoeeme hal n tɩ yals wa tãb-kaoor sẽn lugl tãng zugu, la wa tãb-kaoor sẽn be kunkubr zugu.

Sẽn-Ka-Saab sẽn ningd b nebã barka

¹⁸ Rẽ kɩtame tɩ Sẽn-Ka-Saab gũud wakat n na n ning yãmb barka, rẽ n kɩte, tɩ b na n yik n zoe yãmb nimbãanega. Bala, Sẽn-Ka-Saab yaa Wẽnnaam sẽn yaa bʋ-tɩrg soaba. Bark bee neb nins fãa sẽn tẽed bãmbã zugu!

¹⁹ N-yẽe! Sɩyõ nebã, yãmb dãmb fãa sẽn be Zeruzalɛm, yãmb ka na n leb n yãb yɛs ye! Yãmb sã n kelme, b na n wʋmame, la b na n zoee yãmb nimbãanega. Bãmb sã n wʋm yãmb kelemsã bala, b na n leoka yãmba.

²⁰ Zu-soabã na n kõ-y-la rɩɩb y yel-pakr wakate, la b kõ yãmb koom y namsg pʋga. Yãmb Karen-saambã kõn leb n zãag n bas yãmb ye. Yãmb meng nin na n yãnda y Karen-saambã.

²¹ Yãmb sã n dabd goabg bɩ rɩtgo, yãmb tʋbr na n wʋma koe-kãngã y poorẽ sẽn yete: «ad sorã, tu-y-yã-a.»

²² Ges-y wanzuri wã b sẽn bolg yãmb wẽn-naandsã wa bõn-dẽgdo, la y ges sãnemã b sẽn bolg yãmb wẽn-naandsã b sẽn maan ne kutã wa bõn-dẽgdo. Yãmb tog n fãeega b pedsã wa bõn-dẽgdo. Yeel-b tɩ b yi kaanẽ n looge.

²³ Sẽn-Ka-Saab na n kɩtame tɩ saag ni bõn-buudã yãmb sẽn bʋd tẽn-gãongã zugã yĩnga. La tẽn-gãongã sẽn na n kõ yãmb rɩɩb ninsã na n yɩɩ wʋsgo, la rɩ-noodo. Badaare, yãmb rũmsã na n tɩ wãba zĩ-yalemsẽ.

²⁴ Niigã ne bõens nins sẽn kood yãmb pʋtẽ wã na n paama yamd sẽn ning yamsem, na n yɩɩ yamd b sẽn yelg ne kaorgo.

²⁵ Kʋʋbã daar sã n ta tɩ gãsdã siigdẽ, ko-soay ne ko-zoetem n na n zĩnd tãn-lug-lugã ne kunkub-zãonglsã zutu.

²⁶ Daar ning Sẽn-Ka-Saab sẽn na n tɩp b nebã poglgã, la b maag b sẽn dag n pãb bãmbã noadã, kiuugã vẽenem na n yɩɩ wa wĩntoog vẽenem, la wĩntoogã vẽenem na n paasa naoor a yopoe wa rasem a yopoe vẽenem.

Sẽn-Ka-Saab sɩbga Asiiri

²⁷ Ade, Sẽn-Ka-Saab yʋʋrã yita zĩ-zãrg n watẽ. Bãmb sũ-yikrã yaa kãseng n wat ne toogo. Bãmb noorã pida ne sũ-yikri, la b zelemdã yaa wa bugum sẽn dɩta.

²⁸ Bãmb vʋʋsmã yaa wa koom sẽn zoet ne pãng n limd n tat kokoayã. Bãmb na n goo buud toay-toayã ne sũ-sãang goaadga. La b ning tudgr salbr nebã noyã pʋse.

²⁹ Yãmb na n yɩɩla wa b sẽn yɩɩnd tigr daar yʋngo, yãmb na n maana sũ-noog wa ned sẽn peebd wɩɩg la a kẽnda, n dabd Sẽn-Ka-Saab tãngẽ wã, n dabd Israyɛll pĩigẽ wã.

³⁰ Sẽn-Ka-Saab na n kɩtame tɩ b koɛɛg sãd ne pãnga, la b na n wilga b kangã sẽn na n wẽ ne sũ-yik-kãsenga, la ne bug-witim sẽn dɩta, ne sa-kẽenga la sob-kãseng sẽn fẽrgd sapɩlma.

³¹ Sẽn-Ka-Saab koɛɛgã rãamd sã n yi, rabeem na n yõka Asiiri nebã. Sẽn-Ka-Saab na n wẽe bãmb ne b rasaarã.

³² Wakat ning fãa Sẽn-Ka-Saab sẽn yãk yam n na n wẽ bãmbã, b na n wʋma gãngãoong ne pɛndg rãamde. Sẽn-Ka-Saab na n zẽka b kangã n zab ne-ba.

³³ Bala, b zoe n segla wʋngã n sɛ. B vigla wʋngã rĩmã yĩnga, wʋngã zulmame, a yalmame. Yẽnda wʋngã pida ne bugum la raad wʋsgo. Sẽn-Ka-Saab vʋʋsmã rɩt-a-la wa kidbr ko-soogo.