A Ezayi 3 - WẼNNAAM SEBRE 2014

B na n kaoo Zʋʋda ne Zeruzalɛm bʋʋdo

¹ N-yẽe! Sẽn-Ka-Saab sẽn yaa Zu-soaba, n yaa Saasẽ-Pãng-Soabã na n yiisa bõn-teegds nins fãa Zeruzalɛm ne Zʋʋda sẽn teegã. Bãmb na n yiisa rɩɩbã ne koomã fãa.

² Bãmb na n yiisa gãndaoogã ne tãb-biigã la bʋ-kaoodã ne Wẽnnaam no-rɛɛsã, ne bagã la kãsmã,

³ ne tãb-biis pis-nunu naabã la nin-kãsengã, ne sagendã, la yam soabã ne tɩ-rɩtã.

⁴ Mam na n kɩtame tɩ kom-bãooneg yɩ bãmb nanambse, la m kɩt tɩ yãas soog bãmba.

⁵ Nebã sʋka, nebã na n maana taab pãnga. Bi-bilf na n zaba ne nin-kẽema, nin-yaalg na n zaba ne nin-kãsenga.

⁶ Hal tɩ ned gãd a saam-biig a ba zakẽ n yeele: «Foom n tar kasaabo, foom n na n yɩ tõnd naab n soog raboogã.»

⁷ Badaare, nin-kãng me na n kelmame n yeele: «Mam ka logtore, m ka tar dɩɩb m yiri, la m ka tar kasaab ye. Da maan-y maam tɩ m yɩ y naab ye.»

⁸ Ade, Zeruzalɛm lagsdame, la Zʋʋda sirgdame. Bala, bãmb goamã ne bãmb tʋʋmã kɩɩsda Sẽn-Ka-Saabo. La bãmb paoogda Sẽn-Ka-Saab ziirã.

⁹ Bãmb nensã gãneng kɩta kaseto, tɩ bãmb ka zems ye. Bãmb sẽn maand b yel-wẽnã wa Sodom nebã sẽn dag n maandã, n ka solgdẽ wã yĩnga. Ad yaa toog n na n paam-ba! Bala, bãmb n segl to-kãng b mens yĩnga.

¹⁰ Yeel-y tɩ bũmb fãa na n yɩɩ neer nin-tɩrg yĩnga, bala, yẽnda na n dɩɩ a tʋʋmã yõodo.

¹¹ Nin-wẽng na n paama toogo! Ka na n yɩ sõama yẽnda yĩng ye. Bala, yẽnda na n deega a nus tʋʋmã yaoodo.

¹² Kom-bãooneg bal n tar mam nebã n namsdẽ, la yaa pagb n so bãmba. Mam nebã, yãmbã tɛtbã kẽesda yãmb moogo, bãmb menesda sor ning yãmb sẽn tũudã.

¹³ Sẽn-Ka-Saab yikame n na n bool bʋʋdo, bãmb yikame n na n kao nebã bʋʋdo.

¹⁴ Sẽn-Ka-Saab na n bʋʋ ne b nebã kãsem-dãmba, la ne b nanambsã n yeele: «Yãmb sãama reezẽ tɩɩs pʋto! Yãmb zɛɛ naong rãmb teed n pids y roto.

¹⁵ Bõe yĩng tɩ yãmb wõrd mam nebã? Bõe yĩng tɩ y paoogd naong rãmbã? Yaa maam a Zu-soab a Sẽn-Ka-Saab n yeele.»

Sɩyõ pagbã bʋʋdo

¹⁶ Sẽn-Ka-Saab yetame yaa: «Sɩyõ kom-pugli wã sẽn yaa tɩtaam dãmbã yĩnga, bãmb sẽn nak b nens yĩngrã yĩnga, bãmb sẽn nagd ne b ninã yĩnga, la b sẽn kẽnd n tĩmsd b nao tɩ b buglã maand bʋʋrã yĩnga,

¹⁷ Sẽn-Ka-Saab na n kɩtame tɩ Sɩyõ kom-pugli wã yɩ zu-kõodo. La b kɩt tɩ b rĩy lebg koɛɛla.»

¹⁸ Badaare, Sẽn-Ka-Saab na n yãgsa fan-teedã fãa: yaa naoã buglã, zut gãmba wã ne pɛɛm sẽn send zutã,

¹⁹ b tʋblondã ne b nug-zũyã ne pɛɛlã b sẽn lut b nensã,

²⁰ b zu-vindsã ne b kalembãensã sẽn be b naoẽ wã, la b yãgs bãmb sɛɛg kĩnkĩndi wã ne b parfẽ wã tʋgdã, la b se-gãnã,

²¹ b nugbĩnsã ne nugbĩnsã b sẽn ning yõyã.

²² Sẽn-Ka-Saab na n yeesa bãmb tigã fut ne b fu-bɛdã, la b yees b fu-yer-bɛdã, la b rees b nusẽ kordã.

²³ Sẽn-Ka-Saab na n yiisa b nen-getsã ne b fu-faasensã la b peen-teegdsã ne b bãg-paasã.

²⁴ Bõn-põosg yũug n na n deeg parfẽ-rãmb sẽn tar yũ-noog zĩiga, wĩy n na n deeg sɛɛg sẽbds zĩiga. Zu-koɛɛl n na n deeg zut sẽn pãnem zĩiga, bot na n deega nagem fu-yer-bɛd zĩiga. Bãnd sẽn ningd-b yãnd n na deeg b neermã zĩiga.

²⁵ Fo raopã na n paa tãpẽ, la fo gãndaadã na n paa zabrẽ.

²⁶ Zeruzalɛm tẽngã noy na n pida ne yãbr la wiisgu. Yẽnda nebã kaalem yĩnga, a na n zĩnda tomẽ n yãbe.