A Ezayi 29 - WẼNNAAM SEBRE 2014

Zeruzalɛm paama fãagre

¹ Ariyɛlle, Ariyɛlle, tẽng ning pʋg a Davɩɩd sẽn tilg a tãb-sikã, fo na n paama toogo. Yʋʋmd loogdame tɩ yʋʋmd a to wa, bas-y tɩ tigã watẽ la b loogdẽ.

² Mam na n namsa Zeruzalɛm, tɩ lebg sidgr la wõosgo. La tẽngã na n lebga maoong kʋʋb bug-toaalg ne maam.

³ Mam na n tilga m tãb-sikã n gũbg foom. Mam na n gɩda foom ne tãb-biisi, la m zam tom-dʋy n zab ne foom.

⁴ B na n sika foom tɩ f be tẽng n gomda. Fo goamã ka leb n zẽkd n yɩɩd wubsg ye. Fo koɛɛgã rãamd na n yita wa kɩɩm koɛɛg sẽn walemde, la fo na n paa tẽng tomẽ n walemdẽ.

⁵ Fo bɛɛbã sẽn yaa wʋsgã sõor na n yɩɩ wa tom-bãanega. Nin-bãmbã sẽn yaa nin-toosã na n yɩɩ wa wudg sẽn zẽkda. La tao-tao bala, wakat yɛng pʋgẽ,

⁶ Saasẽ-Pãng-Soabã na n waa ne sa-kelemse, la tẽn-digimdgu, la bʋr-kãsenga, ne seb-kãsenga, la sa-kẽenga, la ne bug-witim sẽn dɩta.

⁷ Zãmsd sẽn yaa to-to wã, la ned sẽn paam vẽnegr to-to yʋngã, neb wʋsg nins sẽn zabd ne Zeruzalɛmã me na n yɩ a woto. Yaa neb nins fãa sẽn na n zab ne-a, n sãam a pãng zĩisã n baood n nams-a wã.

⁸ Dẽ, wa kom sẽn tar ned t'a zãms n dɩtẽ wã, n yaool n nek n mik t'a pʋg yaa vɩʋʋgã, la ko-yũud sẽn tar ned t'a zãms n yũud koomã, n wa nek n mik t'a yɛɛme t'a koees yaa koɛɛngã, a na n yɩɩ woto me ne buud toay-toay wʋsgã sẽn na n zab ne Sɩyõ tãngã.

Buud sẽn ka wʋmda

⁹ Kell-y n pa-y yɛɛsg pʋg n kaoose! Mum-y y ninã n lebg zoense! Bãmb nens yilimdame la b yaool n ka yũ reezẽ rãam ye. Bãmb lengdame la b yaool ka yũ rã-toaag ye.

¹⁰ Bala, Sẽn-Ka-Saab lobga yãmb gõe-kãseng pʋga, bãmb muma yãmb a no-rɛɛsdbã nini, la b pil yãmb a yãtbã zut ne peen-lilli.

¹¹ Ne yãmba, b sẽn vẽneg yel-kãensã fãa wã wẽnda wa sebr b sẽn gʋls goam a pʋgẽ n yaool n sog-a, n dɩk-a n kõ ned sẽn mi kaorengo, n yeel-a: «M kotame tɩ f karem sẽn gʋlsã,» t'a leoke: «Mam ka tõe n karm-a ye, bala, b sog-a lame.»

¹² Wall wẽnda wa b sẽn dɩk sebr n kõ ned sẽn ka mi kaorengo, n yaool n yeel-a: «M kotame tɩ f karem sebrã!» T'a leoke: «Mam ka mi kaoreng ye.»

¹³ Zu-soabã yetame: «Nin-bãmbã me sã n kolg maam, b waoogda maam ne noor bala, la b sũyã zãra ne maam, bãmb sẽn zoet maamã yaa zãmsg b sẽn deeg ninsaalb nengẽ bala.

¹⁴ Rẽ n kɩte, tɩ mam na n kell n maan bõn-bãn tɩ yɩ lingr ne lingr nin-bãmbã yĩnga. Yam-dãmbã yamã na n sɛɛme, la bãngdbã bãngr na n zoe n baoo zĩig n solge.»

¹⁵ Toog na n paama neb nins sẽn solgd b mens n na n zãag ne Sẽn-Ka-Saabã, sẽn na n yɩl n solg b saagrã! Bãmb maanda b tʋʋmã likẽ, la b yetẽ: «Ãnda n ne tõndo? Ãnda soab n mi tõnd sẽn maandã?»

¹⁶ Yãmb sẽn maandã yaa lebende! A zemsame tɩ b ges yagbã wa yagd bɩ? Bũmb tõe n yeela a naandã tɩ ka yẽnda n naan-a sɩda? Rʋk tõe n yeela sẽn yaga yẽnda wã t'a ka tar bãngre?

Yɛla sẽn na n wa tek to-to

¹⁷ Yãmb ka mi tɩ keta bilf bala, tɩ Libã tek n lebg tɩɩs zĩiga, tɩ b geelg tɩɩs zĩigã wa kãgre.

¹⁸ Badaare, wʋms na n wʋma sebrã goamã. Zoens nin na n pukame tɩ b yi lik ne lik bida pʋg n neẽ.

¹⁹ Sik-m-mens rãmbã na n paama sũ-no-kãseng Sẽn-Ka-Saab pʋga, la sẽn yaa-b naong rãmbã n tɩ yɩɩd ninsaalbã sʋkã na n kɩdma Israyɛll Pʋ-Peelem-Soabã yĩnga.

²⁰ Bala, nin-toaag ka na n leb n zĩnd ye. La wẽnem soabã na n menemame, b na n menesa neb nins fãa sẽn dag n wũg n dat n maan wẽngã.

²¹ Yaa neb nins sẽn dag n balgd nebã bʋʋd zĩigẽ, la b bẽt bʋ-kaoodbã tẽngã noorã, n kɩtdẽ tɩ b paalgd bʋʋm soab zaalmã.

²² Bõn-kãng yĩnga, Sẽn-Ka-Saab sẽn fãag a Abrahaamã yeta a Zakoob yagensã yaa: «Moasã, yãnd kõn leb n yõk a Zakoob yagensã ye. Bãmb neng kõn tol n leb n sulg ye.

²³ Bala, bãmb kambã sã n yãnd mam nus tʋʋm nins mam sẽn maan bãmb sʋkã, bãmb na n waooga mam yʋʋrã. Bãmb na n waooga a Zakoob Pʋ-Peelem-Soaba, b na n zoee Israyɛll Wẽnnaamã.

²⁴ Neb nins yam sẽn dag n menema na n paama bãngre, la sẽn dag n yẽgemd-bã na n deega zãmsgo.»