A Ezayi 27 - WẼNNAAM SEBRE 2014

B tõoga parwẽndã

¹ Badaare, Sẽn-Ka-Saab na n dɩka b zabr sʋ-bedrã sẽn dɩte, la sẽn tar pãngã, n sɩbg parwẽndã sẽn yaa wag-zoɛtgã, parwẽndã sẽn yaa wag-gõdem-gõdmã, la b na n kʋʋ wag-bɛɛgã sẽn be ko-kãsengẽ wã.

² Badaare, pʋd-y yɩɩll reezẽ tɩɩg sẽn kõt reezẽ-rã-noogã yĩnga.

³ Maam a Sẽn-Ka-Saab n yaa a gũuda, mam zãgsda yẽnda koom wakat fãa. Mam gũuda yẽnda wĩndg la yʋngo, tɩ b ra wa n maan-a bũmb ye.

⁴ Mam sũur ka leb n puud ne yẽnda ye. Gõpayãnds ne gõos sã n be beenẽ, mam na n võ-b lame, la mam na n ninga b fãa bugum.

⁵ Bũmb sẽn be yaa tɩ b wa soond mam nengẽ, yaa tɩ b bao vɩ-bãan ne maam, yaa tɩ b bao tɩ vɩɩmd bãan ne maam!

⁶ Wakat sẽn wate, a Zakoob yagensã na n kɩɩ yẽga, Israyɛll buudã na n pusa yagense, la a na n womame t'a biisã pid dũniyã.

⁷ Rẽ yĩnga, Sẽn-Ka-Saab wẽ b nebã wa b sẽn wẽ neb nins sẽn dag n pãbd bãmbã bɩ? Sẽn-Ka-Saab kʋʋ bãmb nebã wa b sẽn kʋ neb nins sẽn dag n kʋʋd bãmb nebã bɩ?

⁸ Yãmb kaoo bãmb bʋʋdo, n tus-ba, n dig-b tɩ b looge. Bãmb fʋʋs-b-la ne sob-kãseng n dig-ba, yaa yaang sob-kẽeng sẽn yik daar a yembr n dɩk-ba.

⁹ Yaa woto n na n kɩt t'a Zakoob yagensã paam b kongrã sugri. Ad b sẽn na n paam b yel-wẽnã sugrã sẽn na n wa ne bũmb ninga: Sẽn-Ka-Saab na n kɩtame tɩ tẽn-kugã kug fãa lebg zom wa b sẽn wer goore. Aseera ra-lugdsã ne wisd yõogr zĩisã ka na n leb n yals ye.

¹⁰ Bala, tẽng ning sẽn tar pãngã lebga zĩ-vɩʋʋgo, yaa zĩig b sẽn base, t'a lebg wa we-raoogo. Nag-bi wã wat n wãbda beenẽ, la b gãe beenẽ n sɛɛsd tɩɩsã vãado.

¹¹ Wilã sã n kʋɩ, b kaood-b lame. La pagbã wat n ning-b-la bugum. Bala, bãmb yaa neb sẽn ka mi võor ye. Rẽ kɩtame tɩ b naandã ka zoe bãmb nimbãaneg ye. Sẽn naan-a bãmbã ka paam nimbãan-zoeer b yĩng ye.

¹² Badaare, Sẽn-Ka-Saab na n miima tɩɩsã, sẽn sɩng ne Efrat kʋɩlgã n tɩ tãag Ezɩpt ko-soogã. La b na n wʋka yãmb a Israyɛll nebã yembr-yembre!

¹³ Badaare, b na n peeba baor-bedre, dẽ, neb nins sẽn dag n menem n be Asiiri tẽngã, ne neb nins sẽn sãeeg n be Ezɩpt tẽngã na n waame. Bãmb na n wõgemda Sẽn-Ka-Saab taoore, tãn-sõngã sẽn be Zeruzalɛmã zugu.