A Ezayi 26 - WẼNNAAM SEBRE 2014

Yɩɩlle, Sẽn-Ka-Saab sõngrã yĩnga

¹ Badaare, b na n yɩɩla Zʋʋda tẽngã pʋg n yeele: «Tõnd tara tẽng sẽn tar pãnga. Sẽn-Ka-Saab maana lalg ne pãng zĩig n na n fãag tõndo.

² Pak-y kʋɩlemsã tɩ buud ning sẽn yaa tɩrg n maand sɩdã kẽ.

³ Ned ning yam sẽn ka yuusdã, yãmb kõta a soab vɩ-bãane. Yãmb kõt-a-la vɩ-bãan a sẽn dɩk a teegrã n teeg yãmbã yĩnga.

⁴ Rɩk-y y teegrã n teeg Sẽn-Ka-Saab wakat fãa. Bala, Sẽn-Ka-Saab bal n yaa pĩig kugr wakat fãa.

⁵ Bãmb sika neb nins sẽn dag n be tãn-lug-lug zugã. Bãmb n lub tẽng ning sẽn dag n be tãng zugã. Bãmb lub-a-la tẽnga, bãmb lub-a-la tomẽ.

⁶ B taba yẽnda ne naoã. Naong rãmbã taba yẽnda ne b nao. Nimbãan-nebã na n taba yẽnda n looge.»

Yaoolem wakat pʋʋsgo

⁷ Tɩrlem yaa nin-tɩrg sore. Yãmb sẽn yaa tɩrlem soabã, yãmb manega nin-tɩrg sore.

⁸ Sẽn-Ka-Saabo, yãmb tõogã sẽn tuk sor ningã zugu, tõnd maanda tẽeb ne yãmba. Tõnd sẽn dat fãa yaa tɩ bool yãmb yʋʋrã.

⁹ N-yẽe! Yʋngo, mam data yãmba, mam sũ-zulmã pʋga, mam baooda yãmba. Bala, yãmb bʋ-kaoorã sã n wa maand a tʋʋmd dũniyã zugu, dũniyã neb zãmsda tɩrlem.

¹⁰ B sã n zoe nin-wẽng nimbãanega, a ka zãmsd tɩrlem maaneg ye. Yẽnda maanda wẽng tɩrlem tẽngã pʋga, la a toog ka be ne Sẽn-Ka-Saab naamã ziir ye.

¹¹ Sẽn-Ka-Saabo, yãmb nugã zãntame hal tɩ bãmb ka ne-a ye. Bãmb na n yãnda yãmb sẽn tar nonglem-kãseng ning y nebã yĩngã, tɩ bõn-kãng yãnd yõk-ba. Woto, bugum n na n dɩ yãmb bɛɛbã.

¹² Sẽn-Ka-Saabo, yãmb vigla vɩ-bãan tõnd yĩnga. Sɩd me, tʋʋm nins fãa tõnd sẽn maanã, yaa yãmb n maand-b n kõt tõndo.

¹³ Sẽn-Ka-Saab sẽn yaa tõnd Wẽnnaam, zu-soben-dãmb a taab sẽn ka yãmb sooga tõndo, la yaa yãmb y yembr yʋʋrã bal la tõnd ket n boondẽ.

¹⁴ Zu-soben-bãmb kiime n ka na n leb n vʋʋg ye. Bãmb lebga wa maasem bala, b ka na n leb n yik ye. Sɩda, yãmb kẽesa y toog n sãam bãmba, yãmb menesa bũmb ning sẽn tõe n kɩt tɩ b tẽeg b yellã!

¹⁵ Sẽn-Ka-Saabo, yãmb paasa y nebã sõore, yãmb fɩɩga y nebã n waoog y yʋʋrã. Yãmb yalga tẽngã todsã fãa.

¹⁶ Sẽn-Ka-Saabo, bãmb yel-pakrã pʋga, b baoo yãmba. Yãmb sẽn dems bãmbã yĩnga, b pʋʋsame n kos sugri.

¹⁷ Sẽn-Ka-Saabo, wa tʋtr-pʋg sẽn dat n dog n kũmd dogem toog to-to wã, tõnd me bee yãmb taoor n maand a woto!

¹⁸ Tõnd dɩka pʋg n nams ne rogem toogo, tõnd sẽn dogã, yaa wa sobg bal la d dog yã. Tõnd ka maan bũmb sẽn wat ne fãagr dũniyã yĩng ye, la d ka wa ne neb dũniyã pʋg ye.

¹⁹ Fo kũumã na n leb n paama vɩɩm, sẽn ki-bã na n leb n vʋʋgame. Yãmb dãmb sẽn be tẽng tomẽ wã, nek-y-yã, kaas-y ne sũ-noogo! Bala, yãmb meenemã yaa meenem sẽn kõt vẽenem. La tẽn-gãongã na n basa sẽn dag n be-b lik pʋgã tɩ b wa vẽenemẽ.

²⁰ Mam nebã, kẽng-y n tɩ kẽ-y y rotẽ, la y lebs kʋɩlemsã n pag n be pʋgẽ. Solg-y wakat bilf pʋgẽ, hal tɩ sũ-puugrã wakat looge.

²¹ Bala, Sẽn-Ka-Saab na n yi b zĩigẽ wã, n wa sɩbg dũniyã nebã b kongrã yĩnga. Tẽn-gãongã na n basa zɩɩm ning yẽnda sẽn dag n daagã tɩ puki, la a ka na n leb n tõog n solg neb nins yẽnda sẽn dag n kʋ wã ye.