A Ezayi 24 - WẼNNAAM SEBRE 2014

Yell sẽn na n paam dũniyã gill nebã

¹ Sẽn-Ka-Saab na n sãama tẽngã n kɩt t'a lebg weoogo. Bãmb na n zũndga tẽngã n sãeeg a nebã.

² Yell ning sẽn na n paam maan-kʋʋdã na n paama nin-zaalga. Yell ning sẽn na n paam zu-soabã na n paama yamba. Yell ning sẽn na n paam zu-soben-poakã na n paama yem-poaka. Yell ning sẽn na n paam koaasdã na n pama raada. Yell ning sẽn na n paam sẽn kõt-a samdã na n paama sam-soaba. Yell ning sẽn na n paam sẽn tar-b n pengdẽ wã na n paama sẽn tog n yao-a wã.

³ B sãama tẽngã zãnga, la b zɛɛ a teedã zãnga. Yaa maam a Sẽn-Ka-Saab n yeele.

⁴ Tẽnga bee sũ-sãang pʋga, a yɛɛme. Dũni gill yɛɛme n sãamdẽ. Tẽngã nin-kãsemsã me pãng sɛɛme.

⁵ Tẽngã nebã n wẽneg n sãam tẽngã. Bala, bãmb kɩɩsda tõodã, b tõdga Sẽn-Ka-Saab noyã, la b sãama kaool ning sẽn be wakat fãa wã.

⁶ Rẽ n kɩte, tɩ kãab-wẽngã sãamd tẽngã, la tẽngã nebã tog n paama sɩbgre. Bõn-kãng n kɩt tɩ bugum dɩ tẽngã nebã, la sẽn kell-bã sõor ka leb n yaa wʋsg ye.

⁷ Reezẽ rãam ka leb n wẽkdẽ ye, reezẽ tɩɩs zelgame. Neb nins fãa sẽn dag n maand sũ-noogã wẽeda siri.

⁸ Gãngãoog ka leb n maand noog ye, sũ-noog bʋrg sɛɛme, pɛndg ka leb n maand noog ye.

⁹ Neb ka leb n yũud reezẽ rãam la b yɩɩndẽ ye, rãam noor lebga toog ne rã-yũudbã.

¹⁰ Tẽng ning sẽn wã-a wã sãama zãnga. Rotã fãa pagame tɩ ned ka leb n kẽed be ye.

¹¹ Nebã yãbda tẽngã soay zutu, bala, reezẽ rãam ka leb n be ye. Sũ-noog buudã fãa loogame. B riga kɩdeng t'a yi tẽngã.

¹² Lebga sãoong bal n be tẽngã pʋga, b luba kʋɩlemsã tɩ lebg raboogo.

¹³ Bala, bũmb ning sẽn be tẽngã pʋgã, bũmb ning sẽn be nebã sʋkã, yaa wa oliiv wobr wakate, wa b sẽn wob reezẽ n loog tɩ lebg yiisgu.

Kɩdeng sẽn deng a wakate

¹⁴ Nin-bãmb zẽkda b koeese, bãmb kaasda ne sũ-noogo, sẽn be-b nin-taoorã kilsda ne sũ-noogo, Sẽn-Ka-Saab naamã yĩnga.

¹⁵ Dẽ wã, waoog-y Sẽn-Ka-Saab zĩis nins wĩndg vẽenem sẽn tãoosdã pʋgẽ, waoog-y Sẽn-Ka-Saab sẽn yaa Israyɛll Wẽnnaamã yʋʋr tẽms nins sẽn be koom sʋkã pʋgẽ!

¹⁶ Tõnd wʋmda yɩɩl sẽn yit dũniyã kɩrems fãa n yetẽ: «Bɩ tɩrlem soabã reeg ziiri!» La mam yetame: «Mam menemame! Mam menemame! Ad yaa toog mam yĩnga! Zãmb dãmbã zãmbdame. Lebga zãmbgo! Zãmb dãmbã zãmbdame.

¹⁷ Dũni-rãmba, pelen-yɩk ne boko, la gãmbr na n yõka yãmba!

¹⁸ Sẽn zoet-a n na n põs pelen-yɩkã, a na n lʋɩɩ bokã pʋga, la sẽn be-a bokã pʋg n dat n yi wã, gãmbrã n na n yõk-a. Bala, saasẽ kʋɩlems pakame, la dũniyã yẽbgr rigimdame.

¹⁹ Tẽngã maana mugnum, tẽngã wãame, tẽngã miimdame,

²⁰ tẽngã lengda wa ned sẽn yũ rãam n tɩg n lengdẽ, a kɩllda wa pʋʋg roogo. Yẽnda beegrã zɩsg-a lame, yẽnda lʋɩɩme n ka na n leb n yik ye.»

Soolem-dãmbã sɛɛbo

²¹ Badaare, Sẽn-Ka-Saab na n sɩbga saasẽ pãens rãmbã sẽn be saasẽ wã, la b na n sɩbga tẽng zug rĩm-dãmbã sẽn be tẽng zugã.

²² B na n tigma bãmb wa bi-bees n kẽes bokẽ. B na n tɩ paga bãmb bi-bees roog pʋga, la sã n wa kaoose, b na n sɩbga bãmba.

²³ Kiuugã na n paama paoogre, wĩndgã me na n paama yãnde. Bala, Saasẽ-Pãng-Soabã n yaa rĩm Sɩyõ tãngã zug Zeruzalɛm, la b ziirã pukda bãmb kãsem dãmbã taoore.