A Ezayi 22 - WẼNNAAM SEBRE 2014

Sɩbgr koɛɛg Zeruzalɛm yĩnga

¹ Sɩbgr koɛɛg vẽnegr tãng longã yĩnga. Bõe yĩng tɩ foom ne f nebã fãa zoet n dʋʋd bɛɛnd zutu,

² Fo sẽn yaa tẽng sẽn pid ne bʋrgo, la ne neb wʋsg rãamde, tẽng sẽn kɩdemd n maand sũ-noogo? Fo nebã sẽn ki wã ka zabr sʋʋg n kʋ-b ye, bãmb ka ki zabr pʋgẽ ye.

³ Fo tãb-biis nanambsã fãa naaga taab n ning tĩiga. Tãb-tãoodbã yõga bãmb n maan yembse. Zeruzalɛm, b kɩtame tɩ fo nebã fãa lebg yembse, bãmb yaool n dag n zoeeme n zãag zĩiga.

⁴ Rẽ n kɩte tɩ mam yetẽ: «Wẽnemd-y y nens n da leb n ges maam ye. Bas-y maam tɩ m yãb n wiisi. Da bao-y tɩ bels maam, Zeruzalɛm sẽn yaa mam nin-nongdsã sãoong yĩng ye.

⁵ Bala, yaa pelen-yɩk daare, bedsg daare, la sũ-sãang daare, Sẽn-Ka-Saab sẽn yaa Saasẽ-Pãng-Soaba sẽn tʋm vẽnegr tãng longã pʋgẽ, b na n pãba lalsã n lubi, la b na n kelemdame tɩ tat tãmsã n kot sõngre.

⁶ Elam boba loko. Zabr saar-dãmb sẽn pid ne neb tɩ wiid tatẽ n wate. Kɩɩr tẽng nebã yiisa b gãndã.

⁷ Zeruzalɛm, fo tãn-lond nins sẽn yaa neeb n yɩɩdã pida ne zabr saar-dãmba, la wed-rʋʋdbã yasa f tẽngã rignoorẽ n dat n zab ne-fo.

⁸ B yiisa bũmb ning sẽn dag n kogend Zʋʋda wã.» Badaare, fo wẽnemdame n teeg zab teed nins sẽn be roog ning sẽn boond tɩ ‹Libã tɩɩs roogã› pʋgã.

⁹ La yãmb tɩ mikame t'a Davɩɩd tẽngã lals wura zĩis wʋsgo. Yãmb koka koom n bĩng ko-bao-bilã pʋga,

¹⁰ yãmb sõda Zeruzalɛm dota, n pãb rot kẽer n wã n wʋk b tãndã n yẽd lalgã võyã.

¹¹ Yãmb mee ko-baoor lals a yiibã sʋka, n na n dɩk ko-bao-kʋdrã koom n ning be. La yãmb ka wẽnemd y neng n ges soab ning sẽn maan-a bõn-kãensã ye, yãmb ka ne soab ning sẽn dag n deng n naan bãmb hal daar zãrã ye.

¹² Badaare, Zu-soabã sẽn yaa Saasẽ-Pãng-Soabã boonda yãmb tɩ y wa yãb n wiisi, la y põng y zut n sẽgen boto.

¹³ La gese, yãmb bas n maanda sũ-noog n kɩdemdẽ! La y kʋʋd rũm-bɛda, la y koot rũm-bãoonego, n wãbd nemd la y yũud reezẽ rãam n yetẽ: «Bɩ d rɩ la d yũ, bala, beoogo, d na n kiime!»

¹⁴ Saasẽ-Pãng-Soabã vẽnega maam bõn-kãng n yeele: «Yãmb na n kiime n ka tol n paam sugr y kong-kãngã yĩng ye.» Maam a Zu-soabã sẽn yaa Saasẽ-Pãng-Soabã n yeele.

Keoogre, balem-naab a Sebna yĩnga

¹⁵ Ade, Zu-soabã sẽn yaa Saasẽ-Pãng-Soabã yetame: «Kẽng balem-naab a Sebna sẽn get na-yirã yellã nengẽ n tɩ yeel-a yaa:

¹⁶ Fo soo bõe ka, la fo kĩi ne ãnda ka, n wa tol n yik n tuud f yaoog ka? Ned fãa yik n tuuda a yaoog kunkubr zugu. Ned fãa yik n tuuda a vʋʋsg zĩig pĩig zugu!

¹⁷ Gese, Sẽn-Ka-Saab na n lobga foom hal yɩɩga, bãmb na n vila foom,

¹⁸ n lobg-f tɩ f bilim wa kuit-n-giling sẽn bilimd zĩ-yaleng zugu. La fo na n paa beenẽ n ki. Fo saar-dãmbã sẽn tar ziirã na n paa beenẽ. Fo sẽn yaa f zu-soabã zak yãndã yĩnga.

¹⁹ Mam na n diga foom n yiis f zĩigẽ wã. Mam na n võoga foom n yiis f tʋʋmdẽ wã.

²⁰ Badaare, mam na n boola mam tʋmtʋmd a Eliyakim sẽn yaa a Hilkiiza biigã.

²¹ Mam na n dɩka fo fuugã n yeelg yẽnda, mam na n dɩka fo sẽbdgã n sẽbg yẽnda, la m dɩk f naamã n ning a nugẽ. Yẽnda na n yɩɩ Zeruzalɛm nebã, ne Zʋʋda buudã ba.

²² Mam na n dɩka a Davɩɩd roogã kʋɩlen-bil n ning yẽnda nugẽ. Yẽnda sã n pake, ned kõn tõog n pag ye. Yẽnda sã n page, ned kõn tõog n pak ye.

²³ Mam na n kaa yẽnda wa baaf zĩig sẽn tar pãng zugu, la yẽnda na n yɩɩ wa geer sẽn tar ziir a buudã yĩnga.»

²⁴ Bũmb ning fãa sẽn yaa yẽnda buudã ziirã na n wa yagla yẽnda zugu, wil-kãsemsã ne wil-bãoonegã, baa ne te-bãoonegã fãa, hal ne sĩmsã n tɩ tãag yʋyã.

²⁵ Saasẽ-Pãng-Soabã yetame: «Badaare, b na n feooga baaf ning sẽn be zĩig ning sẽn tar pãngã zugã, b na n kɛ-a lame t'a lʋɩ, la b na n sãama zɩɩb ning sẽn dag n be yẽnda zugã. Yaa maam a Sẽn-Ka-Saab n yeele.»