A Ezayi 21 - WẼNNAAM SEBRE 2014

Sɩbgr koɛɛg Babilond yĩnga

¹ Sɩbgr koɛɛg we-raoog ning sẽn be ko-kãseng noorã yĩnga. Sãamdã yii tẽng sẽn kẽesd rabeem pʋgẽ n tũud we-raoogã n wat wa sob-kãseng sẽn pɩʋʋgd Negɛɛve.

² Ad vẽnegr sẽn yaa wẽng mam sẽn paame: Zãmb soabã zãmbdame, la sãamdã sãamdame. Elam soolem nebã, yik-y n zãb-y-yã! Gũbg-y Medi! Mam na n kɩtame tɩ sidgrã fãa sɛ.

³ Rẽ kɩtame tɩ mam põaagã bondge, toog tara maam, toog tara maam wa pag sẽn dat n doge. Bõn-kãng sãama mam sũur tɩ m ka leb n wʋmdẽ ye. Toogã kɩtame tɩ mam ninã ka leb n neẽ ye.

⁴ Mam yamã menemame, mam pɛlengã yɩkame tɩ rabeem kẽ maam. Mam sẽn dag n nong zĩ-sobdã, zĩ-sobd lebga rabeem ne maam.

⁵ B waa ne rɩɩbo, gũudbã gũudame, lebga rɩɩbo, la yũubu. Nanambse, yik-y-yã! Sõog-y gãndã kaam!

⁶ Bala, Zu-soabã goma ne maam n yeel yaa: «Kẽng n tɩ kɩt tɩ tẽn-gũudã yals a zĩigẽ, n togs a sẽn ne bũmb ningã.

⁷ Yẽnda na n yãnda saar-dãmb sẽn sog wiid sẽn yegl taab yiib-yiib n watẽ, ne bõens sẽn tong taaba, la yʋgmã sẽn tong taaba, bɩ a maan gũusgu, a gũus neere.»

⁸ Dẽ, tẽn-gũudã kelma wa gɩgemd n yeel yaa: «Zu-soaba, mam bee gãosgã zug daarã tõr wakat fãa, la mam yasa m gũubã zĩigẽ yʋngã tɛk fãa.

⁹ Ade, mam nee neb sẽn zao saar-dãmb sẽn sog wiid sẽn yegl taab yiib-yiib n watẽ!» Yẽnda leb n yeelame yaa: «A lʋɩɩme, Babilond lʋɩɩme! Bãmb luba Babilond wẽnnaam-dãmbã bõn-naands fãa tẽng tɩ b wã!»

¹⁰ Mam nebã, b pãba yãmb wa b sẽn pãbd kood zɛɛgẽ, la mam togsa yãmb bũmb ning mam sẽn wʋm Saasẽ-Pãng-Soabã sẽn yaa Israyɛll Wẽnnaamã nengẽ wã.

Sɩbgr koɛɛg Edom tẽngã yĩnga

¹¹ Sɩbgr koɛɛg Duma yĩnga. Koɛɛg n zẽkd Seyɩɩr n yet maam yaa: «Gũuda, yʋngã kibar yaa a wãna? Gũuda, yʋngã kibar yaa a wãna?»

¹² La gũuda leokame yaa: «Yibeoog watame la yʋng me watame. Yãmb sã n dat n sok bɩ y soke! Lebg-y n wa-y-yã, n-yẽe, wa-y-yã!»

Sɩbgr koɛɛg Araabi tẽngã yĩnga

¹³ Sɩbgr koɛɛg Araabi tẽngã yĩnga. Dedan neb sẽn tũud taab wʋsg n kẽnda, yãmb na n gãanda Araabi wetã pʋs yʋn-kãngã!

¹⁴ Tema tẽng nebã, wa-y ne koom n wa kõ ko-yũud sẽn tar-b rãmbã, la y yi ne rɩɩb n seg neb nins sẽn zoetã.

¹⁵ Bala, b rigda bãmb ne zabr sʋʋga, b wõoga zabr sʋʋg n pʋgd-ba, tɩ tãp rʋʋs n pʋgd bãmba. Bãmb zoet n na n põsa zabr yel-beedo.

¹⁶ Bala, ad Sẽn-Ka-Saab sẽn yeel maam: «Keta yʋʋmde, wa sẽn zems yʋʋmd tʋmtʋmd sẽn tʋmd yaood yĩngã, tɩ Kedaar ziirã zãng meneme.

¹⁷ La Kedaar tãb-biis nins sẽn yaa tãb-tãood-gãndaadã sõor na n kella bilf bala.» Maam a Sẽn-Ka-Saab sẽn yaa Israyɛll Wẽnnaamã n yeel t'a na n yɩɩ woto.