A Ezayi 18 - WẼNNAAM SEBRE 2014

Kãab-wẽng Kuus yĩnga

¹ Toog bee tẽng ning sẽn be Kuus kʋɩlgã rʋʋnd tɩ b wʋmd bõn-yɩgdɩ wã pɩgs rãamdã zugu!

² Fo sẽn tʋmd neb tɩ b kẽnd ne koom kogend sẽn maan ne tãnwĩis n pɩʋʋgd ko-kãsengã! Koe-toagsdb sẽn tʋʋle, kẽng-y buud nins neb sẽn yaa nin-wogd n tar da-sãndã nengẽ, kẽng-y neb nins b sẽn yɛɛsd hal b sɩngr wakatã nengẽ, bãmb yaa buud sẽn tar pãng n tõe n sãam fãa, la b tẽngã pɩʋʋma ne kʋɩlse.

³ Yãmb fãa sẽn be dũni zugu, yãmb dãmb sẽn be tẽng zugu, b sã n wa tilg tãb-kaoorã tãngã zugu, yãmb na n yãame. La b sã n wa peeb baorgã, yãmb na n wʋmame.

⁴ Bala, ade, Sẽn-Ka-Saab yeela maam yaa: «Mam bee m sẽn beẽ wã ne bãan n getẽ, mam yasa kɛpɩ wa wĩntoog sẽn tãoosd a vẽenemã, la wa sawaodg sẽn sikd meenem tigsg wakatã.

⁵ Dẽ, sẽn deng bõn-koaadl tigsgu, reezẽ tɩɩsã sã n wa ning puud n sɛ, puudã sã n lebg biis n mooge, b na n yosa reezẽ tɩɩsã wil-poalã ne goeto, la b yãgs-ba, n yolem tobendã.

⁶ B na n basa b fãa n kõ tãms zut yɩbrendo, ne we-rũms sẽn be tẽng zugu. Sẽoogo, beenẽ na n yɩɩ yɩbrend zĩiga, la waood wẽnde, we-rũmsã fãa na n wa zĩnda be.»

⁷ Wakat-kãnga, buud neb sẽn yaa nin-wogd n tar da-sãnde, neb b sẽn yɛɛsd hal b sɩngr wakate, buud sẽn tar pãng n tõe n sãam fãa, tɩ b tẽngã pɩʋʋm ne kʋɩlsã, na n waa ne kũun n wa kõ Saasẽ-Pãng-Soabã. B na n talla kũun-kãens n kẽng zĩig ning Saasẽ-Pãng-Soaba yʋʋrã sẽn beẽ wã, Sɩyõ tãngã zugu.