A Ezayi 14 - WẼNNAAM SEBRE 2014

Nimbãan-zoeer a Zakoob yagensã yĩnga

¹ Bala, Sẽn-Ka-Saab na n zoe a Zakoob yagensã nimbãanega, bãmb na n leb n yãka Israyɛll n kõ-b vʋʋsg b tẽngẽ wã. Sãamb n na n naag bãmb tɩ b tɩ lagem a Zakoob roogã nebã.

² Bu-zẽms n na n deeg Israyɛll nebã n tall-b n tɩ kẽes b tẽngẽ wã, la Israyɛll nebã na n sooga bãmb beenẽ Sẽn-Ka-Saab tẽn-gãongã zugu, n kɩt tɩ b yɩ yem-daado, la yem-pogse. Neb nins sẽn dag n kẽes Israyɛll nebã yembdã, Israyɛll na n kẽes-b-la yembdo, Israyɛll nebã na n sooga neb nins sẽn dag n namsd bãmbã.

Babilond dĩmã baoosgo

³ Dẽ, daar ning Sẽn-Ka-Saab sẽn na n kõ yãmb vʋʋsg y namsgã ne y toogã, la y yembdã b sẽn dag n namsd yãmbã loogr poore,

⁴ pʋd-y yɩɩll Babilond dĩmã wɛɛngẽ n yeel yaa: «Maana a wãna? Dĩm-toaagã menemame! Wuk-m-meng soabã ka leb n beẽ ye!

⁵ Sẽn-Ka-Saab kaooga nin-wẽnsã rasaare, b kaooga nanambsã naam dasaarã.

⁶ B menesa sẽn dag n pãbd-a nebã ne sũ-kãbr n ka basdẽ wã. B menesa sẽn dag n so-a buud a taabã ne sũ-yikr tɩ vʋʋsg ka beẽ wã.

⁷ Tẽngã zãng paama vʋʋsg la vɩ-bãane. Nebã kaasda ne sũ-noogo.»

⁸ Sɩprɛs tɩɩsã ne sɛɛdr tɩɩsã la Libã tɩɩsã maanda sũ-noog yẽnda wɛɛngẽ n yetẽ: «Fo sẽn lʋɩ wã tɛka, tɩ-kɛɛdbã ka leb n wat n kɛɛd tõnd ye.»

⁹ Kɩɩm-kulg sẽn be tẽngrã rigimdame n na n deeg foom f waoongã daare. Fo yĩng kɩtame tɩ b nek sẽn ki-bã, b neka dũniyã nin-kãsemsã, la b kɩt tɩ bu-zẽmsã rĩm-dãmb fãa yik b naam gɛyã zutu.

¹⁰ Bãmb fãa goma ne foom n yeel yaa: «Fo me pãngã sɛɛ wa tõndo, fo me lebga wa tõnd bala!»

¹¹ B sika foom ne f wuk-m-mengã, la f ruudsã wãagr kɩɩm-kulgu. Lebga zũnzũy n be fo gãagẽ wã, zũnzũy wã n lebg fo fu-goabga.

¹² Kayto! Ãdg sẽn yãgda, tõd-beoog ãdga, fo yii saasẽ n lʋɩ tẽnga! Fo sẽn dag n kɩt tɩ buud a taabã sakd foomã, b luba foom!

¹³ Fo rag n yetame: «Mam na n dʋʋ n taa saasẽ, mam na n zẽka m naamã geer n zʋʋg Wẽnnaam ãdsã, Mam na n zaoonda sɛk tãngã zugu, tãng ning sẽn be rɩtg hal zĩ-zãrgẽ wã.

¹⁴ Mam na n dʋʋ yĩngr hal sawatẽ, mam na n yɩɩ wa Sẽn-Ka-To.»

¹⁵ La b sika foom kɩɩm-kulgu, b sika foom bog-zulungã pʋga.

¹⁶ Neb nins sẽn na n yãnd foom na n yonga b nin n get foom. B na n maaga b meng n ges foom n yeele: «Rẽ yĩnga, ka rao-kãngã n dag n kɩtd tɩ dũniyã miimdẽ, la a kɩtdẽ tɩ soolem-dãmbã rigd ne rabeemã la?

¹⁷ Ka yẽnda n dag n kɩtd tɩ dũniyã lebgd we-raoogo, la a wãad a tẽmsã n ka basd yembsã tɩ b loogã wɛɛ?»

¹⁸ N-yẽe, buud toay-toayã rĩm-dãmb fãa gãanda b yaadẽ ne ziiri, bãmb ned kam fãa kẽ a roogẽ.

¹⁹ La foom yẽ, b loba foom yɩng n zãag f yaoogã, wa b sẽn lob tɩɩg wil-yooko, wa neb b sẽn kʋ ne zabr sʋʋg n wʋk n tɩ lob bog-zulungã kug zutu, wa kũum b sẽn tabe.

²⁰ B ka na n mum foom n naag bãmb yaoogã pʋgẽ ye. Bala, fo sãama f tẽngã, fo kʋ f nebã. B kõn tol n leb n pʋd nin-wẽnsã yʋʋr ye.

²¹ Segl-y kom-dibli wã kʋʋbo, b ba-rãmbã kongr yĩnga! Tɩ b ra tol n yik n deeg tẽngã n yãmbe, n pids dũniyã gill ne sãoong ye.

²² Maam a Saasẽ-Pãng-Soabã yetame: «Mam na n yik n zaba ne bãmba, mam na n menesa Babilond yʋʋrã, ne a nebã sẽn kellã ne a kambã la a yagensã. Maam a Sẽn-Ka-Saab n yeele.

²³ Mam na n kɩtame t'a lebg yʋgempɛl zĩiga la bãoogo, mam na n pɩɩs-a-la ne sãoong saaga. Maam a Saasẽ-Pãng-Soabã n yeele.»

Sẽn-Ka-Saab na n wãa Asiiri

²⁴ Saasẽ-Pãng-Soabã wẽename n yeele: Mam sẽn yãk yam n na maan bũmb ningã ka na n vaal ye, mam sẽn saagd n dat n maanã na n pidsame.

²⁵ Mam na n wãa Asiiri m tẽngẽ wã, mam na n tab-a-la m tãmsã zutu. B na n yiisa a yubl balgrã, la b sik a zɩɩbã sẽn be mam nebã bãgdẽ wã.

²⁶ Woto yaa saagr ning mam sẽn saagd n na n maan dũniyã gillã, yaa nug sẽn n na n zab ne soolem dãmbã fãa wã la woto.

²⁷ Saasẽ-Pãng-Soabã n maan saag-kãnga. Ãnda n tõe n gɩdg-a t'a ka pidsi? Bãmb nugã zẽkame. Ãnda n na n kok-a t'a ka wẽ?

Sɩbgr koɛɛg Filistẽ-dãmbã yĩnga

²⁸ B togsa sɩbgr koe-kãngã rĩm a Akaaz kũumã yʋʋmd n yeele:

²⁹ Filistẽ-dãmbã fãa, da-y maan-y sũ-noogo, dasaar ning b sẽn dag n tar n pãbd yãmbã sẽn kao wã yĩng ye! Bala, waafã yagensẽ wã, põeer n na n yi beenẽ, la a biigã na n yɩɩ wag-bɛɛg sẽn yɩgda.

³⁰ Dẽ, sẽn ya-b nimbãan-neb n yɩɩd fãa wã na n paam n dɩ n tɩgame, naong rãmbã na n gãee ne bãane. Mam na n kɩtame tɩ fo yagensã ki kom, ne fo neb nins sẽn na n kellã.

³¹ Rig-noore, kelme! Tẽnga, yãb n wiisi! Filistẽ-dãmbã fãa, rig-y-yã! Bala, bug-zõos n yɩt n watẽ, la ned kõn serg n bas a zĩig ye.

³² B na n leoka bu-kãngã koe-toagsdbã tɩ bõe? B leok tɩ yaa Sẽn-Ka-Saab n yẽbg Sɩyõ, tɩ bãmb nebã nimbãan-nebã na n paama zĩ-soalgdg beenẽ.