A Ezayi 13 - WẼNNAAM SEBRE 2014

Sɩbgr koɛɛg Babilond tẽngã yĩnga

¹ Woto yaa Sɩbgr koɛɛg Babilond tẽngã yĩnga. Yaa koɛɛg a Amots biig a Ezayi sẽn deege.

² Tilg-y tãb-kaoor tãn-beellã zugu, la y zẽk y koɛɛg tɩ b wʋme, n zẽk y nug n kams-b tɩ b wa tũ nin-kãsemsã rignoyẽ n kẽ.

³ Mam kõo neb nins sẽn welg toor mam yĩngã noore, mam leb n boola sũ-yikrã gãndaadã me, sẽn maand-b sũ-noog mam tõogrã yĩngã.

⁴ Bʋrg n yit tãmsã zutu, la yaa wa neb kʋʋng bʋrgo! Yaa buud toay-toayã sẽn tigim taabã bʋʋre! Saasẽ-Pãng-Soabã n tigimd b tãb-biisã zabr yĩnga.

⁵ Tãb-biisã yita tẽms sẽn be zĩ-zãrsẽ, b yita saasã kɩremsã fãa n watẽ, yaa Sẽn-Ka-Saab n wat ne b sũ-puugr zab-teedã n na n sãam tẽngã zãnga.

⁶ Yãb-y n wiis-yã, bala, Sẽn-Ka-Saab daarã kolgame. Ra-kãng wata wa sãoong sẽn yit Sẽn-Tõe-Fãa wã nengẽ.

⁷ Rẽ kɩtame tɩ nebã fãa gĩin maage, tɩ ned kam fãa raood sɛ.

⁸ Rabeem-kãseng na n yõka bãmba, toog la namsg na n paama bãmba, la bãmb na n wẽndgda wa pag sẽn kũmd dogem. Bãmb na n yɛɛsame n ges taaba, bãmb nemsã midgame.

⁹ Sẽn-Ka-Saab daarã watame, yaa to-kãseng daare, la sũ-kãbr ne sũ-yik-kãseng daare. Sẽn-Ka-Saab na n kɩtame tɩ tẽngã lebg zĩ-vɩʋʋgo, la a menes yel-wẽn-maandbã.

¹⁰ Bala, ãdsã sẽn be yĩngrã ne b sulã kõn leb n kõ b vẽenem yɛs ye. La wĩntoogã pukr wakate, a na n sobgame, la kiuugã vẽenem kõn leb n tãoos ye.

¹¹ Mam na n sɩbga ninsaalbã, wẽng ning b sẽn maanã yĩnga, la m sɩbg nin-wẽnsã b kongrã yĩnga. Mam na n kɩtame tɩ tɩtaam dãmbã wuk-m-mengã sɛ, Mam na n sika nin-toosã b zẽk-m-mengã pʋga.

¹² Mam na n kɩtame tɩ sãnem halaal yãab sẽn yaa toog to-to wã, bɩ ninsaal yãab toolem yɩɩg rẽnda. Mam na n kɩtame tɩ ninsaal yãab lebg toog wa Ofɩɩr tẽng sãnem.

¹³ Rẽ n kɩte, tɩ mam na n miim saasã, la tẽn-gãongã yẽbgr na n digimdame, Saasẽ-Pãng-Soabã sũ-kãbrã yĩnga, la b sũ-yik-kãsengã daar yĩnga.

¹⁴ Dẽ, b sẽn lingd walg t'a yɛɛs n zoet to-to wã, la wa piis sẽn ka tar ned sẽn na n tigim-bã, ned kam fãa na n lebg n kuila a nebẽ, ned kam fãa na n zoe n leba a tẽngẽ.

¹⁵ Bãmb sẽn na n paam neb nins fãa, b na n kõs-b lame n kʋ, la b na n kʋʋ neb nins b sẽn yõgã ne zabr sʋʋga.

¹⁶ B na n kʋʋ bãmb kambã n dʋʋg b nifẽ, b na n zɛ b rotã teedo, la b gãand bãmb pagbã ne pãnga.

¹⁷ Mam na n kɩtame tɩ Meed-rãmbã tɩ zab ne bãmba. Meed-rãmb ka baood wanzuri, la b toor ka ne sãnem me ye.

¹⁸ Bãmb na n tãoo kom-bɩɩsã ne b tãbdã n kʋ, la b ka na n zoe kamb sẽn nan yi b ma pʋgẽ nimbãaneg ye. Bãmb ka na n maan nimbãan-zoeer ne kom-dibli ye.

¹⁹ Sẽn-Ka-Saab na n kɩtame tɩ Babilond sẽn yaa tẽn-neer n yɩɩd tẽmsã a taabã lebg a woto. Tẽn-kãng sẽn tar ziirã yĩnga a yaa Kalde rãmbã waoog-m-meng tẽnga. A na n lebga wa Wẽnnaam sẽn dag n sãam Sodom ne Gomoor tẽmsã.

²⁰ Ned kõn tol n leb n tilg a yir Babilond tẽngã, la neb kõn leb n zĩnd a pʋgẽ zamaan woo zamaan ye. Araab-rãmbã kõn leb n tilg b fu-roog beenẽ, la pe-kɩɩmbã me kõn leb n gãneg b rũms beenẽ ye.

²¹ Beenẽ na n lebga we-rũms gãag zĩiga. Yẽnda ro-vɩɩdã na n pida ne vitu, la naneoond na n gãee beenẽ, tɩ boees yɩgd n tirsd beenẽ.

²² Kata na n yãba tẽngã na-yiyã pʋse, la we-baas na n yãba a tẽngã ro-neebã pʋse. Babilond sãoongã daar kolgdame, la a rasmã ka na n kaoos ye.