A Ezayi 1 - WẼNNAAM SEBRE 2014

A Ezayi vẽnegre

¹ Ad vẽnegr ning a Amots biig a Ezayi sẽn paame, sẽn kẽed ne Zʋʋda la Zeruzalɛm wɛɛngẽ. Yɩɩ Zʋʋda rĩm-dãmb a Oozɩyaas ne a Zotam la a Akaaz ne a Ezekɩyaas zamaanẽ.

Israyɛll nebã kɩɩsa Sẽn-Ka-Saabo

² Saasẽ kelge, dũniyã, yok f tʋbr n kelge! Bala, yaa Sẽn-Ka-Saab n gomde. Mam wuba kamba, la m zãms-ba, la b yik n kɩɩsa maam.

³ Naaf mi a soaala, la bõang mii zĩig ning yẽnda soaalã sẽn ningd yẽnda rɩɩbã. La Israyɛll ka mi baa fɩ ye, mam nebã yaa tʋb-pa-wʋmdba.

Zʋʋda tẽngã sãama zãnga

⁴ Toog bee bu-kãngã sẽn yaa yel-wẽn-maandã zugu, bãmb yaa koangdba, bãmb yaa tʋʋm-wẽns rãmba, bãmb yaa kom-wegemse! Bãmb basa Sẽn-Ka-Saabo, bãmb paooga Israyɛll Pʋ-Peelem-Soabã, bãmb wẽnemd n basa bãmba.

⁵ Yãmb sẽn ket n kɩɩsdẽ wã, y ratame tɩ b leb n wẽ yãmb zĩ-bʋgo? Zugã zãng ka tar laafɩ ye. Sũurã zãng bẽedame.

⁶ Sẽn sɩng ne nao-sɩlpamã n tãag zugã, zĩig ka leb n be sẽn tar laafɩ ye. Yaa sãmpoaga, yĩng bugbu, la noad sẽn wõsge, tɩ ned ka tɩpd-ba, wall a vil-b peende, wall a sõogd-b kaam me ye.

⁷ Yãmb tẽngã sãama zãnga. B yõoga yãmb tẽmsã bugum, sãamb wa n sãamda yãmb tẽn-gãongã y nifẽ. Yaa sãoong sẽn wẽnd sãamb sẽn wa n sãame.

⁸ Sɩyõ tẽn-neerã kell n paame n yaa wa pʋʋg roog sẽn be reezẽ tɩɩs pʋʋg pʋga. A wẽnda sẽok sẽn be kõnkõmbr pʋʋgẽ. Awẽnda wa tẽnga, bɛɛb sẽn gũbgi.

⁹ Saasẽ-Pãng-Soabã sã n dag n ka basẽ tɩ neb bilf põse, tõnd dag n na n lebgẽ-la wa Sodom tẽngã, tõnd dag n na n wẽnegẽ-la Gomoore.

Pʋʋsg sẽn yaa yel-beed Wẽnnaam nifẽ

¹⁰ Sodom tẽngã taoor dãmba, kelg-y Sẽn-Ka-Saab koɛɛga! Gomoor nebã, yok-y y tʋb n kelg tõnd Wẽnnaamã tõodo!

¹¹ Sẽn-Ka-Saab yetame: «Mam toog ka be ne yãmb maandã waooglem ye?» Mam ya n tɩga yãmb pe-raad maand sẽn yõogd bugmã ne y rũm-bɛdã kaamã. Yãmb lolsã ne y pe-bi wã la y boeesã zɩɩm ka noogd mam sũur ye.

¹² Yãmb sẽn wat n yalsd mam taoorã, ãnda n kos yãmb tɩ y tabg mam samandẽ wã?

¹³ Da-y leb-y n tall-y kũun sẽn ka yõod n wa kõ maam ye. Yãmb wisdã kũun yaa bõn-wẽng mam taoore. Yãmb wẽngã maaneg yĩnga, mam sũur ka noom ne yãmb ki-paalgã tigã, ne y vʋʋsg rayã, la ne y nebã tigindã ye.

¹⁴ Mam kisa yãmb kiu-paalsã ne y tigindã. Bãmb namsda maam, mam yamã yii bãmba.

¹⁵ Yãmb sã n zẽk y nusã n tees maam, mam mumda m nin n ka rat n yãnd yãmb ye. Baa ne yãmb sẽn pʋʋsd n yɩlemdẽ wã, mam ka kelgd ye. Yãmb nusã pida ne zɩɩm.

¹⁶ So-y koom, la y yɩlg y mense! Yiis-y tʋʋm-beedã mam taoore. Bas-y y tʋʋm-wẽnsã maanego.

¹⁷ Zãms-y tɩ maan sẽn yaa sõama. Bao-y tɩrlem, la y sõng b sẽn maand-b rãmb pãngã. Kao-y kɩɩb bʋʋd tɩrga, la y zab n sõng pʋg-kõore.

¹⁸ Sẽn-Ka-Saab yetame: «M kotame tɩ y wa tɩ d yẽs ne taaba. Baa yãmb yel-wẽnã sã n yaa miuug wa saag-pag-a-minamina, b na n lebga pɛɛlg wa lampalga. La baa b sã n yaa miuug wa monem, b na n lebga pɛɛlg wa pe-kõbdo.

¹⁹ Yãmb sã n sak n kelg maam, yãmb na n dɩɩ tẽngã bõn-sõamyã fãa.

²⁰ La yãmb sã n zãgs n kɩɩs maam, zabr sʋʋg n na n kʋ yãmba!» Maam a Sẽn-Ka-Saab meng noor n yeele.

Wẽnnaam na n yɩlga Zeruzalɛm

²¹ Maana a wãn tɩ tẽng ning sẽn dag n yaa sakdã lebg yoob tẽnga? A rag n yaa tẽng sẽn pid ne zemsgo, la tɩrlem dag n bee beenẽ, la moasã, a pida ne nin-kʋʋdba.

²² Fo wanzuri wã lebga wãyã, yãmb reezẽ rãamã pula koom.

²³ Fo nanambsã lebga kɩɩsdba, la b lebg wagda tũud-n-taase. Bãmb fãa nongame tɩ b kõt-b kũuni, la b zoet n pʋgd zãmb keoore. Bãmb ka kaood kɩɩb bʋʋd tɩrga, la pʋg-kõap yell gesg ka pak-b ye.

²⁴ Woto yĩng kɩtame tɩ Saasẽ-pãng-soabã sẽn yaa Israyɛll Wẽnnaam sẽn tar pãngã yetẽ: «Ad na n yɩɩ toogo! Mam na n maana m zabd-n-taasã wẽng n lebse, la m na n doka m sũur ne m bɛɛbã.

²⁵ Zeruzalɛm, mam na n leb n tẽega m nugã fo zugu. Mam na n ninga foom boaagẽ n yiis f rẽgdã, wa b sẽn yẽnegd kugr boaagẽ n yiisd kut n basd wãyã, wa b sẽn dɩk zẽem n pek bũmbu. Mam na n yiisa fo tʋʋm-beedã wa namdo.

²⁶ Mam na n leb n kõo foom bʋ-kaoodb wa pĩndã, la m kɩt tɩ sagendb zĩnd wa sɩngrẽ wã. Rẽ poore, b na n boola foom tɩ: tɩrlem tẽnga, la sɩd tẽnga.»

²⁷ Sɩyõ sã n kẽn zemsg pʋga, a na n paama fãagre, la neb nins sẽn na n bao tɩrlmã, na n paama fãagre.

²⁸ La sãoong n na n paam kɩɩsdbã ne yel-wẽn-maandbã. Neb nins sẽn basd Sẽn-Ka-Saabã na n menemame.

²⁹ Tɩ-bɛd nins yãmb sẽn dag n nongã yãnd na n yõka yãmba. Yãmb zẽed zĩisã y sẽn nongã yãnd na n yõka yãmba.

³⁰ Bala, yãmb na n yɩɩ wa terebẽnt tɩɩg vãad sẽn zelge, wa zẽed zĩig sẽn ka leb n tar koom.

³¹ Sẽn tar-a pãngã na n yɩɩ wa gʋmdo, la a tʋʋmã na n yɩɩ wa bug-pãrga. Bãmb b yiibã fãa na n naaga taab n dɩ bugum tɩ ned ka be n na n kiis-a ye.