A Dãniyɛlle 5 - WẼNNAAM SEBRE 2014

B yãnda nug sẽn gʋlsd lalg zugu

¹ Daar a yembre, rĩm a Bɛlsatzaar maana tig-kãsenga, a nin-kãsems tusrã yĩnga. La yẽnda yũu reezẽ rãam bãmb nifẽ.

² La rĩm a Bɛlsatzaar yũu reezẽ rãamã n tɩge. Dẽ, a yeelame tɩ b kẽng n tɩ wʋk sãnemã ne wanzuri wã laasã yẽnda ba a Nebukatnedzaar sẽn dag n wʋk Zeruzalɛm Wẽnd doogã pʋgẽ wã, n tall n wa tɩ yẽnda ne a pagbã, la a pʋg-rɩkdsã ne a nin-kãsemsã tall n yũ rãam.

³ B kẽngame n tɩ tall sãnem laasã b sẽn dag n wʋk Wẽnnaam doogã pʋg Zeruzalɛmã, n tall n wa. La rĩmã ne a nin-kãsemsã la a pagbã ne a pʋg-rɩkdsã tall-b lame n yũ reezẽ rãam.

⁴ Bãmb yũu reezẽ rãamã, la b waoog sãnem ne wanzuri, la zũudu, ne kut la raad ne kug wẽn-naandsã.

⁵ La wakat-kãng bala, b yãnda nug-bi sẽn wẽnd ninsaal nug-bi sẽn gʋlsd na-yirã lalg sẽn bolã zugu, fɩtl-doagendga neng-taoorã. Rĩmã rag n nee nugã sẽn gʋlsdã.

⁶ La rĩmã pɛleng yɩkame, t'a yamã bondge, t'a gĩinã maage, t'a rũmã pãbd taaba.

⁷ La rĩmã tãsame, n yeel tɩ b tɩ bool bãngdbã ne Kalde rãmbã bãngdbã, ne bag-bʋgdbã tɩ b wa. Dẽ, rĩmã yeela bãmb yaa: «Ned ning sẽn na n tõog-a n karm-a gʋlsmã, la a bilg a võorã n kõ-ma, b na n yeelga a soabã naam fuugu, la b pid a soabã kokor sãnem yãndo, la b kõ-a naam n kɩt t'a yɩ tãabẽ-soab mam soolmã nanambs sʋka.»

⁸ Rĩmã yam-dãmbã fãa waame. La bãmb ned baa a yembr ka tõog n karem gʋlsmã, la a bilg rĩmã a võor ye.

⁹ Bõn-kãng kɩtame tɩ rabeem-kãseng yõk rĩm a Bɛlsatzaare, t'a nengã yeege, la yẽnda nin-kãsemsã rag n zĩi ne yɩɩre.

A Dãniyɛll bilga gʋlsmã võore

¹⁰ La rĩmã ma sẽn wʋm goam nins rĩmã ne a nin-kãsemsã sẽn gomdã, a kẽe roog ning pʋg b sẽn dag n be n maand tigrã, n yeel rĩmã yaa: «N-na! Wẽnd na kaoos-yã! Ra-y n sak-y tɩ y tagsgã nams-y ye. Ka tɩlɛ tɩ y bas tɩ rabeem yõk-y ye.

¹¹ Ned a yembr n be yãmb soolmẽ wã n tar wẽnnaam-sõmyã sɩɩga. Yãmb ba wã zamaanẽ, b mikame t'a yaa ned sẽn tar vẽnegre, bãngre la a tar yam wa wẽnnaam-dãmbã yam. Dẽ kɩtame, tɩ rĩm a Nebukatnedzaar sẽn yaa yãmb ba wã yãk-a n kɩt t'a lebg tɩtã-rãmb ne bãngdbã, la Kalde rãmba bãngdbã ne bag-bʋgdbã fãa naaba. Yaa yãmb ba wã n dag n maan woto.

¹² Rao a Dãniyɛlle, yãmb ba wã sẽn pʋd-a soab yʋʋr t'a Bɛltasaarã, b mikame t'a yaa ned sẽn tar yam ne bãngre, n yɩɩd nebã fãa, n tõe n bilg zãmsdo, ne yel-soalem võyã, la a tõe n wilg yel-tood manegr soayã. Bɩ y kɩt tɩ b bool a Dãniyɛll t'a wa bilg a võorã n kõ-yã.»

¹³ Dẽ, b talla a Dãniyɛll n kẽng rĩmã nengẽ. La rĩmã soka a Dãniyɛll yaa: «Yaa foom la a Dãniyɛll bɩ? Fo yaa yembs nins mam ba a Nebukatnedzaar sẽn dag n yõg Zʋʋda n tall n wa ka wã ned a yembr bɩ?

¹⁴ Mam wʋmame tɩ b gomd fo yell n yetẽ tɩ fo yaa ned sẽn tar wẽnnaam-sõmyã sɩɩga, tɩ la f tara vẽnegre, la bãngre, ne yam wʋsgo.

¹⁵ Ade, b talla yam-dãmbã ne bãngdbã n wa mam nengẽ, n yeel-b tɩ b karem gʋlsmã fo sẽn ne wã, la b bilg a võor n kõ-ma. La bãmb ka tõog ye.

¹⁶ B yeela maam tɩ fo yaa ned sẽn tõe n kõ yel-soalem bilgri, la f tõe n wilg yel-tood manegr soayã. Dẽ wã, fo sã n tõog n karem gʋlsmã fo sẽn ne wã, la f bilg a võorã n kõ maam, b na n yeelga foom naam fuugu, la b pid fo yublã sãnem yãndo, la b kɩt tɩ f lebg soolmã naab a tãabẽ soaba.»

¹⁷ A Dãniyɛll leoka rĩmã yaa: «N-na, y tõe n talla y kũunã, y leb n tõe n dɩk-a lame n kõ ned a to. La baoosgo, mam na n karma gʋlsmã, la m bilg a võorã n kõ-yã.

¹⁸ N-na! Wẽnnaam Sẽn-Ka-To wã rag n kõo yãmb ba a Nebukatnedzaar rĩungã, n kɩt tɩ b yɩ rĩm-kãseng sẽn tar waoogre, la ziiri.

¹⁹ La Wẽnnaam sẽn dag n zẽk bãmb tɩ b lebg rĩm-kãsengã yĩng kɩtame, tɩ buudã fãa, ne soolem toay-toayã fãa, ne nebã buud fãa sẽn gomd goam buud toor-toorã rigd bãmb taoor ne rabeem. Rĩm a Nebukatnedzaar dag n kʋʋda a sẽn dat-a soaba, la a basd a sẽn dat-a soaba. Bãmb dag n zẽkda b sẽn dat-a soaba, la b sikd b sẽn dat-a soaba.

²⁰ La rĩmã sẽn wuk b meng n diglim b sũurã n lebg tɩta-neda yĩng kɩtame, tɩ Wẽnnaam sik bãmb b naamẽ wã, n kɩt tɩ b ziirã sɛ.

²¹ La b riga rĩm a Nebukatnedzaar n yiis ninsaalb sʋka, n kɩt tɩ b yamã menem, tɩ b lebg wa rũnga, la bãmb rag n tɩ vɩɩ ne we-rũmsi, la b rag n kõta bãmb yamd wa naafo. La meenem dʋʋga bãmba, hal tɩ ta wakat ning bãmb sẽn wa n bãng tɩ Wẽnnaam Sẽn-Ka-To wã n so ninsaalbã fãa naamã n kõt b sẽn dat-a soabã.

²² La yãmb a Bɛlsatzaar sẽn yaa bãmb biigã, yãmb bãnga bõn-kãensã fãa, la y ka sak n sik y meng ye.

²³ Yãmb zẽka y meng n kɩɩs Zu-soabã sẽn be saasẽ wã. Yãmb kɩtame tɩ b tall Zu-soabã roogã laasã n wa kõ yãmba, tɩ yãmb ne y nin-kãsemsã, la y pagbã, ne y pʋg-rɩkdsã tall-b n yũ reezẽ rãam. Yãmb waooga y wẽn-naandsã sẽn maan ne wanzuri, la sãnem, la zũudu, ne kutu, la raad ne kugã. Bãmb yaa wẽnnaam-dãmb sẽn ka ne, la b ka wʋmde, la b ka tar bãngr ye. Yãmb ka waoog Wẽnnaam ning sẽn so-a yãmb vɩɩmã, ne bũmb nins fãa yãmb sẽn maandã ye.

²⁴ Yaa rẽ n kɩte, tɩ Wẽnnaam tʋm nug t'a wa gʋls gʋlsem ning yãmb sẽn ne wã.

²⁵ Ad gʋlsem ning sẽn gʋlsã: Sõdame, Sõdame, Makame, Welgame.

²⁶ Ad gʋlsmã bilgri: Sõdame: Rat n yeelame tɩ Wẽnnaam sõda yãmb naamã rasmã, la a sɛɛme.

²⁷ Makame: Rat n yeelame tɩ Wẽnnaam maka yãmb ne zɩslem makdga, la b mikame tɩ yãmb zɩslmã ka ta ye.

²⁸ Welgame: Rat n yeelame tɩ b pʋɩɩ yãmb soolmã n kõ Meed-rãmbã ne Pɛrs-rãmbã.»

²⁹ La wakat-kãng bala, rĩm a Bɛlsatzaar kõo noor tɩ b yeelg a Dãniyɛll naam fuugu, la b pid a yublã sãnem yãndo, la b moon n yeel t'a Dãniyɛll lebga naab a tãabẽ soab soolmã pʋga.

³⁰ Yʋn-kãng bala, b kʋʋ Babilond-dãmbã rĩm a Bɛlsatzaare.