A Dãniyɛlle 2 - WẼNNAAM SEBRE 2014

A Nebukatnedzaar pipi zãmsdo

¹ Rĩm a Nebukatnedzaar sẽn deeg naamã tɩ yʋʋm yiiblẽ, a zãmsa zãmsdo, tɩ zãmsdã namsd-a wʋsgo, hal t'a ka leb n tõe n gũs ye.

² Rĩm a Nebukatnedzaar kɩtame tɩ b bool tɩtã-rãmbã, ne bãngdbã, la bag-bʋgdbã ne Kalde rãmbã bãngdbã fãa, tɩ b wa bilg yẽnda a zãmsdã võore. La bãmb fãa waa rĩmã nengẽ.

³ Rĩmã yeela bãmb yaa: «Mam zãmsa zãmsdo, la a namsda maam wʋsgo, tɩ m dat zãmsdã võor n bãnge.»

⁴ Kalde rãmbã goma ne rĩmã ne Aram tẽng goam n yeele: «N-na! Wẽnd na kaoos-yã! Bɩ y togs tõnd y zãmsdã, la tõnd na n bilga yãmb a võore!»

⁵ La rĩmã leok-b lame n yeel yaa: «Ade, mam yãka yam, tɩ yãmb sã n ka tõog n togs maam m zãmsdã, la y tõog n kõ maam a bilgrã, mam na n kɩtame tɩ b bees yãmba, la b sãam y zagsã n kɩt tɩ b lebg raboodo.

⁶ La yãmb sã n tõog n togs maam m zãmsdã, la y tõog n bilg a võorã, mam na n kõo yãmb kũun wʋsgo, la waoog-kãsenga. Dẽ yĩngã, togs-y maam m zãmsdã, la y bilg a võorã.»

⁷ Kalde rãmbã leb n leoka rĩmã naoor a yiibẽ soab n yeele: «N-na! Bɩ y togs tõnd y zãmsdã, la tõnd na bilg yãmb a võorã.»

⁸ Dẽ, rĩmã yeelame: «Sɩd-sɩdã, mam miime tɩ yãmb rat n dɩka weere, yãmb sẽn yã tɩ mam ka lebd poorẽ ne m yam-yãkrã yĩnga.

⁹ Dẽ wã, yãmb sã n ka togs maam m zãmsdã, yãmb fãa na n paama sɩbgre. Yãmb zemsa taab n dat n togs maam zĩrẽ goamã, la gom-vɩɩdo, sẽn na n yɩlẽ tɩ wakatã looge. Mam sẽn dat bala, yaa tɩ y togs maam m zãmsdã, dẽ, mam na bãng tɩ yãmb sɩd tõe n bilga maam a võorã.»

¹⁰ Kalde rãmbã yeela rĩmã yaa: «N-na! Ned ka be dũniyã zug ka, n tõe n maan bũmb ning yãmb sẽn kotã ye. Sẽn paas me, rĩm nan ka zĩndi, ba a naamã ne a pãngã sẽn yaa to-to, n yeel tɩtã-rãmba, ne bãngdbã, wall Kalde rãmbã bãngdbã tɩ b maan bũmb a woto ye.

¹¹ N-na! Yãmb sẽn kot bũmb ningã yaa toog wʋsgo. La ned ka be sẽn tõe n bãng bõn-kãngã n togs yãmba, sã n ka wẽnnaam-dãmbã bala. La wẽnnaam-dãmb-kãens me ka be ninsaalb sʋk ye.»

Wẽnnaam vẽnega a Dãniyɛll rĩmã zãmsdã

¹² Gom-kãng kɩtame tɩ rĩmã sũur yik hal wʋsgo, t'a kõ noor n yeel tɩ b kʋ Babilond bãngdbã fãa.

¹³ B moona zĩig fãa n wilg tɩ b na n kʋʋ bãngdbã fãa. La b baoo a Dãniyɛll ne a tũud-n-taasã me n na n kʋ.

¹⁴ La a Dãniyɛll goma ne rĩmã gũudbã naab a Aryoke ne yam la gũus-m-menga. Bala, yaa Aryok n dag n yi n na n kʋ Babilond bãngdbã.

¹⁵ A Dãniyɛll yeela a Aryok sẽn yaa rĩmã gũudbã naabã yaa: «Bõe yĩng tɩ rĩmã yãk yam n na n wa ne sɩbg-toaag a woto?» La a Aryok rɩka yellã n bilg a Dãniyɛlle.

¹⁶ La a Dãniyɛll kẽnga rĩmã nengẽ n tɩ kos-b tɩ b kõ yẽnda weere, t'a na n kõo rĩmã a zãmsdã bilgri.

¹⁷ Dẽ poore, a Dãniyɛll lebg n kuila a yiri, n tɩ rɩk yellã n togs a Hananiya ne a Misayɛlle, la a Azariya sẽn yaa yẽndã tũud-n-taasã.

¹⁸ Dag n yaa sẽn na n kos saasẽ Wẽnnaamã tɩ b maan nimbãan-zoeer yel-solem-kãngã wɛɛngẽ, tɩ b ra kʋ yẽnda ne a tũud-n-taasã, la ne Babilond bãngdbã me ye.

¹⁹ Dẽ, badaar yʋngo, Wẽnnaam vẽnega a Dãniyɛll yel-solem-kãng zãmsd pʋgẽ. La a Dãniyɛll waooga saasẽ Wẽnnaamã.

²⁰ A Dãniyɛll yeelame: «Bɩ Wẽnnaam yʋʋr paam waoogr zamaan woo zamaane.

²¹ Yam ne pãng yaa bãmb n so. Bãmb n tekd wakate, la yɛla, Bãmb n kõt rĩm-dãmb naam, Bãmb n sikd rĩm-dãmb b naamẽ, Bãmb n kõt yam-dãmbã yam, la b kõt bãngdbã me bãngre.

²² Bãmb n vẽnegd yel-soalmã, Bãmb n mi bũmb ning sẽn solg lik pʋga, Bãmb sẽn beẽ, yaa vẽenem wakat fãa.

²³ Mam yaab-rãmbã Wẽnnaam, mam pẽgda yãmba, la m waoogd-y-yã, Yãmb sẽn kõ maam yam la pãngã yĩnga, bala, yãmb n vẽneg maam ne bũmb ning tõnd sẽn kos yãmbã, Yãmb n vẽneg tõnd ne yell ning sẽn pak rĩmã!»

²⁴ Rẽ zugẽ, a Dãniyɛll yikame n kẽng a Aryok nengẽ. Yaa a Aryok la rĩmã sẽn dag n kõ noor t'a kɩt tɩ b kʋ Babilond bãngdbã. A Dãniyɛll yeela a Aryok yaa: «Bɩ y ra kʋ Babilond bãngdbã ye. Tall-y maam n kẽng rĩmã nengẽ, tɩ mam na n togs-b-la b zãmsdã võore.»

A Dãniyɛll bilga rĩmã a zãmsdã võore

²⁵ A Aryok peega a Dãniyɛll tao-tao n kẽng rĩmã nengẽ n tɩ yeel yaa: «Mam yãnda Zʋʋda yembsã sʋk ned a yembr sẽn na n kõ yãmb y zãmsdã bilgri.»

²⁶ Rĩmã yeela a Dãniyɛll b sẽn pʋd a yʋʋr t'a Bɛlsatzaarã yaa: «Yaa sɩd tɩ fo tõe n togsa maam m zãmsdã, la f bilg-ma a võore?»

²⁷ A Dãniyɛll yalsa rĩmã taoor n leok n yeele: «Yel-solemd ning rĩmã sẽn dat n bãng a võorã, ka bãngdbã, wall bãngdb ne tɩtã-rãmb n tõe n bilg yãmb a võorã ye.

²⁸ La Wẽnnaam a yembr n be saasẽ, n tõe n vẽneg yel-soalem võyã, yaa Wẽnnaam-kãng n vẽnegd rĩm a Nebukatnedzaar ne bũmb ning sẽn na n wa n zĩnd yaoolem wakate. Ad zãmsd ning yãmb sẽn zãmsã, ne yãab nins yãmb sẽn paam y gãagẽ wã sẽn yɩ to-to.

²⁹ N-na, yãmb dag n gãe y gãagẽ, la yãmb tagsa bũmb nins sẽn wat yelle. La soab ning sẽn vẽnegd yel-soalmã kɩtame tɩ yãmb bãng bũmb ning sẽn wate.

³⁰ B sẽn vẽneg maam ne yel-solem-kãngã wã, ka rat n yeel tɩ mam tara yam n yɩɩd ninsaalbã fãa ye. La yaa sẽn na n yɩlẽ tɩ yãmb bãng y zãmsdã võore, la y bãng bũmb ning sẽn be yãmb tagsgẽ wã.

³¹ N-na, yãmb zãmsdã pʋga, yãmb yãnda bõn-naandg sẽn yaa kãsenga. Bõn-naandgã dag n bedmame, n pɩnd hal wʋsgo. La a ra yasa yãmb taoorã, t'a gesg be rabeem.

³² Bõn-naandgã zugã rag n yaa sãnem halaale, t'a yãoogã ne a nusã rag n yaa wanzuri, t'a pʋgã ne a gɛy wã rag n yaa zũudu.

³³ A karsã rag n yaa kutu, t'a naoã bɛk yaa kutu, tɩ begr a yembrã yaa yagdo.

³⁴ La yãmb sẽn ket n get-a wã wakate, kug-bedr n yi yĩngri, tɩ ka ned n sɩɩs-a ye. Kugrã lʋɩ n wẽe bõn-naandgã naoã sẽn yaa kut ne yagdã tɩ b wã n lebg zom-zom.

³⁵ Dẽ, kutã ne yagdã la zũudã ne wanzuri wã, la sãnemã fãa lebga zom-zom n sãeeg wa wudg sẽn be zɛɛgẽ zĩ-likr wakate, tɩ sobg rɩk-b n looge, la bũmb ka kell ye. La kugr ning sẽn lʋɩ n wẽ bõn-naandgã n wã wã lebga tãn-kãseng n pid dũniyã gilli.

³⁶ N-na! Yamb zãmsdã la woto. Moasã, tõnd na n bilga a võorã n kõ-yã.

³⁷ N-na, yãmb yaa rĩm-dãmbã rĩmã. Saasẽ Wẽnnaamã kõo yãmb rĩungã, la b kõ yãmb pãn-tõogo, ne pãnga, la ziiri.

³⁸ Wẽnnaam rɩka ninsaalbã fãa, ne we-rũmsã ne liuuli wã sẽn yɩgd yĩngrã, n ning yãmb nugẽ, ba b sẽn be zĩig ning fãa. La b kɩt tɩ yãmb soog bãmb fãa. Dẽ, yaa yãmb la zugã sẽn yaa sãnemã.

³⁹ Yãmb loogr zugẽ, rĩung a to pãng sẽn ka ta yãmb n na n pʋgl n zĩndi. La tãabẽ soab sẽn yaa zũudu, n na n pʋgle. La yẽnda na n sooga dũniyã gilli.

⁴⁰ Rẽ poore, rĩung a naasẽ soab sẽn tar pãng wa kut n na n zĩndi. Kut sẽn tõe n wẽ bũmb n wã t'a lebg zom-zom to-to wã, rĩun-kãng na n wãa soolem a taabã sẽn deng n beẽ wã n neem-b zãnga.

⁴¹ La yãmb sẽn yãnd a naoã ne a nao-bi wã tɩ bɛk yaa yagd tɩ bɛk yaa kutã, rat n yeelame tɩ soolem-kãng na n welga toor-toore. La yãmb sẽn yã kutã sẽn kalem ne yagdã, rat n wilgame tɩ kut pãng n na n kell n zĩnd a pʋgẽ.

⁴² La nao-bi wã bɛk sẽn yaa kut tɩ bɛk yaa yagdã, rat n yeelame tɩ soolem-kãng begr a yembrã na n talla pãnga, tɩ begr a to wã ka tar pãng ye.

⁴³ Yãmb sẽn yã kutã ne yagdã sẽn kalem taabã rat n yeelame tɩ buud nins sẽn be soolem-kãens pʋgẽ wã na n baoo lagem-n-taar ne taaba. La wa kut ne yagd sẽn ka tõe n kalem taabã, bãmb ka na n tõog n lagem taab ye.

⁴⁴ Rĩm-bãmbã wakatã, saasẽ Wẽnnaamã na n kɩtame tɩ rĩung sẽn ka sãamd zĩndi. La buud a to neb kõn tol n tõog n deeg rĩun-kãng ye. Yẽnda na n wãa soolem-bãmb fãa n menes-ba, la a na n zĩnda wakat sẽn kõn sa.

⁴⁵ Woto, yãmb sẽn yã kugr ning sẽn yi tãngã zug tɩ ka ned n sɩɩs-a wã sẽn lʋɩ n wẽ kutã ne zũudã, la yagdã ne wanzuri wã, la ne sãnemã, rat n yeelame tɩ yaa Wẽnnaam-kãsengã n kɩte, tɩ rĩmã na n bãng bũmb ning sẽn tog n wa zĩnd yaoolem wakate. Zãmsdã yaa sɩda, la yãmb tõe n kɩsa sɩd t'a bilgrã me yaa sɩda.»

⁴⁶ Dẽ, rĩm a Nebukatnedzaar wõgemda a Dãniyɛll taoor n waoog-a, la a yeel tɩ b maan maoongo, n yõog wisd a Dãniyɛll yĩnga.

⁴⁷ Rĩmã goma ne a Dãniyɛll n yeele: «Fo sẽn tõog n bãng yel-solem-kãngã wã, Sɩd-sɩdã, mam miime tɩ yãmb Wẽnnaamã yaa wẽnnaam-dãmbã Wẽnnaam, la rĩm-dãmbã Soaala. Bãmb n vẽnegd yel-soalmã.»

⁴⁸ Dẽ poore, rĩm a Nebukatnedzaar zẽka a Dãniyɛll n kõ-a naam, ne kũun-kãsems wʋsgo. Rĩmã kɩtame t'a Dãniyɛll lebg Babilond soolmã naaba, la Babilond tẽngã yam-dãmbã fãa na-kãsenga.

⁴⁹ La a Dãniyɛll kosa rĩmã t'a kɩt t'a Sadrak ne a Mesak la a Abednego yɩ Babilond soolmã taoor-dãmb n get soolmã yɛla. La a Dãniyɛll mengã kell n paa na-yirã.