A Dãniyɛlle 12 - WẼNNAAM SEBRE 2014

Yaoolem wakat koeese

¹ Sẽn wẽnda ninsaalbã leb n yeela maam yaa: «Wakat-kãnga, gũudbã na-kãseng a Mikayɛll sẽn yaa yãmb nebã gũudã na n waame, la na n yɩɩ to-kãseng wakate. Hal ninsaalb sẽn be dũni tɛk tɩ tãag badaare, to-kãseng a woto buud nan ka zĩnd ye. La badaare, b na n fãaga fo neb nins yʋy sẽn gʋls sebrã pʋgẽ wã.

² La neb wʋsg sẽn gãe tẽng tomẽ na n vʋʋgame. Kẽer na n vʋʋgame n paam vɩɩm sẽn kõn sa, tɩ kẽer vʋʋg n paam yãnde, n vɩɩmd paoog-kãseng pʋg wakat sẽn kõn sa yĩnga.»

³ La yam dãmbã na n pɩnda wa sa-gãongã, la neb nins sẽn zãms neb a taabã tɩ b tũ tɩrlem sorã na n pɩnda wa ãds wakat fãa n ka sɛtẽ ye.

⁴ La bɩ foom a Dãniyɛll solg gom-kãense, la f pag sebrã hal tɩ ta yaoolem wakate. Neb wʋsg na n karma sebrã n paam bãngr n paase.»

⁵ La maam a Dãniyɛll sẽn ket n getẽ, mam yãnda neb a yiib a taab sẽn yik n yas yĩngri. A yembrã yasa kʋɩlgã noore, t'a yembrã be kʋɩlgã rʋʋnde.

⁶ Bãmb ned a yembr yeela ned ning sẽn yer-a fu-peels n yas koomã zugã yaa: «Bõn-yɛɛsds-kãensã sɛɛbã daar na n yɩɩ dabʋre?»

⁷ La mam wʋma ned ning sẽn yer-a fu-peels n yas koomã zugã sẽn gomde. La yẽnda zẽka a nus a yiibã n tees yĩngr n wẽen ne sẽn vɩ-a wakat sẽn kõn sa wã yʋʋr n yeele: «Bõn-yɛɛsdsã na n kaoosa yʋʋm a tãab la pʋɩ-sʋka. Wẽnnaam nin-sõamyã pãng sẽn na n sɛ wakat ningã, yaa wakat-kãng la bõn-yɛɛsds-kãensã fãa me na n sɛ.»

⁸ Maam a Dãniyɛll wʋma goamã, la m ka wʋm a võor ye. La mam sokame: M soaala, yel-bãmbã na n sɛɛ dabʋre?

⁹ La b leoka maam yaa: «Dãniyɛlle, ra yɛɛs ye. Bala, gom-bãmbã tog n solgame, hal tɩ ta wakatã sɛɛbã.»

¹⁰ Neb wʋsg na n paama yɩlgre, la pekre, n lebg sõama. Nin-wẽnsã na n ket n maanda wẽngã, la bãmb ned ba a ye ka na n wʋm yɛlã võor ye. La yam dãmbã na n wʋma a võore.

¹¹ Hal sẽn sɩng wakat ning b sẽn na n gɩdg daar fãa maoongã maanegã, ne wakat ning b sẽn na n lugl sãamdã bõn-naandgã, na n yɩɩ rasem tusr la kobs-yi la pis-wɛ.

¹² Bark bee ned ning sẽn na n yals-a n gũ tɩ ta rasem tusr la kobs-tã la pis-tã la a nu wã daarã zugu.

¹³ La bɩ foom a Dãniyɛll kell n yals kãenkãe n tãag yɛlã sɛɛb wakate. La fo na n paama vʋʋsgo, n yik n deeg f keoor yaoolem daarã.