A Amoose 8 - WẼNNAAM SEBRE 2014

Vẽnegr a naasẽ soaba: Peoog ne tɩɩs biisi

¹ Ad bũmb ning Zu-soab a Wẽnnaam sẽn wilg maam vẽnegr a to pʋgẽ. Vẽneg-kãng pʋgẽ, mam yãnda peoog sẽn pid ne tɩɩs bi-moaama.

² La b soka maam yaa: Amoose, fo nee bõe? La mam yeelame tɩ m nee peoog sẽn pid ne tɩɩs bi-moaama. La Zu-soabã yeela maam yaa: Israyɛll sẽn yaa mam nebã sɛɛb wakat taame. Mam ka na n leb n kõ-b sugr ye.

³ Badaare, na-yirã pʋgẽ yɩɩlã na n lebga wiisgu. Maam a Zu-soab a Wẽnnaam n yeele. B na n zama kũumã zĩig fãa. B ka na n leb n wʋm bʋrg ye.

Lɛɛbdã zãmbo

⁴ Kelg-y-yã, yãmb dãmb sẽn maand nimbãan-nebã pãngã, la y namsd tẽngã ka-pãens-rãmbã,

⁵ Yãmb yetame: «Rabʋr la ki-paalgã na n sɛ, tɩ d paam n koosd d koodã? La dabʋr la vʋʋsg daarã na n looge, tɩ d paam n fõgs d bao wã?» Tõnd na n wẽga d la-magdɩ wã, la d tall d zɩslem magdsã n zãmbe, la d rʋg d koosmã raaga.

⁶ Tõnd na n daa naong rãmbã ne ligdi, la d koos nin-koamã neooda yĩnga. Tõnd na n koosa baa ne ka-pedsã.

⁷ Sẽn-Ka-Saab wẽena ne Israyɛll zu-zẽkr tẽngã n yeele: «Mam ka na n tol n yĩm y tʋʋmd ba a yembr ye.»

⁸ Bãmb tʋʋm-wẽnsã yĩnga, mam na n kɩtame tɩ tẽn-gãongã rigimdi. Sũ-sãang na n paama neb nins fãa sẽn be tẽn-kãng pʋgẽ wã A na n zẽkame n lebg n lʋɩ, wa Ezɩpt tẽng Nill kʋɩlgã.

Sẽn-Ka-Saab daarã na n yɩɩ sũ-sãang daare

⁹ Zu-soab a Wẽnnaam yetame: Badaare, mam na n kɩtame tɩ wĩntoogã kẽ wĩnto-sʋka, la m kɩt tɩ dũniyã lebg lik wĩntoog wakate.

¹⁰ Mam na n teka y tigã tɩ lebg sũ-sãanga, la m tek y yɩɩlã fãa tɩ lebg wiisgu. Mam na n sẽgen-y-la sũ-sãang futu, la m põng y fãa zutã. Mam na n kɩtame tɩ sũ-sãang kẽ tẽngã, wa ned bi-ribl-yend sẽn ki t'a yãbda, la a baoosg na n yɩɩ sũ-toogo.

¹¹ Zu-soab a Wẽnnaam yeelame yaa: Wakat n wate, tɩ mam na n kɩt tɩ kom kẽ tẽngã, la ka na n yɩɩ rɩɩb kom, wall koom sẽn kae n yũud yĩng ye. Na n yɩɩ Sẽn-Ka-Saab goamã kelgr kom la a ko-yũud n na n yõk-ba.

¹² Bãmb na n yeeb n kẽnga goabg la rɩtgo, ne yaang la taoore, n baood n na n wʋm Sẽn-Ka-Saab goamã, la b ka na n wʋm-a ye.

¹³ Badaare, pʋg-sad-neebã ne ra-sãmbã na n kii ko-yũudu.

¹⁴ Bãmb wẽenda ne Samaari wẽn-naan-yoogã n yetẽ: «Tõnd wẽenda ne f wẽn-naandg a Dan, la d wẽend ne Bɛɛrseba wẽn-naandgã!» La b na n lʋɩɩme n ka leb n yik abada ye