A Amoose 3 - WẼNNAAM SEBRE 2014

Sẽn-Ka-Saab keooga Israyɛll nebã

¹ Israyɛll nebã, yãmb dãmb fãa sẽn yaa buud ning Sẽn-Ka-Saab sẽn yiis Ezɩpt yembdã pʋgẽ wã, kelg-y koɛɛg ning Sẽn-Ka-Saab sẽn yet yãmb wɛɛngẽ!

² Dũniyã buud fãa sʋka, yaa yãmb bal la mam yãk yã. Yaa rẽ yĩng n kɩte, tɩ mam na n sok yãmb tʋʋm-beed nins fãa yãmb sẽn maanã võore

³ Neb a yiib tõe n tũu taab tɩ b ka reng n yẽs ne taab sɩda?

⁴ Gɩgemd wat n kelemda weoogẽ, tɩ sã n ka a paama bũmb n yõke? Gɩgem-poll wat n be a põkẽ n kelemdẽ, tɩ sã n ka a yõka bũmbu?

⁵ Tãoog tõe n zĩnd tẽng n yõk liuul tɩ sã n ka b ninga bẽdgo? Tãoog ka fisgd tɩ sã n ka bũmb la a yõkɩ ye!

⁶ Kũng na wẽ tẽng pʋgẽ tɩ neb pɛleng ka yɩke? Yel-beed tõe n paama tẽng tɩ Sẽn-Ka-Saab zɩ tiiri?

⁷ Sẽn-Ka-Saab ka maand bũmbu, tɩ b ka reng n vẽneg-a ne b tʋmtʋmdbã sẽn yaa bãmb no-rɛɛsdbã ye.

⁸ Gɩgemd sã n kelme, ãndã n ka na n yɛɛse? Wẽnnaam Sẽn-Ka-Saab sã n gome, ãnda soab n tõe n ka togs bãmb koɛɛgã?

Bũmb ka na n kell Samaari ye

⁹ Moon-y Asdood ne Ezɩpt pãng zĩisẽ wã n yeele: «Tigm-y taab Samaari tãmsã zutu, n ges zũnglg ninga, la namsg ning b sẽn namsd nebã Samaari tẽngã pʋgẽ wã.»

¹⁰ Sẽn-Ka-Saab yetame: Bãmb ka mi tɩ maan sɩd ye, bãmb pidsda b pãng zĩisã ne paoong b sẽn deeg ne pãnga.

¹¹ Bõn-kãens yĩnga, Zu-soab a Wẽnnaam yetame: Bɛ wã na n gũbga tẽngã n sãam a pãng zĩisã, la a fã laogã sẽn be a na-yiyã pʋsẽ wã.

¹² Sẽn-Ka-Saab yetame: Wa gɩgemd sẽn mi n yõk rũnga, tɩ pe-kɩɩm dig-a n deeg kars a yiib bɩ tʋb-bɛkã, Israyɛll nebã sẽn be Samaari wã ne neb nins sẽn be Damaas n gãe b gã-bʋgses zutã me na n paama fãagr a woto!

¹³ Kelg-y la y keoog a Zakoob buudã! Zu-soab a Wẽnnaam sẽn yaa Saasẽ-Pãng-Soabã n yeele.

¹⁴ Daar ning mam sẽn na n sɩbg Israyɛll nebã b tʋʋm-beedã yĩngã, Mam na n sãama Betɛll tẽn-kugã, la tẽn-kugã yɩɩl na n kao n dʋʋga tẽnga,

¹⁵ Mam na n luba tẽn-bɛdã roto, la m lub tẽn-bãoonegã roto, la m menes rot nins b sẽn nags ne wob-yẽnã, la rot wʋsg na n sãamame. Yaa Sẽn-Ka-Saab n yeele.