3 Zã 1 - WẼNNAAM SEBRE 2014

Pʋʋsem

¹ Kãsmã n tʋmd seb-kãngã ba-bi-nongr a Gayuus sẽn ya ned mam sẽn nong sɩdã pʋgẽ wã.

² Mam zo-nongre, mam bõsda Wẽnd tɩ fo yɛlã fãa na kẽnd sõama, la tɩ fo yĩngã tar laafɩ wala f sɩɩgã yɛlã sẽn yaa sõma wã.

³ Ba-biisã sẽn wa n kɩs kaset ne sɩd ning sẽn be fo pʋgẽ, la fo sẽn kẽnd sɩdã pʋgẽ to-to wã, mam maana sũ-noog wʋsgo.

⁴ Bũmb ka kõt maam sũ-noog n yɩɩd mam sẽn na n wʋm tɩ b gomd tɩ mam kambã kẽnda sɩdã pʋgẽ ye.

B pẽgda a Gayuus

⁵ Mam zo-nongre, bũmb ning fo sẽn maand ba-biisã yĩngã, fo maanda ne sɩda, baa ne ba-bi-sãamsã.

⁶ Bãmb kɩsa fo nonglmã kaset tẽedbã taoore. Fo sã n sõng-b so-toakã wɛɛngẽ, wa sẽn zems Wẽnnaam yam, na n yɩ neere.

⁷ Bala yaa a Zu-soabã yʋʋrã yĩng la b kẽng-yã, la b ka reeg baa fɩ neb nins sẽn ka pʋʋsd Wẽnnaamã nengẽ ye.

⁸ Dẽ, tõnd tog n deega nin-bãmbã-rãmba, tɩ tõnd tõe n yɩ tʋmd-n-taas ne bãmba, sɩdã yĩnga.

A Diyotɛrf kɩɩsgo

⁹ Mam gʋlsa koees bilf n tʋm Kiris tẽedbã, la a Diyotɛrf sẽn nong n yɩ taoor soab bãmb sʋkã ka sakd n deeg ye.

¹⁰ Yaa woto yĩng tɩ mam sã n wa wa, mam na n tẽega tʋʋm nins yẽnda sẽn maandã, a sẽn saad n gomd tõnd yell wẽngã. Tɩ rẽ ka sek-a ye. Yẽnda mengã ka reegd ba-biisã ye, la yẽnda gɩdgda neb nins sẽn dat n deeg-bã, la a rigd-b n yiisd Kiris tẽedbã sʋka.

B pẽgda a Demetiryuus

¹¹ M zo-nongre, da maan togs-n-taar ne sẽn yaa wẽng ye, maan togs-n-taar ne sẽn yaa neere. Ned ning sẽn maanda neer yaa Wẽnnaam neda, la ned ning sẽn maanda wẽng ka yã Wẽnnaam ye.

¹² Nebã fãa ne sɩdã meng kɩta a Demetiryuus kaset sõngo. Tõnd me kɩta yẽnda kaset sõngo, la fo miime tɩ tõnd kaset yaa sɩda.

Yaoolem pʋʋsem

¹³ Mam tara bũmb wʋsg m sẽn da tõe n gʋlsẽ foom, la m ka rat n gʋls-b ne gʋls-koom la ne gʋlsdg ye.

¹⁴ Mam maanda tẽeb tɩ sã n yɩ bilfu, m na n yãa foom, la d na n goma ne taab neng ne nenga.

¹⁵ Bɩ laafɩ zĩnd ne foom. F zo-rãmbã pʋʋsda foom, pʋʋs d zo-rãmbã fãa yembr-yembre.