2 Zã 1 - WẼNNAAM SEBRE 2014

Pʋʋsem

¹ Kãsmã n tʋmd seb-kãngã pag a Kirya sẽn ya Wẽnnaam nin-tũusdgã ne a kambã mam sẽn nong sɩdã pʋgẽ wã. La ka maam m ye n nong-b ye, neb nins fãa sẽn bãng sɩdã me nong-b lame,

² sɩdã sẽn be tõnd pʋgẽ, la sẽn na n pa ne tõnd wakat sẽn kõn sa wã yĩnga.

³ Barka, la nimbãan-zoeere, la laafɩ sẽn yit tõnd ba a Wẽnnaam nengẽ, la bãmb Bi-ribl a Zeezi Kiris nengẽ na n paa ne tõndo, sɩdã ne nonglmã pʋgẽ.

Bɩ d nong taaba

⁴ Mam paama sũ-noog wʋsgo, mam sẽn mik tɩ fo kamb kẽer n kẽnd sɩdã pʋgẽ, wa sẽn zems tõog ning d ba wã sẽn kõ tõndã.

⁵ Moasã, Kirya, bũmb ning mam sẽn gʋlsd foomã ka tõ-paalg ye, yaa tõog ning tõnd sẽn dag n paam hal sɩngrẽ wã, mam kota foom tɩ d nong taabã.

⁶ La nonglem yaa tɩ kẽn wa sẽn zems Wẽnnaam tõodã. Yaa tõ-kãng pʋgẽ la yãmb tog n kẽne, wa yãmb sẽn zãms hal sɩngrẽ wã.

⁷ Bala, bɛlgdb wʋsg n kẽ dũniyã pʋgẽ n ka kɩt kaset t'a Zeezi waa ne yĩng ye. Ad yaa yẽnda soab la bɛlgdã la Kiris kɩɩsdã.

⁸ Gũus-y y mens n da wa menes tõnd tʋʋmdã biis ye, la tɩ y na reeg keoor sẽn yaa kãsenga.

⁹ Ned ning fãa sẽn loogd rẽnda, n ka paad Kiris zãmsgã pʋgẽ ka tar Wẽnnaam ye, la ned ning sẽn paad zãmsgã pʋgẽ tara ba wã la Bi-riblã.

¹⁰ Ned sã n wa yãmb nengẽ tɩ ka ne zãms-kãnga, bɩ y ra reeg-a y yiri, la y pʋs n da pʋʋs-a tɩ wẽnd na kaoos-a ye.

¹¹ Bala, ned ning sẽn pʋʋs-a tɩ wẽnd na kaoos-a naagda yẽnda a tʋʋm-wẽnsã pʋgẽ.

A Zã tagsd n dat n tɩ ges-b lame

¹² Baa ne mam sẽn tar bũmb wʋsg sẽn na gʋls yãmbã, mam ka tʋlg n na n gʋls-b ne seb-vãoogo la ne gʋls-koom ye. Mam maanda tẽeb tɩ m na n waa yãmb nengẽ, n gom ne yãmb neng ne nenga, tɩ tõnd sũ-noogã na pid zãnga.

¹³ Fo ba-bi-poakã sẽn yaa Wẽnnaam nin-tũusdgã kambã pʋʋsda foom.