2 Tɩmote 3 - WẼNNAAM SEBRE 2014

Yaoolem wakat yel-beedo

¹ Bãng tɩ yaoolem wakate, tood na n zĩndame.

² Bala, nebã na n yɩɩ beed-rãmba, ligd-noangdba, yʋ-baoodba, wilg-m-mens rãmba, wẽn-paoogdba, ba-rãmb kɩɩsdba, zɩ-beoog-rãmba, neb toog sẽn ka be ne sõmblem,

³ sẽn ka mi nimbãan-zoeere, nen-kegems rãmba, tẽn-kãn-nebã, sẽn ka tar yõk-m-menga, nin-wẽnse, nin-sõamyã bɛɛba,

⁴ zãmb rãmba, sũ-tʋʋls rãmba, tɩ wuk-m-meng leo b ninã, tɩ b nong b sũ-noogã n yɩɩd b sẽn nong Wẽnnaamã.

⁵ B na n maanda wa b sakda Wẽnnaam, la b yaool n na n kɩɩsa sakrã pãnga. Zãag f meng ne nin-bãmbã.

⁶ Kẽer bãmb sʋk kẽeda rotẽ n belgd pagb sẽn pid ne yel-wẽna, la ratem toay-toay sẽn tar n lengdẽ,

⁷ tɩ b zãmsd wakat fãa la b zɩ n tõog n bãng sɩdã ye.

⁸ Wa a Zanɛs ne a Zãmbrɛs sẽn kɩɩs a Moyiisã, nin-kãensã kɩɩsda sɩdã me a woto. Bãmb yaa nebã, b tagsg sẽn sãame, la b tẽebã ka yalsd makr wakat ye.

⁹ La b ka na n leb n kẽng taoor ye. Bala, nebã fãa na n yãnda b yalemdã, wa b sẽn yã daop a yiibã rẽndã.

Yaoolem bũmb a Poll sẽn yeel a Tɩmote t'a maane

¹⁰ Ne foom, fo yãnda bũmb nins mam sẽn zãms nebã, mam yel-manesem, mam yam-yãkre, mam tẽebo, mam sũ-mare, mam nonglem, mam modgre,

¹¹ neb sẽn nams maam, mam namsgo. Nams bõe buud la b ka nams maam Ãntiyoose, la Likoniyom, la Listri? Bõe wẽng la b ka maan maam? La Zu-soabã yolsa maam ne b fãa.

¹² Neb nins fãa sẽn dat n vɩɩmd tẽeb vɩ-sõng Kiris pʋgẽ wã, neb na nams-ba.

¹³ La nin-wẽnsã ne bɛlgdbã na n kell n kẽeda wẽngã pʋgẽ n paasdẽ. Bãmb mensã yaa neb sẽn meneme, la b menesda neb a taab me.

¹⁴ Foom, kell n gãd bũmb ning fo sẽn zãmse, fo sẽn tẽed a soabã. Fo mii f sẽn zãms bõn-kãng ned ning nengẽ.

¹⁵ Hal f yãadem wakate, fo bãnga Wẽnnaam sebrã. B tõe n kõo foom yam tɩ f tõog n paam fãagre, fo sẽn tẽed a Zeezi Kirisã.

¹⁶ Wẽnnaam n kɩt tɩ b gʋls gʋls-sõamyã fãa, la b bee yõod zãmsg yĩnga, tɩ kɩt tɩ ned bãng a kongre, tɩ rems neda, tɩ wub ned tɩrlem pʋgẽ,

¹⁷ tɩ Wẽnnaam ned tõe n paam manegr la seglg tɩ maan tʋʋm-sõamy buud fãa.