2 Sãmwɛlle 8 - WẼNNAAM SEBRE 2014

A Davɩɩd yalga a soolmã

¹ Dẽ poore, a Davɩɩd tõoga Filistẽ-dãmbã, n ning-b yãnde, n deeg tẽms nins Filistẽ-dãmbã sẽn dag n so wã.

² Rẽ zugẽ, a Davɩɩd zab n tõoga Moaab nebã, n kɩt tɩ b gãand tẽng t'a mak-b ne wĩiri. A Davɩɩd makda wĩirã naoor a yiibu n kɩt tɩ b kʋ nin-bãmbã, la a mak tãabẽ soabã n kɩt tɩ b bas bãmb n ka kʋ ye. A Davɩɩd kɩtame tɩ Moaab nebã lebg a yembse, la a kɩt tɩ b yao yẽnda yõor yaoodo.

³ Wakat ning a Davɩɩd sẽn wa n kẽng n tɩ soog Efrat kʋɩlgã, yẽnda zaba ne a Rehoob biig a Hadadezɛɛr sẽn yaa Soba rĩmã, n tõog-a.

⁴ A Davɩɩd deega a Adadezɛɛr wed-rʋʋdb tusr la kobs yopoe, ne tãb-biis tus pisi sẽn ka zao wiidi. A Davɩɩd yãka wiid koabg sẽn tat saar-dãmbã, la a kɛ wiid a taabã fãa nao-gĩin n pase.

⁵ Siiri nebã yii Damaas n wa n na n sõng Soba rĩm a Adadezɛɛre, la a Davɩɩd kʋʋ Siiri neb tus pisi la a yiibu.

⁶ A Davɩɩd tilga tãb-sigs Siiri nebã nengẽ Damaase, n kɩt tɩ Siiri nebã lebg a yembse, la a kɩt tɩ b yaood yẽnda yõor yaoodo. Zĩig ning fãa a Davɩɩd sẽn kẽngẽ, Sẽn-Ka-Saab kɩtdame t'a paam tõogre.

⁷ A Davɩɩd deega sãnem logd nins a Adadezɛɛr nebã sẽn dag n bobã, n tall n kẽng Zeruzalɛm.

⁸ Beta ne Berotayi sẽn yaa a Hadadezɛɛr tẽmsã pʋse, rĩm a Davɩɩd leb n deega zũud wʋsgo.

⁹ Hamat rĩm a Toyi sẽn wʋm t'a Davɩɩd tõoga a Adadezɛɛr tãb-biisã fãa wã,

¹⁰ yẽnda tʋma a biig a Zoram a Davɩɩd nengẽ t'a tɩ pʋʋs-a, n pẽg-a, a sẽn zab n tõog a Hadadezɛɛrã yĩnga. Bala, a Hadadezɛɛr dag n zabda ne a Toyi naoor wʋsgo. A Zoram zãa sãnem ne wanzuri, la zũud teedo, n tall n tɩ kõ dĩm a Davɩɩde.

¹¹ Rĩm a Davɩɩd rɩka bõn-kãens n kõ Sẽn-Ka-saabo, wa yẽnda sẽn dag n zoe n tõog buud a taabã fãa n wʋk wanzuri wã ne sãnemã n wa kõ wã.

¹² Buud a taab kãens yaa Siiri nebã, Moaab nebã, la Amoa, ne Filistẽ-dãmbã, la Amalɛk nebã, la a yãk a Rehoob biig a Hadadezɛɛr sẽn yaa Soba rĩmã teedã yẽnda sẽn dag n wʋkã n paase.

¹³ A Davɩɩd tɩ kʋʋ Siiri neb tus piig la a nii yamsem longã pʋgẽ. La yẽnda sẽn lebg rẽ zugẽ n wa, a yʋʋrã yii wʋsg n paase.

¹⁴ A Davɩɩd kɩtame tɩ tãb-biis tɩ zĩnd Edom nebã tẽms pʋse, la Edom nebã lebga yẽnda soolem. A Davɩɩd sẽn kẽng zĩig ning fãa, Sẽn-Ka-Saab sõngd-a lame t'a paam tõogre.

¹⁵ A Davɩɩd yɩɩ Israyɛll nebã fãa rĩmã. Yẽnda rag n kaooda bʋʋd tɩrga, la a maand tɩrlem ne a nebã fãa.

¹⁶ A Seruza biig a Zoaab n dag n yaa tãb-biisã naaba, la a Akiluub biig a Zozafat n dag n yaa tẽngã seb-bĩngda.

¹⁷ A Akituub biig a Sadok ne a Abiyataar biig a Ayimelɛk n dag n yaa maan-kʋʋdba.

¹⁸ A Seraza rag n yaa seb-gʋnda. A Zehozada biig a Benaya sooga a Davɩɩd gũudb nins sẽn yaa a Kerɛt ne Pelɛt buudã, la a Davɩɩd kambã n dag n yaa maan-kʋʋdba.