2 Sãmwɛlle 7 - WẼNNAAM SEBRE 2014

Wẽnnaam kãabg ne a Davɩɩde

¹ Wakat ning rĩm a Davɩɩd sẽn wa n kẽ a na-zakẽ wã, Sẽn-Ka-Saab kɩtame t'a bɛɛbã sẽn gũbg-a wã bas-a laafɩ.

² La daar a yembre, rĩm a Davɩɩd yeela Wẽnnaam no-rɛɛs a Natã yaa: «Gese, fo neeme tɩ mam bee roog sẽn me ne raad sẽn yaa sõama pʋga, tɩ Wẽnnaam kaoolã koglgã yaool n be fu-roog pʋga.»

³ A Natã yeela rĩmã yaa: «Bɩ y maan wa yãmb sẽn tags bũmb ningã, tɩ bala, Sẽn-Ka-Saab bee ne-yã.»

⁴ La badaar yʋngo, Sẽn-Ka-Saab goma ne a Natã n yeele:

⁵ «Kẽng n tɩ yeel mam tʋmtʋmd a Davɩɩd yaa: Ad Sẽn-Ka-Saab koɛɛga: ‹Ka Foom n na n me roog n kõ maam tɩ m zĩnd a pʋgẽ ye.

⁶ Bala, mam sẽn yiis Israyɛll nebã Ezɩpt tẽngã daar n tãag rũndã, mam ka tol n zĩnd roog pʋgẽ ye. Mam dag n bee fu-roog pʋgẽ n kẽnd ne yãmba.

⁷ Zĩis nins fãa mam sẽn tall Israyɛll nebã n kẽna, mam ka tol n yeel Israyɛll taoor soab baa a ye tɩ yaa bõe tɩ b ka me roog ne raad sẽn yaa sõama n kõ-m ye.› »

⁸ Dẽ, Sẽn-Ka-Saab yeela a Natã t'a yeel a Davɩɩd tɩ Saasẽ-Pãng-Soabã yeelame: «Fo rag n bee weoogẽ n gũud rũmsi, tɩ mam yiis foom beenẽ tɩ f wa lebg Israyɛll sẽn yaa mam nebã rĩmã.

⁹ Mam zĩnda ne foom zĩis nins fãa fo sẽn kẽngã, la mam kʋʋ fo bɛɛbã f taoore, la m kɩt tɩ f yʋʋrã yi wa nin-kãsems nins sẽn be dũni wã zugã yʋy sẽn yi wã.

¹⁰ Mam kõo Israyɛll sẽn yaa mam nebã zĩiga, la mam vigl-a lame t'a pa beenẽ, n ka leb n vigs ye, tɩ nin-wẽnsã me da leb n yaal-a wa pĩndã,

¹¹ wakat ning mam sẽn dag n vigl taoor dãmb tɩ b soog Israyɛll sẽn yaa mam nebã ye. Mam fãaga foom f bɛɛbã fãa nusẽ n kɩt tɩ f zĩnd bãane. Sẽn-Ka-Saab wilgda foom tɩ b na n kɩtame tɩ b roogã me.

¹² Fo daarã sã n wa ta, tɩ f ki n bʋʋg f saam-dãmbã, mam na n kɩtame tɩ f biig a ye sẽn na n yi fo pendẽ wã ledg fo zĩigẽ n dɩ naamã, la mam na n kɩtame t'a naamã tall pãnga.

¹³ Yaa yẽnda n na me roog mam yʋʋrã yĩnga. La mam na n kɩtame tɩ yẽnda yagensã rɩ naam wakat fãa.

¹⁴ Mam na n yɩɩ yẽnda ba, la yẽnda na n yɩɩ mam biiga. Yẽnda sã n beege, mam na n sɩbg-a-la wa ned sẽn sɩbgd a biiga.

¹⁵ Mam ka na n tol n bas yẽnda wa mam sẽn dag n bas a Sayull n deeg a naamã n kõ foomã ye.

¹⁶ Wakat fãa, ned kõn tol n kong sẽn na n soog fo roogã ne f rĩungã ye, la fo naamã na n yalsa kãenkãe wakat fãa.»

¹⁷ Dẽ, a Natã rɩka gom-kãensã fãa ne vẽneg-kãngã fãa, n tɩ togs a Davɩɩde.

¹⁸ Rĩm a Davɩɩd kẽng n tɩ yalsa Sẽn-Ka-Saab taoor n yeele: «Wẽnnaam Sẽn-Ka-Saabo, mam yaa ãnda, la m doogã bee yɛ tɩ y tall maam hal n ta zĩig ning mam sẽn beẽ dũndã wã?

¹⁹ Zu-soab a Sẽn-Ka-Saabo, rẽ ket n ka sek ye, tɩ y leb n gomd y sẽn tar saagr ning y tʋmtʋmdã yagens wɛɛngẽ, wakat sẽn wat yĩnga? Zu-soab a Sẽn-Ka-Saabo, mam yaool n yaa ninsaal bala!

²⁰ Maam a Davɩɩd na n leb n yeela yãmb tɩ bõe? Sẽn-Ka-Saabo, yãmb mi y tʋmtʋmdã.

²¹ Yaa yãmb goamã yĩnga, la sẽn ta yãmb yamã yĩnga, la yãmb maan bõn-kãsem-kãensã n wilg y tʋmtʋmdã.

²² Wẽnnaam Sẽn-Ka-Saabo, yãmb sɩd yaa kãsengã, bala, sã n yaa ne tõnd sẽn wʋm tɩ b gomdã, ned ka be n zem yãmb ye. Wẽnd a to ka be tɩ sã n ka yãmb ye.

²³ Rẽ yĩnga, buud bee dũni wã zugu, n yaa wa Israyɛll sẽn yaa yãmb nebã, tɩ b wẽnnaam-dãmbã fãag-b tɩ b lebg b nebã, la b kõ-b yʋʋre? Yãmb nebã taoore, yãmb maana bõn-kãsemse, ne bõn-yɛɛsds y tẽngã yĩnga, n fãag bãmb n yiis Ezɩpt tẽms toay-toay pʋse, ne b wẽnnaam-dãmbã nusẽ, tɩ b lebg yãmb mengã nebã.

²⁴ Sẽn-Ka-Saabo, yãmb yãka Israyɛll nebã n kɩt tɩ b lebg yãmb neb wakat fãa yĩnga, tɩ yãmb a Sẽn-Ka-Saab lebg bãmb Wẽnnaam.

²⁵ Moasã, Wẽnnaam Sẽn-Ka-Saabo, kɩt-y tɩ gomd ning yãmb sẽn gom ne maam a yãmb tʋmtʋmdã ne a yagensã wɛɛngẽ wã paam pids wakat fãa. Maan-y wa y sẽn yeelã.

²⁶ Bɩ yãmb yʋʋrã kell n yɩ kãseng wakat fãa, tɩ nebã yeel tɩ Saasẽ-Pãng-Soab a Wẽnnaam yaa Israyɛll Wẽnnaam! Bɩ yãmb tʋmtʋmd a Davɩɩd doogã kell n paam pãnga yãmb taoore.

²⁷ Bala, Saasẽ-Pãng-Soabã sẽn yaa Israyɛll Wẽnnaam, yãmb vẽnega mam sẽn yaa yãmb tʋmtʋmdã ne bõn-kãnga, n yeel tɩ y na n mee roog n kõ-ma. Yaa rẽ yĩng tɩ m pɛlg keemẽ tɩ m pʋʋsd yãmb a woto.

²⁸ Wẽnnaam Sẽn-Ka-Saabo, yãmb yaa Wẽnnaam la y goamã yaa sɩda, la yãmb n yeel tɩ y na n maana bõn-neer a woto n kõ mam sẽn yaa yãmb tʋmtʋmdã moasã.

²⁹ Woto yĩnga, Wẽnnaam Sẽn-Ka-Saabo, bɩ y ning-y y tʋmtʋmdã roog barka, t'a tõe n zĩnd yãmb taoor wakat fãa. Bala, yaa yãmb a Sẽn-Ka-Saab n gome, la yaa yãmb barka yĩnga, la m yagensã na n paam bark wakat fãa.»