2 Sãmwɛlle 6 - WẼNNAAM SEBRE 2014

A Davɩɩd tɩ talla kaoolã koglgã n wa

¹ A Davɩɩd leb n tigma Israyɛll tãb-biisã fãa, la b sõorã yaa neb tus-pis-tã.

² A Davɩɩd ne neb nins sẽn dag n be ne yẽnda wã yii Baall-Zʋʋda n na n kẽng n tɩ rɩk Wẽnnaam kaoolã koglgã n wa. Yaa kogl-kãng taoore, la b boond Saasẽ-Pãng-Soabã sẽn zĩ Serubẽ dãmbã sʋkã yʋʋre.

³ Bãmb kẽnga a Abinadaab zakã sẽn be tãngã zugã, n tɩ yiis kaoolã koglgã n dogl sarɛt-paalg pʋgẽ. A Abinadaab kambã, a Uuza ne a Akiyo n dag n get sarɛt-paalgã yell t'a kẽnda.

⁴ Dẽ, bãmb dɩka kaoolã koglgã, la a Akiyo lʋɩɩ koglgã taoore.

⁵ A Davɩɩd ne Israyɛll buudã fãa rag n deemda ne yʋʋm-teed buud toor-toor Sẽn-Ka-Saab taoore. Yaa pendse, kʋla, sɩlsãgse, waase, la ne kɛma.

⁶ Bãmb sẽn wa n ta a Nakõ zɛɛgẽ wã, niigã lengame n maan tɩ Kãabg-koglgã kɩlle, t'a Uuza tẽeg a nug n gãd-a.

⁷ Dẽ, Sẽn-Ka-Saab sũur puuga ne a Uuza, la bãmb kɩtame t'a ki zĩig pʋgẽ, yẽnda sẽn maan sẽn kisã yĩnga. Woto, a Uuza kii Wẽnnaam kaoolã koglgã sɛɛgẽ.

⁸ A Davɩɩd pɛlengã yɩka wʋsgo, Sẽn-Ka-Saab sẽn sɩbg a Uuza ne sɩbgr a woto wã yĩnga. B pʋda zĩ-kãng yʋʋr tɩ Perets-Uuza, sẽn dat n togs t'a ‹Uuza sɩbgr zĩiga›, la zĩigã yʋʋr ket n yaa woto hal tɩ ta rũndã.

⁹ Badaare, Sẽn-Ka-Saab rabeem yõka a Davɩɩd t'a yeele: «Mam na n maana a wãn n tõog n deeg Sẽn-Ka-Saab kaoolã koglgã m nengẽ?»

¹⁰ A Davɩɩd ka sak n na n deeg Sẽn-Ka-Saab kaoolã koglgã n kẽes a tẽngã pʋgẽ ye. Yẽnda kɩtame tɩ b tek n sik-a Gat rao a Obɛɛd-Edom yiri.

¹¹ Sẽn-Ka-Saab kaoolã koglgã paa Gat rao a Obɛɛd-Edom zakẽ wã kiis a tãabo. Dẽ, Sẽn-Ka-Saab ninga a Obɛɛd-Edom ne a yirã rãmb fãa barka.

Kãabg-koglgã kẽnga Zeruzalɛm

¹² B tɩ togsa dĩm a Davɩɩd tɩ Sẽn-Ka-Saab ninga a Obɛɛd-Edom yirã rãmba, ne yẽnda sẽn so bũmb ninsã fãa barka, Wẽnnaam kaoolã koglgã yĩnga. Dẽ, a Davɩɩd yikame n kẽng n tɩ tall Wẽnnaam kaoolã koglgã sẽn be a Obɛɛd-Edom zakẽ wã, n wa a Davɩɩd tẽngã pʋgẽ ne sũ-no-kãsenga.

¹³ Neb nins sẽn tʋk kaoolã koglgã sã n kẽn n maan nao-yakem a yoobe, a Davɩɩd kʋʋda loalga, ne lull sẽn nob n tar kaam n maan maoongo.

¹⁴ A Davɩɩd rag n dɩka maan-kʋʋr fuug sẽn wʋg ne lamd gĩs n sẽgen a sɛɛga, n saood warb ne a pãngã fãa Sẽn-Ka-Saab taoore.

¹⁵ A Davɩɩd ne Israyɛll buudã fãa kɩtame tɩ b tall Sẽn-Ka-Saab kaoolã koglgã n kaasdẽ la b peebd bard n watẽ.

¹⁶ Sẽn-Ka-Saab kaoolã koglgã sẽn wa n kẽed a Davɩɩd tẽngã pʋgẽ wã, a Sayull bi-pugl a Mikall dag n bee roog peem-lɛɛgẽ n lɩk n getẽ. A Mikall yãame tɩ rĩm a Davɩɩd yɩgd n kɩdemdẽ, la a saood Sẽn-Ka-Saab taoore, la a paooga a Davɩɩd a sũurẽ.

¹⁷ B sẽn tall Sẽn-Ka-Saab kaoolã koglgã n wa wã zugẽ, b ning-a-la fu-roog ning a Davɩɩd sẽn dag n segl a yĩnga pʋgẽ. A Davɩɩd maana maand sẽn yõogd bugum, ne zems-n-taar maand Sẽn-Ka-Saab taoore.

¹⁸ A Davɩɩd sẽn maan maoong sẽn yõogd bugmã ne zems-n-taar maoongã n sɛ, a ninga nebã zug bark ne Sẽn-Ka-Saab sẽn yaa Saasẽ-Pãng-Soabã yʋʋre.

¹⁹ La dĩm a Davɩɩd kɩtame tɩ b pʋɩ Israyɛll nin-buiidã fãa rɩɩbo, b raopa ne b pagba, la ned kam fãa paama bur-yend ne nem-sẽedgo, la sibi. La ned fãa lebg n kuila a yiri.

²⁰ A Davɩɩd lebg n kuilame n na n tɩ ning a yirã rãmb barka. La a Sayull bi-pugl a Mikall yiime n seg a Davɩɩd n yeel-a yaa: «Israyɛll dĩmã paama ziir rũndã. Bala, bãmb yeesa b fut b tʋmtʋmdbã ne yem-pogsã taoore, n maan b meng wa nin-yaalga.»

²¹ A Davɩɩd leok-a lame yaa: «Yaa Sẽn-Ka-Saab taoor la mam maan bõn-kãngã. Bãmb basa fo ba wã ne f buudã fãa, la b yãk maam tɩ m yɩ Israyɛll nebã rĩmã. Dẽ, yaa Sẽn-Ka-Saab-kãng taoor la mam sao yã.

²² Mam nongẽ lame tɩ b yaal maam n yɩɩd a woto, la m sik m meng n paase. La baoosgo, mam na n kell n paama waoogre, yem-pogs nins fo sẽn gomd-b yellã taoore.»

²³ La a Sayull bi-pugl a Mikall ka tol n paam biig la a tɩ ki ye.