2 Sãmwɛlle 22 - WẼNNAAM SEBRE 2014

A Davɩɩd fãagr yɩɩlle

¹ Daar ning Sẽn-Ka-Saab sẽn fãag a Davɩɩd ne a bɛɛbã fãa wã, la b fãag-a a Sayull nugẽ wã, yẽnda goma ne Sẽn-Ka-Saabo.

² A yeelame yaa: «Sẽn-Ka-Saab yaa mam pĩiga, bãmb yaa mam pãng zĩiga, la b yaa mam fãagda.

³ Bãmb yaa mam Wẽnnaam, la b yaa mam pĩiga. Mam zĩ-soalgdg yaa bãmb nengẽ. Bãmb yaa mam gãongo, la pãng sẽn fãagd maam. Mam pãng zĩiga, la m zĩ-soalgdga. Yãmb n fãagd maam nen-keglem dãmbã nugẽ.

⁴ Mam sã n zẽk m koɛɛg n yeele: ‹Bɩ Sẽn-Ka-Saab yʋʋr paam pẽgre›, bãmb fãagda maam m bɛɛbã fãa nusẽ.

⁵ Bala, kũum ko-wĩis rag n gũbga maam, la sãoong ko-zoetem kẽes-m-la rabeem.

⁶ Kɩɩm-kulg wĩy rag n vila maam, kũum gãmbr dag n bee mam taoore.

⁷ Mam sũ-sãangã pʋga, mam boola Sẽn-Ka-Saabo, mam boola m Wẽnnaamã tɩ b sõng-ma. Bãmb zĩnda b ro-sõngẽ wã n wʋm m boaalã. Mam sẽn bool-b n kot sõngrã b wʋmame.

⁸ Tẽn-gãongã rigimdame n miime, la saasẽ yẽbgrã rĩmsame. Wẽnnaam sũ-puugrã rĩmsa bãmba.

⁹ Bug-zõos rag n yita bãmb yõyẽ wã n zẽkdẽ, bug-witim n dag n yit bãmb noorẽ, bug-pãrs me n dag n yit be.

¹⁰ Sẽn-Ka-Saab zõnega sa-gãongã n tab n sigi, bãmb taba sawad-taok n sigi.

¹¹ Bãmb zomba Serubẽ n yɩgda, bãmb zomba sobg pɩgs n puki.

¹² Bãmb dɩka lik n maan fu-roog n gũbg b menga, wa koom sẽn be sawad-lik pʋgẽ.

¹³ Sa-yãgb ning sẽn deng bãmb taoorã pʋgẽ, bug-pãrs n yit beenẽ.

¹⁴ Sẽn-Ka-Saab zĩnda saasẽ n tãse. Sẽn-Ka-To kɩtame tɩ b wʋm b koɛɛg rãamde.

¹⁵ Bãmb tãoo pɛɛm n sãeeg b bɛɛbã, la b tʋm sa-yãgb n kẽes bɛɛbã rabeem.

¹⁶ Sẽn-Ka-Saab sẽn tãsã, ko-kãsengã tẽngr pukame, b vʋʋsmã ne b yõ-bogdã pemsem kɩtame tɩ dũni wã yẽbgr puki.

¹⁷ Sẽn-Ka-Saab zĩnda yĩngr n tẽeg b nug n gãd maam n yiis ko-kãsemsã pʋga.

¹⁸ Bãmb fãaga maam m bɛyã sẽn tar pãngã nugẽ. B fãag-m-la sẽn kis-b maam n tar pãng n yɩɩd maamã nugẽ.

¹⁹ Nin-bãmbã bẽda toogã sẽn paam maamã daare, n na n zab ne maam, la Sẽn-Ka-Saab wa n sõnga maam.

²⁰ Sẽn-Ka-Saab fãaga maam, n yols-ma. B sẽn fãag-ma, yaa b sẽn nong-ma yĩnga.

²¹ Sẽn-Ka-Saab maana maam wa sẽn zems m tɩrlem. Bãmb keoo maam wa sẽn zems mam nus tʋʋm-sõamyã sẽn yaa to-to wã.

²² Bala, mam saka Sẽn-Ka-Saab raabã, n ka bʋdg n bas m Wẽnnaamã wa nin-wẽnsã ye.

²³ Mam tagsda Sẽn-Ka-Saab no-tũudsã fãa yelle. La mam ka zãagd m meng ne bãmb tõodã ye.

²⁴ Mam maana burkĩnd ne bãmba, n gũus m meng ne yel-wẽn buud fãa.

²⁵ Dẽ, Sẽn-Ka-Saab keoo maam wa sẽn zems m tɩrlem, wa sẽn zems m sẽn maan sõmblem ning bãmb nifẽ wã.

²⁶ Sẽn maand-a pʋ-peelem, yãmb maanda pʋ-peelem ne-a, sẽn yaa-a gãndaoog n yaa burkĩna, yãmb wilgda a soab y burkĩndlim.

²⁷ Sẽn maand-a sõmblem, yãmb wilgda a soab tɩ y yaa sõmblem soaba. La ned ning sẽn wilgd t'a tara yam, yãmb wilgd-a lame tɩ yãmb yam n yɩɩde.

²⁸ Yãmb fãagda nimbãan-dãmbã, la y sã n ges wuk-m-mens rãmbã, b sikda b mense.

²⁹ Yãmb a Sẽn-Ka-Saab n yaa mam vẽenem. Sẽn-Ka-Saab vẽnegda maam lik bida pʋgẽ.

³⁰ Ne yãmb pãnga, mam zoet n segda tãb-bi-sulli, ne mam Wẽnnaamã pãnga, mam gãndgda lalse.

³¹ Wẽnnaam soayã zemsa zãnga, Sẽn-Ka-Saab goamã yaa sɩda, la b yaa gãongo, neb nins fãa sẽn soonded bãmb nengẽ wã yĩnga.

³² Sã n ka Sẽn-Ka-Saabo, Wẽnnaam a to bee yɛɛnẽ? La ãndã n yaa pĩig kugri, sã n ka tõnd Wẽnnaamã?

³³ Wẽnnaam-kãng n yaa mam pãng zĩiga, la bãmb n manegd mam sore, tɩ zems zãnga.

³⁴ Bãmb n kɩtd tɩ mam naoã yaa faasg wa walg nao, la b sõngd maam tɩ m dʋʋd zĩ-zãongls zutu.

³⁵ Bãmb n zãmsd maam zabr sẽn zabd to-to, la b sõngd maam tɩ m yãagd zũud tãpo.

³⁶ Yãmb kõta maam y fãagrã tɩ yaa m gãongo, yãmb sẽn leokd maamã bɩɩsda maam.

³⁷ Yãmb sõngda maam tɩ m zoet n ka yɛɛdẽ ye. La m nao-sẽbã yaa kãenkãe tɩ m ka lagsdẽ ye.

³⁸ Mam digda m bɛɛbã, n tɩ sãam-ba, mam ka lebgd n ka sãam-b zãng ye.

³⁹ Mam sãamd-b lame, m kɛɛd-b lame n pase, tɩ b ka leb n tõe n yik ye. Bãmb lʋɩta tẽng tɩ m tabda.

⁴⁰ Yãmb kõta maam pãng tɩ m tõe n zabe, yãmb kɩtdame tɩ mam tõog m bɛɛbã.

⁴¹ Yãmb kɩtdame tɩ mam bɛɛbã zoet mam taoore, la m na n menesa sẽn kis-b maamã zãnga.

⁴² Bãmb yong n getame, la ned ka be n na n fãag-b ye. B boonda Sẽn-Ka-Saabo, la b ka leokd-b ye.

⁴³ Mam neema bãmb wa tẽng tom, mam bedsd-b lame, n tabd-b wa sor zug begdo.

⁴⁴ Yãmb fãagda maam ne m nebã zabã, la y lʋɩɩs-m bu-zẽms taoore, n kɩt tɩ m soog buud m sẽn dag n ka mi.

⁴⁵ Bu-zẽmsã belemda maam, mam sã n gom bala, b sakdame.

⁴⁶ Bu-zẽmsã pãng sɛɛme, b yita b zĩ-solgdsẽ wã, n digda.

⁴⁷ Bɩ Sẽn-Ka-Saab paam pẽgre, bɩ mam pĩigã paam barka! Bɩ Wẽnnaam sẽn yaa pĩig sẽn fãagd maamã paam waoogre.

⁴⁸ Wẽnnaam-kãng n dokd m sũur n kõt-ma, n kɩtdẽ tɩ m soogd bu-zẽmse.

⁴⁹ Bãmb n sõngd maam tɩ m põs m bɛɛbã! Yãmb zẽkda maam tɩ m yɩɩg m zabd-n-taasã, yãmb fãagda maam nin-toaag nugẽ.

⁵⁰ Rẽ n kɩt yaa Sẽn-Ka-Saabo, tɩ mam na n pẽg yãmb bu-zẽmsã sʋka, la m yɩɩl n pẽg yãmb yʋʋrã.

⁵¹ Sẽn-Ka-Saab maanda tʋʋm-kãsems n fãagd b rĩmã, bãmb wilgda b nonglem ne b nin-tũusdgã. Bãmb wilga b nonglem ne a Davɩɩde, la ne a Davɩɩd yagensã, wakat sẽn kõn sa yĩnga.»