2 Sãmwɛlle 20 - WẼNNAAM SEBRE 2014

A Seba kɩɩsgo

¹ Nin-yoog a yembr n dag be Gilgalle, t'a yʋʋr boondẽ t'a Seba, yẽnda yaa Benzame buudã ned a Bikri biiga. A Seba peeba baorg n yeele: «Tõnd bũmb ka be a Davɩɩd nengẽ ye, Tõnd ka tar lagem-n-taar ne a Izayi biigã ye. Israyɛll nebã, bɩ ned kam fãa lebg n kuil a yiri.»

² La Israyɛll nebã fãa basa a Davɩɩd n tũ a Bikri biig a Seba. La Zʋʋda nebã kell n tũu b rĩmã n yãag-b Zʋrdẽ kʋɩlgã n tãag Zeruzalɛm.

³ A Davɩɩd kuila a yir Zeruzalɛm, la yẽnda rɩka pʋg-rɩkds piigã yẽnda sẽn dag n bas tɩ b gũ zakã n bao zak toor zall n ning-ba, n pag-ba. Yẽnda rag n geta b yelle, la a ka leb n kẽed ne-b ye. B kell n paga pʋg-bãmb be, tɩ b vɩɩmd wa pʋg-kõap n tãag b kũum.

⁴ Rĩmã yeela a Amasa yaa: «Bool Zʋʋda nebã tɩ b wa kaanẽ ra-tãta, la bɩ fo mengã me tũ bãmb n wa.»

⁵ A Amasa kẽngame n na n tɩ bool Zʋʋda nebã, la yẽnda kaoosame n yɩɩd rĩmã sẽn dag n kõ wakat ningã.

⁶ Woto, a Davɩɩd yeela a Abisayi yaa: «Gese, a Bikri biig a Seba na n maana tõnd wẽng n yɩɩd a Absalom. Bao neb tɩ y kẽng n tɩ yõk-a, t'a ra tõog n bao tẽms sẽn tar lals n kẽ n soond tɩ y ka yãnd-a ye.»

⁷ A Zoaab ne a tãb-biisã yiime, tɩ Kerɛt nebã, ne Pelɛt nebã ne b gãndaadã fãa yi Zeruzalɛm n kẽng n na n tɩ yõk a Bikri biig a Seba.

⁸ La bãmb sẽn ta Gabawõ pĩig kug-kãsengã sɛɛga, la a Amasa sẽn be waoongẽ, n ta n yals bãmb taoore. A Zoaab rag n yera a zabr futu, n lulg a sʋʋg a sɛɛg sẽbdgẽ, la yẽnda sẽn wa n kolgd a Amasa wã, sʋʋgã lʋɩɩme.

⁹ A Zoaab pʋʋsa a Amasa n gãd a toɛɛngã ne a rɩtg n mok-a n yeele: «Laafɩ beeme m saam-biiga?»

¹⁰ La a Amasa ka gũus ne sʋʋgã sẽn dag n be a Zoaab goabg nugẽ wã ye. La a Zoaab kõsa a Amasa pʋgã t'a yãada yʋlem tẽnga, la a ka leb n kõs-a n paas ye, kõs-vukã bal n kʋ a Amasa. A Zoaab ne a ba-biig a Abisayi kẽnga taoor n na n pʋgl a Bikri biig a Seba.

¹¹ A Zoaab nebã sʋka, ned a yembr n yaas a Amasa zug n yeel yaa: «Bɩ neb nins fãa sẽn dat a Zoaab ne a Davɩɩdã tũ a Zoaabe.»

¹² A Amasa rag n dɩga tẽng a mengã zɩɩm pʋgẽ, sorã zugu. La rao-kãng sẽn yã tɩ nebã sã n ta zĩ-kãngã, b yalsdame wã, a vuuga kũumã n serg sorã zugu, n tɩ lob pʋʋg pʋgẽ, n bao fuug n pil-a.

¹³ Yẽnda sẽn vuug a Amasa kũumã n serg sorã zugã, nebã fãa yaool n tũ a Zoaab n na n tɩ yõk a Bikri biig a Seba.

¹⁴ A Seba pɩʋʋga Israyɛll buudã fãa tẽms hal tɩ ta Abɛll-Bɛt-Maaka, la Berim nebã fãa tũ a Seba n kẽ tẽngã pʋgẽ.

¹⁵ A Zoaab ne neb nins sẽn be ne yẽnda wã kẽng n tɩ gũbga Abɛll-Bɛt-Maaka, n na n zab ne-a n paam n yõk a Seba. Bãmb zama tom tẽngã lalg sɛɛgẽ, la b tuu lalgã tẽngre, n na n lub-a.

¹⁶ La tẽngã pag a yembr sẽn tar yam zĩnda tẽngã pʋg n kelem n yeel yaa: «Kelg-y-yã! Kelg-y-yã! M kotame tɩ y yeel a Zoaab t'a kolg ka tɩ m dat n goma ne-a.»

¹⁷ La a Zoaab kolgame, tɩ pagã sok-a tɩ yaa yẽnda la a Zoaabã bɩ? La a Zoaab yeelame: «Yaa maam.» Pagã yeelame: «M soaala kelg-y mam goamã.» La a Zoaab yeelame: «Mam kelgdame.»

¹⁸ Pagã yeelame: «Kʋdem-dãmbã rag n yetame: Kẽng-y Abɛll n tɩ sok n paam saglgo. La b sã n mi n maan a woto, yellã manegdame.

¹⁹ Tõnd tẽngã bee Israyɛll tẽms nins sẽn tar-b laafɩ la pʋ-peelem n tɩ yɩɩdã sʋka. La yaa bõe tɩ yãmb baood n sãam tẽng sẽn yaa wa ma Israyɛll soolmã pʋgẽ? Yaa bõe tɩ y rat n sãam tẽng ning Sẽn-Ka-Saab sẽn so wã?»

²⁰ A Zoaab yeelame yaa: «Kõn tol n yɩ a woto abada. Mam kõn menes tẽngã, wall m sãam-a ye.

²¹ Yellã ka bũmb a woto ye. La yaa t'a Bikri biig a Seba sẽn yit Efrayiim soolem ning sẽn be tãms sʋkã, n yik n dat n zab ne rĩm a Davɩɩde. Yiis-y yẽnda a yembr bal n kõ-ma, la m na loog n bas y tẽngã.» Pagã yeela a Zoaab yaa: «Beneere, b na n loba a zugã lalgã poor tɩ y rɩke.»

²² La pagã kẽngame n tɩ gom ne tẽngã nebã fãa ne yam. La b fiuuga a Bikri biig a Seba zugã n lob yɩng lalgã poor t'a Zoaab rɩke. La a Zoaab peeba baorg t'a nebã loog n bas tẽngã, ned kam fãa leb a yiri. La a Zoaab me lebg n leba rĩmã nengẽ Zeruzalɛm.

A Davɩɩd tʋmtʋmdbã

²³ A Zoaab sooga Israyɛll tãb-biisã fãa, t'a Zehozada biig a Benaya soog Kerɛt ne Pelɛɛg nebã,

²⁴ t'a Adoram yaa tʋʋm-wɛglã yel-gɛta. A Ahiluud biig a Zozafat n yaa seb-bĩngda.

²⁵ A Seeva n yaa seb-gʋnda, t'a Sadok ne a Abiyataar yaa maan-kʋʋdba.

²⁶ La Yayɩɩr dao a Iira me n yaa a Davɩɩd maan-kʋʋd a yembre.