2 Sãmwɛlle 2 - WẼNNAAM SEBRE 2014

A Davɩɩd lebga Zʋʋda nebã rĩmã

¹ Dẽ poore, a Davɩɩd kolga Sẽn-Ka-Saab n sok-b t'a kẽng Zʋʋda tẽng a yembr pʋgẽ bɩ? La Sẽn-Ka-Saab leokame n yeel t'a kẽnge. A Davɩɩd soka Sẽn-Ka-Saab tɩ yɛɛnẽ la a segd n kẽnge? Dẽ, Sẽn-Ka-Saab yeel-a lame t'a kẽng Ebrõ.

² A Davɩɩd kẽnga be ne a pagb a yiibã: Ya a Zizreyɛll biig a Ahinoam ne Karmell biig a Abigayɩll sẽn dag n yɩ a Naball pagã.

³ A Davɩɩd kɩtame tɩ neb nins sẽn dag n be ne yẽnda wã ned fãa peeg a zak rãmb n kẽng n tɩ zĩnd Ebrõ tẽmsã pʋse.

⁴ Zʋʋda nebã waa beenẽ, la b sudga a Davɩɩd zug rĩung kaam n kɩt t'a lebg Zʋʋda buudã rĩmã. Neb n tɩ wilg a Davɩɩd tɩ Yabɛɛs nebã sẽn be Galaadã muma a Sayulli.

⁵ A Davɩɩd tʋma neb tɩ b tɩ yeel Yabɛɛs nebã yaa: «Bɩ Sẽn-Ka-Saab ning y zut barka, yãmb sẽn maan y rĩm a Sayull neere, n mum-a wã yĩnga.

⁶ La moasã, bɩ Sẽn-Ka-Saab wilg b sõmblem ne yãmba, n maan-y neere. La mam me na n maana yãmb neere, y sẽn maan bõn-kãngã wã yĩnga.

⁷ La moasã, bɩ y keng y mens n yɩ gãndaado, yaa sɩd tɩ yãmb zu-soab a Sayull kiime, la Zʋʋda nebã sudga maam rĩung kaam n kɩt tɩ m lebg rĩmã.»

Zabr zĩnda a Davɩɩd ne a Sayull roogã sʋka

⁸ A Neer biig a Abneer sẽn dag n yaa a Sayull tãb-biisã naabã peega a Sayull biig a Is-Bosɛt n kẽng Mahanayim.

⁹ A Abneer kɩtame t'a Is-Bosɛt lebg Galaad ne Asʋʋr la Zizreyɛll ne Efrayiim ne Benzame, rat n yeel tɩ Israyɛll nebã fãa naaba.

¹⁰ A Sayull biig a Is-Bosɛt dag n tara yʋʋm pis-naas a sẽn wa n lebg Israyɛll naabã, la yẽnda rɩɩ naamã yʋʋm a yiibu. Wakat-kãng tɩ Zʋʋda nebã rag n bee ne a Davɩɩde.

¹¹ A Davɩɩd sẽn yɩ rĩm Ebrõ n soog Zʋʋda wã, yɩɩ yʋʋm a yopoe la kiis a yoobe.

¹² A Neer biig a Abneer ne a Sayull biig a Is-Bosɛt nebã yii Mahanayim n kẽng Gabawõ.

¹³ La a Seruza biig a Zoaab yiime n seg bãmb Gabawõ bãka noore. A Davɩɩd nebã bee bãka kɩreng a yembre, t'a Is-Bosɛt nebã be bãka kɩreng a to.

¹⁴ A Abneer yeela a Zoaab tɩ kom-bɩɩsã yik n zab ne taaba. La a Zoaab yeelame tɩ b yiki.

¹⁵ Dẽ, bãmb yikame tɩ b sõorã zems taaba. Benzame neb piig la a yiib n yik a Is-Bosɛt yĩnga, la a Davɩɩd neb me piig la a yiib n yiki.

¹⁶ Bãmb ned kam fãa gãda a zabd-n-taaga zugu, n kõs a lʋgrã ne sʋʋg tɩ b lagem taab n lʋɩ. Rẽ kɩtame tɩ zĩ-kãng sẽn pẽ Gabawõ wã yʋʋr boondẽ tɩ zabr sʋʋs pʋʋgo.

¹⁷ Badaare, zabrã yɩɩ toog wʋsgo, la a Davɩɩd nebã tõoga a Abneer ne Israyɛll nebã.

¹⁸ La a Seruza kom-dibli a yiib n dag n be beenẽ: A Zoaabe, a Abisayi, ne a Azayɛlle. La a Azayɛll naoã rag n yaa faasg wa walga.

¹⁹ Yẽnda riga a Abneer n ka bʋdg goabg wall rɩtg n bas-a ye.

²⁰ A Abneer wẽnegame n ges a poorẽ n sok tɩ yaa a Azayɛll bɩ? La a Azayɛll leokame tɩ yaa yẽnda.

²¹ A Abneer yeel-a lame t'a bʋdg n yõk a tãb-biig a ye n dees a teedã, la a Azayɛll ka sak n na n bʋdg n bas-a ye.

²² A Abneer leb n yeela a Azayɛll yaa: «Lebg n bas-ma, bõe yĩng tɩ mam na n kʋ-fo? Mam sã n kʋ foom, mam na n leb n maana a wãn n doog m zug f kẽem a Zoaab taoore?»

²³ La a Azayɛll zãgsame t'a ka na n lebg ye. Woto a Abneer kõsa a pʋgã ne a kãndã sɛɛg tɩ sãag n yi a poorẽ t'a lʋɩ n ki zĩig pʋgẽ. Neba sã n dag n kẽn n ta zĩig ning a Azayɛll sẽn ki wã, b yaasdame.

²⁴ A Zoaab ne a Abisayi riga a Abneer la wĩndga kõom wakate, b taa Amma kunkubrã sẽn be Giya yaanga, Gabawõ we-raoogã sor zugu.

²⁵ Benzame neb wʋsg tigmame n tũ a Abneer n tɩ yaas tãngã zugu.

²⁶ A Abneer boola a Zoaab n yeele: «Sʋʋg na n tara kɛɛb n ka vʋʋsdẽ sɩda? Yãmb ka mi t'a baoosg na n yɩɩ sũ-toog la? Dabʋr la fo na n yeel f nebã tɩ b bas b saam-biisã rigbu?»

²⁷ A Zoaab leokame: «Mam wẽenda ne Wẽnnaam sẽn vɩ, tɩ yãmb sã n dag n ka gome, dag n na n taa beoogo, tɩ nebã yaool n bas b saam-biisã rigbu.»

²⁸ A Zoaab peeba baorgo, la nebã fãa yalsame n ka leb n dig Israyɛll nebã ye, la b basa zabrã.

²⁹ Badaar yʋngã tõre, a Abneer ne a nebã kẽna Araba tẽngã pʋgẽ. Bãmb dʋʋga Zʋrdẽ kʋɩlgã, n tũ Bitrõ n ta Mahanayim.

³⁰ A Zoaab sẽn bas nebã rigb n lebg n kuilã, a tigma a nebã fãa, la yẽnda mikame t'a Azayɛll ne neb piig la a wɛ n dag n ka be.

³¹ La a Davɩɩd nebã kʋʋ a Abneer neb kobs-tã la pis-yoobe, sẽn yaa Benzame buudã.

³² Bãmb talla a Azayɛll kũumã n tɩ mum a ba yaoogẽ Betlehɛm. A Zoaab ne a nebã kẽna badaar yʋngã tõre, la b taa Ebrõ tɩ zĩigã yaool n yẽege.