2 Sãmwɛlle 18 - WẼNNAAM SEBRE 2014

B tõoga a Absalom nebã

¹ A Davɩɩd sõda neb nins sẽn be ne yẽnda wã, n kõ-b nanambse. Kẽer lebga neb tusr-tusr nanambse, tɩ kẽer lebg neb koabg-koabg nanambse.

² A Davɩɩd pʋɩɩ a tãb-biisã zĩis a tãabo, n kɩt t'a Zoaab soog sull a ye, t'a Seruya biig a Abisayi sẽn yaa a Zoaab yao wã soog a ye, tɩ Gat rao a Itayi me soog a ye. La rĩmã yeela nebã yaa: «Mam me na n yãaga yãmb n kẽng zabrã zĩigẽ.»

³ La nebã yeelame: «Da yãag-y tõnd n kẽng ye. Bala, ka yell ne bãmb tõnd neb kẽer sã n zoe, wall tõnd nebã pʋɩ-sʋk sã n ki ye. Yãmb yɩɩda tõnd neb tus-piiga. Sẽn yaa neer n yɩɩda, yaa tɩ yãmb pa tẽngã pʋgẽ n tʋmd tõnd sõngre.»

⁴ Rĩmã yeela bãmb yaa: «Beneere, mam na n maana wa yãmb sẽn datã.» Rĩmã yalsa tẽngã noor tɩ tãb-biisã yit koabg-koabga, la tusr-tusr n loogdẽ.

⁵ Rĩmã yeela a Zoaab ne a Abisayi la a Itayi yaa: «Mam yĩnga, bɩ y zoe m biig a Absalom nimbãanega.» La nebã fãa wʋma goam nins rĩmã sẽn yeel nanambsã fãa a Absalom yellã poorẽ wã.

⁶ Nebã yiime n kẽng weoogã pʋgẽ, n na n tɩ seg Israyɛll nebã, la bãmb zaba ne taab Efrayiim we-raoogã tɩɩs sʋka.

⁷ A Davɩɩd nebã tõoga Israyɛll nebã. Badaare, b kʋʋ bãmb neb tus pisi.

⁸ Zabrã wakate, nebã sãeegame n zabd zĩigã fãa. La neb nins sẽn ki we-raoogã pʋg b toorã sõor yɩɩda neb nins b sẽn kʋ ne sʋʋsã.

A Absalom kũum

⁹ A Absalom wa n mikame t'a Davɩɩd nebã teedga yẽnda neng ne nenga. Yẽnda rag n zaoo bõn-wɛɛga, la bõn-wɛɛgã zoeeme n tɩ kẽ tɩɩg tẽngre t'a Absalom zugã sẽgemd tɩɩgã willẽ, la yẽnda kell n yagemda beenẽ tɩ bõn-wɛɛga looge.

¹⁰ Ned a yembr n yãnde, n tɩ togs a Zoaab tɩ yẽnda yãnda a Absalom t'a yag tɩɩg zugu.

¹¹ A Zoaab soka nedã yaa: «Fo sɩd yãnd-a lame? Yaa bõe tɩ fo ka kʋ-a be bala? Mam dag n na kõẽ foom wanzuri wakɩ-koeems piig ne sẽbdga.»

¹² Nedã yeela a Zoaab yaa: «Ba b sã n ning wanzuri tusr mam nugẽ, mam ka na n sɩɩs rĩmã biig ye. Bala tõnd dag n wʋmda rĩmã sẽn dag n yet yãmb ne a Abisayi la a Itayi tɩ bãmb yĩnga, bɩ y ra sak tɩ bũmb maan a Absalomã.

¹³ Mam sã n dag n yag tɩ m ka wʋme, n kʋ a Absalom, rĩmã rag n na n wʋmame, la yãmb dag n na n foosa y nus n bas maam.»

¹⁴ A Zoaab yeel-a lame: «Mam ka na n sãam m weer ne foom ye.» A Zoaab rɩka kãn a tãab n kẽng n tɩ kõs a Absalom sũurã a sẽn ket n vɩ n yag tɩɩgã zug wakate.

¹⁵ La a Zoaab rakõap piigã sẽn zãad a zab-teedã wa n baasa a Absalom.

¹⁶ A Zoaab kɩtame tɩ b peeb baorgo, n yeel a nebã tɩ b bas Israyɛll nebã rigbu, la b sakame.

¹⁷ Bãmb rɩka a Absalom kũumã n lob bok pʋgẽ we-raoogã sʋka, la b zama kug wʋsg a zug t'a lebg kug-rʋre. La Israyɛll nebã fãa zoeeme n kuili.

¹⁸ A Absalom sẽn dag n ket n vɩ wakate, a kɩtame tɩ b pees kugr ning sẽn vig rĩmã long pʋgẽ wã, a meng tẽegr yĩnga. Bala, yẽnda rag n tagsame yaa: «Mam ka tar bi-ribl sẽn na n kɩt tɩ m yʋʋrã ra menem ye.» La yẽnda rɩka a meng yʋʋr n pʋd kugrã. La b boonda kug-kãng t'a Absalom kugr hal tɩ ta rũndã.

B togsa a Davɩɩd a Absalom kũum

¹⁹ A Sadok biig a Ayimaas yeelame: «M kos tɩ y Bas tɩ m zoe n tɩ togs rĩmã kiba-noogã, bala, Sẽn-Ka-Saab fãaga bãmb ne b bɛɛbã.»

²⁰ A Zoaab yeela yẽnda yaa: «Sã n ka daar a to, rũndã, fo ka na n kẽng n tɩ togs koe-kãngã ye. Bala, ka kiba-noog ye, yaa rĩmã biig n ki.»

²¹ Dẽ, a Zoaab yeela Kuus nedã yaa: «Kẽng n tɩ wilg rĩmã bũmb ning fo sẽn yã wã.» La Kuus nedã wõgemda a Zoaab taoore, n yik n wudg n looge.

²² A Sadok biig a Ayimaas leb n yeela a Zoaab yaa: «Ba sẽn na n yɩ-a soab bɩ yɩ! M kotame tɩ y bas tɩ mam me zoe n pʋgl Kuus nedã.» A Zoaab yeela a Ayimaas yaa: «M biiga, yaa bõe yĩng tɩ fo rat n zoe? Ka kibar togsg sẽn na n tall yõod fo yĩng ye.»

²³ A Ayimaas yeelame: «Sẽn na yɩl bɩ yɩ, mam na n zoe n kẽngame.» La a Zoaab yeel-a lame tɩ sã yaa a woto bɩ a zoe n kẽnge. La a Ayimaas zoeeme n tũ Zʋrdẽ tẽn-lamdã sor n deng Kuus nedã.

²⁴ A Davɩɩd dag n zĩi tẽngã noy a yiibã sʋka. La gũud a ye n dʋ bɛoongã sẽn be tẽngã rignoorã, n kẽng lalgã zugu, n tool n yãnd ned a ye sẽn zoet n watẽ.

²⁵ Gũuda zẽka a koɛɛg n togs rĩmã tɩ ned n zoet n watẽ. La rĩmã yeelame: «A soab sã n yaa a yembre, rẽnd a tara kiba-noodo.» La nedã sẽn wa n kolgd n paasdẽ,

²⁶ gũudã yãnda ned a to me sẽn zoet n watẽ. La gũudã leb n kelmame n yeel ned ning sẽn be-a tẽngã rignoorẽ wã yaa: «Gese, ned a to me n zoet n wat a yembre.» Rĩmã yeelame: «Yẽ me wata ne kiba-noogo.»

²⁷ Gũudã leb n yeelame: «Pipi soabã zoees wẽnda a Sadok biig a Ayimaas zoeese.» Rĩmã yeelame: «Yẽ yaa nin-sõngo. A wata ne kiba-noodo.»

²⁸ La a Ayimaas taame n zẽk a koɛɛg n yeel rĩmã yaa: «N-na! Laafɩ beeme!» Yẽnda wõgemdame n fõgen a neng tẽng n yeele: «Bɩ Sẽn-Ka-Saab sẽn yaa yãmb Wẽnnaamã yʋʋr paam waoogre. Bãmb kɩtame tɩ y tõog neb nins sẽn dag n zabd-b ne rĩmã sẽn yaa m soaalã.»

²⁹ Rĩmã sokame t'a Absalom bee laafɩ bɩ? A Ayimaas yeelame yaa: «Wakat ninga a Zoaab sẽn wa n tʋmd maam ne yãmb tʋmtʋmd a to wã, mam yãnda rãmbg kãsenga, la mam ka bãng rãmbgã võor ye.»

³⁰ Rĩmã yeel-a lame t'a kẽng n yals kɩrenga, la yẽnda kẽngame n tɩ yals kɩrengã.

³¹ La Kuus nedã me taame n yeel yaa: «Bɩ rĩmã sẽn yaa mam soaalã bãng kiba-noogã! Rũndã Sẽn-Ka-Saab fãaga yãmb ne neb nins sẽn dag n zabd-b ne yãmbã.»

³² Rĩmã soka Kuus nedã t'a Absalom yaa laafɩ bɩ? La Kuus nedã yeelame: «Bɩ m soaalã bɛɛbã ne neb nins fãa sẽn dat-b yãmb ne wẽnga yɩ wa bi-bɩ-kãngã.»