2 Sãmwɛlle 16 - WẼNNAAM SEBRE 2014

A Davɩɩd zo-rãmb ne a bɛɛba

¹ A Davɩɩd sẽn wa n yi tãngã zug n sigda, la a Mefibosɛt tʋmtʋmd a Siba sẽn wa n seg yẽnda. A Siba rag n tata bõens a yiib sẽn zɩlg bur kobs-yi ne reezẽ-gĩn-koeems koabga, la tɩɩs biis peoogo, la reezẽ rãam ne waooga.

² Rĩmã soka a Siba t'a rat n maana bõe ne woto fãa. La a Siba leokame: «N-na! Bõensã na yɩɩ yãmb ne y yirã rãmb bõn-zombdse, tɩ burã ne tɩɩsã biis yɩ y rakõapã rɩɩbo, tɩ reezẽ rãamã yɩ neb nins yaams sẽn na n yõk we-raoogẽ wã yĩnga.»

³ Rĩmã sok-a lame t'a Mefibosɛt sẽn yaa yẽnda soaal a Sayull biigã bee yɛɛnẽ. La a Siba leoka rĩmã yaa: «Yẽ paa Zeruzalɛm, bala, a tagsame tɩ daar ninga, Israyɛll nebã na n kõo yẽnda a ba wã naam dũndã.»

⁴ Rĩmã yeela a Siba yaa: «Beneere, a Mefibosɛt paoongã fãa lebga foom n so.» Dẽ, a Siba wõgemdame n yeele: «M soaala! Mam pʋʋsd-y-la barka, y sẽn maan-m neerã yĩnga.»

⁵ Rĩmã taa Bahurim. La gese, a Sayull roogã ned a yembr yʋʋr sẽn boond t'a Simeyi, n yaa a Gera biiga, n yi n yals n yɛdg a yãoog n kãabd a Davɩɩd kãab-beedo,

⁶ la a wʋkd kug n lobd a Davɩɩd ne a tʋmtʋmdbã. A Davɩɩd gãndaadã ne nebã rag n gũbga a Davɩɩd goabg la rɩtgo.

⁷ A Simeyi kãabsã pʋga, a rag n tʋʋda rĩm a Davɩɩd n yetẽ: «Kẽng n meneme! Menem n bao zĩiga! Nin-kʋʋdã! Nin-yaalgã!

⁸ Sẽn-Ka-Saab sɩbgda foom, fo sẽn kʋ a Sayull roogã nebã yĩnga. Fo maana a Sayull pãng n deeg a naamã n dɩtẽ. Yaa rẽ n kɩte, tɩ Sẽn-Ka-Saab me reeg fo naamã n kõ f biig a Absalom, n bas-f tɩ f be toog pʋgẽ. Bala fo yaa nin-kʋʋda.»

⁹ La a Seruza biig a Abisayi yeela rĩmã yaa: «N-na! Bõe yĩng tɩ b na n bas ba-kɩɩn-kãngã t'a tar yãmb n tʋʋd woto? M kot-y lame tɩ y bas tɩ m kẽng n tɩ fiuug a zugã!»

¹⁰ Rĩm a Davɩɩd yeelame: «Seruza kamba, yãmb toog ka be yel-kãngã pʋgẽ ye. Sã n yaa tɩ Sẽn-Ka-Saab n kõ nin-kãngã sor t'a tʋʋd maam woto, ned ka be sẽn tõe n leok-a ye.»

¹¹ A Davɩɩd leb n yeela a Abisayi ne a tʋmtʋmdbã fãa yaa: «Mam meng bi-roak sã n baood maam n dat n kʋ, Benzame buudã nin-kãngã sẽn maandã ka lingr ne maam ye. Bas-y-yã-a, la y ra maan-a bũmb ye. Sã n yaa Sẽn-Ka-Saab n yeel-a t'a tʋʋs maam, bɩ a tʋ-ma!

¹² Daar ninga, Sẽn-Ka-Saab na yã m nimbãanegã, n tek kãab-wẽng ning sẽn paamd maam dũndã wã tɩ lebg kãab-noogo.»

¹³ A Davɩɩd ne a nebã kell n dɩka b sor n loogdẽ, la a Simeyi rag n bee tãngã kɩreng a yembrã, n kẽnd n yegd-ba. La yẽnda rag n kẽndame, la a ket n tar a Davɩɩd tʋya, la a toond n lobd-b kuga, la a wʋkd tom n fẽed-ba.

¹⁴ Rĩmã ne a nebã sẽn wa n na n ta Zʋrdẽ kʋɩlgã noorã, tɩ b fãa yɛɛ wʋsgo. Dẽ, b zĩnda beenẽ n vʋʋse.

A Husayi ne a Ayitofɛll Saglse

¹⁵ Wakat-kãnga, a Absalom kẽe Zeruzalɛm ne Israyɛll nebã fãa, la a Ayitofɛll me rag n bee ne yẽnda.

¹⁶ La Ark tẽng rao a Husayi sẽn yaa a Davɩɩd zoa wã sẽn ta a Absalom nengẽ, a zẽka a koɛɛg n yeele: «N-na! Wẽnd na kaoos-yã! Wẽnd na kaoos-yã!»

¹⁷ La a Absalom soka yẽnda yaa: «Fo pʋ-peelmã ne f zoa a Davɩɩdã la woto tɛk bɩ? Yaa bõe tɩ f ka tũ f zoa wã n looge?»

¹⁸ A Husayi leoka a Absalom yaa: «Maam n dag n ka rate. Bala, mam bee Sẽn-Ka-Saab ne Israyɛll nebã fãa sẽn yãk-a soab t'a yɩ rĩmã poorẽ, la mam na n paa ne yẽnda!

¹⁹ Ba sã n ka rẽ menga, mam ka tʋmd ned yaar yĩng ye. Yãmb yaa mam zoa wã biiga, bɩ bõe? Dẽ wã, mam sẽn dag n tʋmd yãmb ba wã yĩng to-to wã, mam na n tʋma a woto me yãmb yĩnga.»

²⁰ A Absalom yeela a Ayitofɛll yaa: «Bɩ y yẽs ne taab tɩ d bãng d sẽn segd n maan-a soaba!»

²¹ Dẽ, a Ayitofɛll yeela a Absalom yaa: «Kẽng-y n tɩ gãand-y y ba wã pʋg-rɩkds nins b sẽn bas tɩ b yõd n gũ na-zakã. Yãmb sã n maan woto, wilgdame tɩ beem n be yãmb ne y ba wã sʋka. Rẽ, Israyɛll nebã fãa na n wʋma bõn-kãnga, la neb nins fãa sẽn be ne yãmbã na n paama raoodo.»

²² Woto, b tɩ tilga fu-roog na-yirã bɛoong zugu, la a Absalom gãanda a ba wã pʋg-rɩkdsã beenẽ, Israyɛll nebã fãa nifẽ.

²³ Wakat-kãnga, b rag n kelgda a Ayitofɛll saglsã fãa wa yaa Wẽnnaam meng n gomde. A Davɩɩd ne a Absalom dag n geelgda a Ayitofɛll saglsã wa goam sẽn yit Wẽnnaam nengẽ.