2 Sãmwɛlle 13 - WẼNNAAM SEBRE 2014

A Amno maana wɩɩbd ne a Tamaare

¹ Ad bũmb nins sẽn maan bõn-kãens zugẽ. A Davɩɩd dag n tara biig t'a yʋʋr boond t'a Absalom, yẽnda rag n tar yao-bi-pugl t'a yʋʋr boondẽ t'a Tamaare. La a Tamaar dag n yaa pʋg-neer wʋsgo. A Davɩɩd dag tara a biig a to yʋʋr sẽn boond t'a Amno. A Amno yamã kẽ a Tamaare.

² A Amno rag n namsda wʋsgo, a sẽn dat a Tamaarã yĩnga. La yẽnda rag n ka mi a sẽn na n maan to-to n kolg a Tamaar ye. Bala, a Tamaar dag n nan ka mi rao ye.

³ A Amno rag n tara a zoa t'a yʋʋr boondẽ t'a Yonadaabe. A Yonadaab rag n yaa a Davɩɩd kẽem a Simeya biiga, la a rag n tara sɩlem wʋsgo.

⁴ Dẽ, a Yonadaab soka a Amno yaa: «Yaa a wãn tɩ fo kẽnd daar fãa wa nimbãan-neda, n yaool n yaa na-biiga? Togs maam yell ning sẽn tar foom.» A Amno togsa a Yonadaab tɩ yaa a ba-biig a Absalom yao-bi-pugl a Tamaar la yẽnda rata.

⁵ A Yonadaab yeel-a lame: «Beneere, gãand n maan wa f ka keem ye. La f baaba sã n wa n na n ges-fo, bɩ f yeel-a woto: ‹M kotame tɩ y kõ m tão a Tamaar sor t'a wa segl rɩɩb m nifẽ, la a rɩk rɩɩbã ne a meng nug n kõ-m tɩ m dɩ.› »

⁶ La a Amno sɩd gãanda wa a ka keem ye. La rĩmã sẽn wa n na n ges-a, a yeelame yaa: «M kotame tɩ y kõ m tão a Tamaar sor t'a wa segl rɩɩb m nifẽ, la a rɩk rɩɩbã ne a meng nug n kõ-m tɩ m dɩ.»

⁷ Dẽ, a Davɩɩd tʋma ned t'a tɩ yeel a Tamaar yaa: «M kos tɩ f kẽng f kẽem a Amno nengẽ n tɩ segl dɩɩb n kõ-a.»

⁸ La a Tamaar kẽngame n tɩ mik t'a kẽem a Amno gãe a gãagẽ. A yãka zom n nag n maan dɩɩb a Amno nifẽ n kõ-a.

⁹ La a Tamaar dɩka rɩɩbã ne laagã n na n kõ a Amno, la a zãgsa rɩɩbo, n kɩt tɩ b yeel nebã fãa tɩ b yi. La nebã fãa yiime n bas-a.

¹⁰ La a Amno yeela a Tamaar t'a tall rɩɩbã n wa kõ yẽnda a ro-gãagẽ wã, la a yãk ne a meng nug n kõ-a t'a rɩ. A Tamaar dɩka dɩɩbã n tall n kẽ a ba-biig a Amno ro-gãagẽ wã.

¹¹ La a Tamaar sẽn kolg n na kõ a Amno rɩɩbã, a Amno gãd-a lame n yeel-a: «Tamaare, wa gãand ne maam.»

¹² Dẽ, a Tamaar yeel-a lame yaa: «Ayo! M soaala, da maan-y-m pãng ye. Bala, bõn-kãngã yaa kisg Israyɛll pʋgẽ. Da maan wɩɩbd a woto ye.

¹³ Mam na n deega yãnd a woto n kẽ yɛɛnẽ? La fo mengã na n lebga nin-yaalg Israyɛll pʋgẽ. Maan sugr la f tɩ gom ne rĩmã, tɩ tõe tɩ daar ning bɩ b sak n dɩk maam n kõ foom.»

¹⁴ La a Amno ka kelg-a ye. Dẽ, yẽnda pãngã sẽn yɩɩd a Tamaarã yĩnga, a yõg-a lame.

¹⁵ La bõn-kãng zugẽ, a Amno kisg-a a Tamaar wʋsgo. A kisgrã talla pãng wʋsg n yɩɩd a sẽn dag n nong-a wã. A Amno yeela a Tamaar yaa: «Yik n yi!»

¹⁶ La a Tamaar yeel-a lame: «Ayo! M soaala, fo sã n dig maam woto, yellã na n yɩɩ wẽng n yɩɩg fo sẽn zoe n maan maamã.» La a Amno kell n ka sak n kelg-a ye.

¹⁷ Dẽ, a Amno boola a tʋmtʋmdã n yeel-a yaa: «M kotame tɩ f yiis yõwã yɩng la f lebs kʋɩlengã n pag ne kʋɩlen-bila.»

¹⁸ La tʋmtʋmdã yiis-a lame, la a lebs kʋɩlengã n pag ne kʋɩlen-bila. A Tamaar dag n yera fu-gʋleng sẽn tar nus-wogdo. Yaa fu-bãmb buud la rĩm-dãmbã kom-pugli nins sẽn ka mi-b raoã dag n yer wakat-kãnga.

¹⁹ Dẽ, a Tamaar sẽn yi, a yuga a zugã tompeglem, la a pãrs fuugã, n kʋk a zug n wiisdẽ la a loogdẽ.

²⁰ A Tamaar ma-biig a Absalom sẽn yãnd a Tamaarã, a sok-a lame: «Fo kẽem a Amno yõga foom la? Da rɩk yellã n gom tɩ ned wʋm ye. Bala, a Amno yaa fo ba-biiga. Da rɩk yel-kãngã n ning f sũurẽ ye.» La sẽn sɩng ne badaare, a Tamaar kell n pa a ma-biig a Absalom yirã wa pag a sɩd sẽn digi.

²¹ La rĩm a Davɩɩd sẽn wʋm yellã, a sũurã puuga hal wʋsgo. La yẽnda yaool n ka tol n yeel a Amno tɩ bũmb ye. La a Amno sẽn dag n yaa yẽnda bi-kãsengã yĩnga, a rag n nong-a-la hal wʋsgo.

²² La a Absalom ka tol n yeel a Amno tɩ bũmb ye. La a yaool n kisga a Amno, a sẽn yõg yẽnda ma-biig a Tamaarã yĩnga.

A Absalom doka a Tamaar sũuri

²³ Daar a yembre, yellã maan n loog tɩ yʋʋm yiiblẽ, a Absalom boola a pe-wõrsdbã a yirã Baal-Hatsoor sẽn be Efrayiim noorã. La a Absalom boola rĩmã kom-dibli fãa tɩ b wa.

²⁴ A Absalom kẽnga rĩmã nengẽ n tɩ yeel-a yaa: «N-na! Pe-wõrsdb n wa mam yirã, n na n wõrs mam piisã. Yaa rẽ yĩng la m wa n na n kos rĩmã ne b nanambsã, tɩ b wa naag-d n maan tigrã.»

²⁵ Rĩmã leoka a Absalom yaa: «Ayo! M biig sõngo, maan sugr tɩ tõnd fãa ka tõe n naag taab n wa fo yirã ye. Bala, na n yɩɩ zɩɩb ne foom.» A Absalom pẽdga rĩmã, la rĩmã ka sak n na n kẽng ye. La rĩmã ning-a-la barka.

²⁶ A Absalom yeela rĩmã yaa: «Sẽn yaa woto tɩ yãmb meng ka na n tõog n wa wã, m kotame tɩ y kõ m kẽem a Amno noor t'a wa naag-do.» La rĩmã soka yẽnda yaa: «Bõe yĩng t'a Amno na n wa fo yiri?»

²⁷ La a Absalom rag n ket n pẽdgda rĩmã, la rĩmã wa n baas n sakame t'a Amno ne rĩmã kom-dibli a taabã fãa tũ a Absalom n kẽnge.

²⁸ La a Absalom yeela a tʋmtʋmdbã yaa: «Ade, m kot-y lame tɩ y gũusd a Amno, t'a sã n wa yũ rãamã n tɩg t'a sũurã noomẽ, tɩ mam yeel-y tɩ y kʋ-a, bɩ y kʋ-a n da yɛɛs ye. Bala, yaa mam mengã n kõ-y noor tɩ y kʋ-a. Dẽ yĩngã, bɩ y kẽng n wilg y raoodo.»

²⁹ Dẽ, a Absalom tʋmtʋmdbã maana wa a Absalom sẽn yeel bãmbã. Bãmb kʋ a Amno, la tao-tao bala, rĩmã kom-dibli a taabã yik n basa rɩɩbã n zomb b bõens n zoe.

³⁰ La bãmb sẽn wa n ket n be sorẽ, ned n tɩ togs rĩmã t'a Absalom kʋʋ bãmb kom-dibli wã zãnga, n ka bas ba a yembr tɩ põs ye.

³¹ La rĩmã sũur sãamame t'a pãrs a futã n gãand tẽnga, la a nanambsã fãa me pãrsa b fut n dag n yas a sɛɛgẽ.

³² A Davɩɩd kẽemã a Simeya biig a Yonadaab yeela a Davɩɩd yaa: «N-na! Ra tags-y tɩ b kʋʋ yãmb kambã fãa ye. Ad-y yaa a Amno a yembr bal n ki. Bala, hal sẽn sɩng ne daar ning a Amno sẽn yõg a Absalom tão a Tamaarã, a Absalom dag n yãka yam n dat n kʋ-a.

³³ Dẽ yĩngã, da wa tags-y tɩ b kʋʋ yãmb kambã fãa ye. Ayo! Yaa a Amno a ye bal la b kʋ yã.»

³⁴ La a Absalom bas n zoeeme. Wakat-kãng bala, tẽn-gũudã zẽka a nengã n yãnd neb wʋsg sẽn be Horonayim sorã zug n yit tãngã sigdgẽ n watẽ. La yẽnda tɩ yeela rĩmã yaa: «Mam yãnda neb wʋsg sẽn be Horonayim sorã zug n yit tãngã sigdgẽ n watẽ.»

³⁵ La a Yonadaab yeela rĩmã yaa: «Ad-y yaa yãmb kambã n wate. Kell n yaa mam sẽn dag n togs yãmbã bala.»

³⁶ A Yonadaab sẽn nan gom n sɛ bal yee, la rĩmã kamb sẽn be taabẽ. La bãmb ninga nintãm. Dẽ, rĩmã ne a nanambsã me yãba wʋsgo.

^37-38 A Absalom sẽn zoe wã, a kẽnga Gesʋʋr rĩm a Amihuud biig a Talmayi nengẽ. Yẽnda zĩnda be yʋʋm a tãabo. Dẽ, yʋʋm-kãens fãa pʋga, a Davɩɩd yãba a biig a Amno sẽn ki wã yĩnga.

³⁹ Dẽ, rĩm a Davɩɩd basa a Absalom pʋgbo, bala, yẽnda paama belsg a biig a Amno kũumã yĩnga.