2 Sãmwɛlle 11 - WẼNNAAM SEBRE 2014

A Davɩɩd maana yoob ne a Batseba

¹ Yʋʋm-vẽkrã sẽn zems wakat ning rĩm-dãmbã sẽn yit n kẽnd zabã, a Davɩɩd tʋma a Zoaab ne a tãb-biisã nanambs a taabã, ne Israyɛll tãb-biisã tɩ b tɩ sãam Amo nebã, la b tɩ zab ne Raba sẽn yaa b na-tẽngã. La a Davɩɩd meng paa Zeruzalɛm.

² Daar a yembr zaabre, a Davɩɩd yika a gãagẽ n be a roogã bɛoong zug n kẽnd n gilgdẽ, la a zĩnda be n yãnd pag sẽn sood koom. Pagã rag n yaa pʋg-neer hal wʋsgo.

³ A Davɩɩd tʋma ned tɩ b tɩ sok n ges sẽn yaa ned ningã paga. La b wa n togsa a Davɩɩd tɩ yaa a Eliyam biiga. La a yʋʋr la a Batseba, n yaa Hɛt rao a Uuri paga.

⁴ A Davɩɩd tʋmame tɩ b tɩ peeg-a n wa, la a Davɩɩd kẽe ne-a. Wakat-kãng tɩ yaa pagã sẽn nan yɩlga a meng bal a pekr zugẽ. La pagã kuilame.

⁵ La pagã rɩka pʋga, la a tʋmame tɩ b tɩ wilg a Davɩɩd tɩ yẽnda tʋtame.

⁶ La zĩig pʋgẽ bala, a Davɩɩd tʋmame tɩ b tɩ yeel a Zoaab t'a kɩt tɩ Hɛt rao a Uuri wa yiri. La a Zoaab kɩtame tɩ Hɛt rao a Uuri lebg n kẽng a Davɩɩd nengẽ.

⁷ La a Uuri sẽn ta rĩm a Davɩɩd nengẽ, rĩmã soka yẽnda a Zoaab ne a nebã yelle, la zabrã kɩbar sẽn yaa to-to.

⁸ La a Davɩɩd yeela a Uuri t'a kuil n tɩ vʋʋse. A Uuri sẽn yi rĩm a Davɩɩd nengẽ, rĩmã kɩsa kũun tɩ b tɩ kõ-a.

⁹ La a Uuri ka kuil ye, a kẽnga na-yirã samandẽ, n na n tɩ naag rĩmã na-yirã gũudb n gãande.

¹⁰ La rĩm a Davɩɩd sẽn wʋm dẽ, a yeela a Uuri yaa: «Yaa bõe tɩ fo yi so-wok n wa, n ka kuiis f yiri?»

¹¹ A Uuri yeela a Davɩɩd yaa: «N-na! Mam na n yɩ a wãn n kuil n tɩ rɩ la m yũ, la m gãand ne m paga, tɩ kaoolã koglgã ne Israyɛll nebã la Zʋʋde nebã yaool n be fu-rotẽ, tɩ mam zu-soab a Zoaab ne a nebã tilg b tãb-sik n be weoogẽ wã? Mam wẽenda ne yãmb tɩ mam kõn tol n maan bũmb a woto abada.»

¹² Woto, rĩm a Davɩɩd yeela a Uuri yaa: «Beneere, kell n pa n gãand ka tɩ beoogo, m na yaool n kõ-f sor tɩ f lebe.» Dẽ, a Uuri kell n paa Zeruzalɛm badaare, n ta vẽkembeoogo.

¹³ La a Davɩɩd boola a Uuri t'a wa naag-a n dɩ. Dẽ, a Davɩɩd kɩtame tɩ b kõ a Uuri rãam t'a yũ wʋsg t'a neng yilimdẽ. La ne rẽ fãa, a Uuri ka kuil ye, a yi n dɩgla a pĩir n yegl rĩmã na-yir gũudbã n gãand badaar yʋngo.

¹⁴ La vẽkembeoog yibeoogo, a Davɩɩd gʋlsa sebr n kɩs a Uuri t'a tɩ kõ a Zoaabe.

¹⁵ La sebrã pʋgẽ, rĩmã yeelame: «Zoaabe, lʋɩɩs-y-yã a Uuri taoore, zabrã sẽn wɩng wʋsg zĩig ningã, la y targ n leb poorẽ n bas-a tɩ bɛɛbã kʋ-a.»

A Batseba sɩd a Uuri kũum

¹⁶ A Zoaab gesa tẽngã n bao zĩig ning bɛɛbã sẽn tar pãng n yɩɩdã, n ning a Uuri beenẽ.

¹⁷ La tẽngã neb yiime n zab ne Israyɛll nebã, n kʋ a Davɩɩd neb kẽere, la Hɛt rao a Uuri me naaga be.

¹⁸ A Zoaab tʋma ned t'a tɩ wilg a Davɩɩd bũmb nins fãa sẽn maan zabrã pʋgẽ.

¹⁹ La a Zoaab yeela nin-kãng yaa: «Fo sã n ta n togs rĩmã bũmb nins sẽn maan zabrã pʋgẽ wã n sɛ,

²⁰ tõeeme tɩ b sũurã yik tɩ b sok tɩ yaa a wãn tɩ yãmb kolg tẽngã a woto n na n zabe? Yãmb ka mi tɩ bɛɛbã tõe n zĩnda lalgã zug n tão yãmb la?

²¹ Yɩɩ ãnd n kʋ a Zerubesɛt biig a Abimelɛk Tebɛɛz tẽngã? Ka pag n zĩnd lalg zug n lobg-a ne ne-biig t'a ki la? La yɩ a wãn tɩ yãmb tɩ kolgd lalgã? Dẽ, rĩmã sã n gom woto, bɩ f togs-b tɩ bãmb tʋmtʋmd a Uuri sẽn yaa Hɛt neda me kiime.»

²² B sẽn tʋm-a soabã kẽngame n tɩ togs rĩm a Davɩɩd bũmb nins fãa a Zoaab sẽn yeelã.

²³ La yẽnda yeela a Davɩɩd yaa: «Tẽngã gũudb pãng rag n yɩɩda tõndo. Bãmb yii tẽngã pʋgẽ n wa n na n zab ne tõnd weoogẽ wã, la baoosg zãnga, tõnd dig-b lame n tɩ ta tẽngã noore.

²⁴ Dẽ, b tãb-tãoodbã zĩnda lalgã zug n tão tõndo, n kʋ yãmb neb kẽere, la y tʋmtʋmd a Uuri me naaga be.»

²⁵ A Davɩɩd yeela b sẽn tʋm-a soabã yaa: «Kẽng n tɩ yeel a Zoaab t'a ra sãam a sũur yel-kãng yĩng ye. Bala, zabr ka tõe n maane, tɩ yãmb neb wall y bɛɛbã neb ka ki ye. Yẽnda we n keng a sũur n nang pãng n zab n tõog tẽngã, n sãam-a.»

²⁶ A Uuri pag a Batseba sẽn wʋm t'a sɩdã kiime, a yãba a kʋʋre.

²⁷ La a Betseba sẽn yãb a sɩdã kʋʋr n sɛ, a Davɩɩd tʋmame tɩ b tɩ peeg-a n wa. Woto, a Davɩɩd rɩk-a lame t'a lebg a paga. Rẽ zugẽ, a Betseba roga a Davɩɩd bi-ribla. A Davɩɩd sẽn maan bũmb ningã sãama Wẽnnaam sũuri.