2 Sãmwɛlle 10 - WẼNNAAM SEBRE 2014

A Davɩɩd tõoga Amo ne Siiri nebã

¹ Dẽ poore, Amo nebã rĩmã kiime, t'a biig a Hanun led a zĩigẽ n lebg rĩmã.

² A Davɩɩd yeelame: «Mam na n maana a Nakaas biig a Hanun neere, bala, yẽnda ba wã maana maam neere.» Dẽ, a Davɩɩd tʋma a zakã neb tɩ b kẽng a Hanun nengẽ n tɩ pʋʋs-a, a ba wã sẽn maan kaalmã yĩnga. La a Davɩɩd nebã sẽn ta Amo nebã tẽngẽ,

³ Amo nebã na-biisã yeela b soaal a Hanun yaa: «Yãmb tẽedame tɩ yaa yãmb ba wã waoogr yĩng la a Davɩɩd sẽn tʋm nin-bãmbã tɩ b wa pʋʋs yãmbã bɩ? Yãmb ka tagsd t'a sẽn tʋm a nebã yãmb nengẽ wã yaa sẽn na n yɩl n ges tẽngã n bãng a yell sõama, n wa tõog n sãam-a sɩda?»

⁴ Dẽ, a Hanun kɩtame tɩ b yõg a Davɩɩd nebã n põng b toeemsã n bas begse, la b wõrs b futã n b bas b seesã yɩnga, n yaool n yeel-b tɩ b looge.

⁵ B rɩka yellã n taas a Davɩɩde, la yẽnda tʋma ned t'a kẽng n tɩ seg-ba, bala, nin-bãmbã sɩd dag n bee yãn-kẽeng pʋga. Rĩmã tʋmame tɩ b tɩ yeel-b yaa: «Pa-y Zeeriko hal tɩ y toeemsã yi, tɩ y yaool n wa.»

⁶ Amo nebã sẽn mik tɩ bãmb sẽn maanã yika a Davɩɩd sũurã, b kẽng n tɩ rɩka Siiri ne Bɛt-Rehoob la Soba tãb-biis tus-pisi. B leb n yãka Maaka neb tusri, ne Toob tãb-biis tus-piig la a yiibu.

⁷ A Davɩɩd sẽn wʋm woto, a tʋma a Zoaab ne tãb-bi-gãndaadã fãa beenẽ.

⁸ Amo nebã sũu tãp n yi n yals b tẽngã noore. Siiri neb nins sẽn yit Soba ne Bɛt-Rehoobã, la Toob ne Maaka nebã rag n bee zĩig a to weoogã pʋga.

⁹ A Zoaab sẽn yã tɩ zabrã na n yɩɩ nems a yiibu, poorẽ la taoore, a tũusa Israyɛll tãb-biis nins sẽn ya-b sõama n yɩɩdã, tɩ b tɩ zab ne Siiri rãmba.

¹⁰ La a Zoaab kɩtame t'a yao a Abisayi lʋɩ tãb-biis nins sẽn kellã taoore, tɩ b na n zab ne Amo-rãmbã.

¹¹ A Zoaab yeela a yao a Abisayi yaa: «Sã n wa n mik tɩ Siiri nebã rat n tõoga maam, bɩ f wa sõng-ma. La mam sã n wa neẽ tɩ Amo nebã rat n tõoga foom, mam na n wa sõng-f lame.

¹² Keng f meng tɩ d yɩ gãndaad n zab d nebã yĩnga, ne tõnd Wẽnnaamã tẽms yĩnga, la bɩ Sẽn-Ka-Saab maan b raabo.»

¹³ La a Zoaab ne a nebã kolgame n na n zab ne Siiri nebã, la Siiri nebã zoee bãmb taoore.

¹⁴ La Amo-rãmbã sẽn yã tɩ Siiri nebã zoeeme wã, bãmb me zoe a Abisayi ne a tãb-biisã taoor n kẽ tẽngã pʋgẽ. Dẽ, a Zoaab yalsa zabrã, n lebg n bas Amo-rãmbã, la a kuil Zeruzalɛm.

¹⁵ Siiri nebã sẽn yã tɩ Israyɛll nebã tõog-b lame wã, b leb n tigma b tãb-biisã fãa.

¹⁶ A Hadadezɛɛr tʋma neb tɩ b tɩ tigim Siiri neb nins sẽn be Efrat kʋɩlga rʋʋndã. La a Sobak sẽn yaa a Hadadezɛɛr tãb-biisã naabã n lʋɩ bãmb taoor n tall-b n kẽng Elam.

¹⁷ Dẽ, a Davɩɩd sẽn wʋm woto, a tigma Israyɛll nebã fãa n dʋʋg kʋɩlgã n kẽng Elam. Dẽ, Siiri nebã sũu tãp n zab ne a Davɩɩde.

¹⁸ La Israyɛll nebã riga bãmb tɩ b zoe. A Davɩɩd ne a nebã kʋʋ neb kobs-yopoe sẽn tar saar-dãmbã, ne wed-rʋʋdb tus-pis-naase. La b pogla bãmb tãb-biisã naab a Sobak t'a kell n ki zĩ-kãngã.

¹⁹ A Hadadezɛɛr sẽn so nanambs nins fãa wã sẽn yã tɩ Israyɛll nebã tõoga bãmba, b baoome tɩ zood zĩnd bãmb ne Israyɛll nebã sʋka, la Israyɛll nebã sooga bãmba. Siiri nebã ka tol n saag n na n leb n sõng Amo nebã ye.