2 Rĩm-dãmba 5 - WẼNNAAM SEBRE 2014

A Naama wãood maagre

¹ Siiri rĩmã rag n tara a tãb-biis naab t'a yʋʋr boondẽ t'a Naama. Rao-kãng rag n yaa nin-kãsenga, la a soaalã rag n nong-a-la hal wʋsgo. Bala, yɩɩ yẽnda n kɩt tɩ Siiri nebã paam tõogre. La a Naama bẽeda wãoodo.

² Siiri nebã kẽng n tɩ zaba ne Israyɛll nebã wakat a yembre, la b yõka Israyɛll bi-pugl-bilf a yembr n tall n kuil Siiri. La bi-puglã rag n lebga a Naama pagã tʋmtʋmd-poaka.

³ Daar a yembre, bi-puglã yeela a zu-soben-poakã yaa: «M soaalã sã n dag n kẽngẽ Wẽnnaam no-rɛɛs ningã sẽn be Samaari wã nengẽ, b rag n na n maagẽ-la b yĩn-gãong bãagã.»

⁴ La a Naama kẽngame n tɩ togs a soaalã bũmb ning Israyɛll bi-puglã sẽn yeelã.

⁵ Dẽ, Siiri rĩmã yeela a Naama yaa: «Beneere, bɩ f kẽnge! La mam na n gʋlsa sebr n kɩs-f tɩ f tall n tɩ kõ Israyɛll dĩmã.» Woto, a Naama yiime n dɩk sore, la a zãa wanzuri kɩlo kobs-tã, ne sãnem kɩlo pis-yoobe, n paas fu-neeb piiga.

⁶ A Naama sẽn ta Israyɛll dĩmã nengẽ, a kɩs-a-la Siiri rĩmã sebrã. Sebrã yeta woto: «Maam n tʋmd m tʋmtʋmd a Naama yãmb nengẽ ne seb-kãngã, tɩ yãmb tõe n maag a yĩn-gãong bãagã.»

⁷ La Israyɛll dĩmã sẽn karem sebrã n sɛ, a pãrsa a futu, n yeele: «Mam yaa Wẽnnaam n tõe n kʋ wall m vʋʋg ned la? Bõe yĩng tɩ Siiri rĩmã na n tʋm ned t'a wa mam nengẽ tɩ m maag a wãoodo? Yãmb mens neeme tɩ yaa mam noor la a baooda.»

⁸ Wẽnnaam dao a Eliize sẽn wʋm tɩ Israyɛll dĩmã pãrsa a futã, yẽnda tʋmame tɩ b tɩ yeel rĩmã yaa: «Bõe yĩng tɩ yãmb pãrsd y futu? M kotame tɩ y tʋm daoã t'a wa mam nengẽ, t'a na bãng tɩ Wẽnnaam no-rɛɛs bee Israyɛlle.»

⁹ A Naama kẽng n tɩ yalsa a Eliize zakã noor ne a wiidã la a saarã.

¹⁰ A Eliize tʋma ned t'a yi n yeel a Naama yaa: «Kẽng Zʋrdẽ kʋɩlgã pʋg n tɩ lis naoor a yopoe, la f yĩn-gãong bãagã na n sɛɛme tɩ f lebg yɩlemde.»

¹¹ La a Naama sũurã puugame t'a lebg n loogdẽ la a yetẽ: «Ade, mam dag n tẽedame tɩ yẽnda mengã n dag n na n yi n seg maam n tik bãagã zĩigẽ, n pʋʋs ne Sẽn-Ka-Saab sẽn yaa yẽnda Wẽnnaamã yʋʋre, tɩ mam yĩn-gãong bãagã sɛ.

¹² Rẽ yĩnga, Damaas ne Abana la Parpaar ka tar kʋɩls sẽn são Israyɛll kʋɩlsã zãng la? Mam dag n ka tõe n lisẽ kʋɩl-bãmb pʋs n paam m yĩn-gãong bãagã maagr sɩda?» Dẽ, a Naama lebg n looga ne sũ-yikri.

¹³ A Naama tʋmtʋmdbã kolga yẽnda n gom ne-a n yeele: «M soaala, Wẽnnaam daoã sã n dag n yeelẽ yãmb tɩ y maan bũmb sẽn yaa toog n yɩɩd woto, yãmb dag n kõn maanẽ sɩda? La a yaool n ka yeel yãmb tɩ y maan bũmb a to, n zʋʋg a sẽn yeel-y bal tɩ y kẽng n tɩ lis koomẽ wã, tɩ y na n lebga yɩlemdã ye!»

¹⁴ Dẽ, a Naama sigame n kẽ Zʋrdẽ koomã pʋg n lis naoor a yopoe wa Wẽnnaam dao a Eliize sẽn dag n yeel yẽnda wã. La a yĩn-gãong bãagã sɛɛme, t'a lebg yɩlemde. A yĩngã rag n lebga wa bi-bilf yĩnga.

¹⁵ A Naama ne a nebã fãa tũu taab n lebg n leb Wẽnnaam daoã nengẽ. La bãmb sẽn ta, a Naama yalsa Wẽnnaam dao a Eliize taoor n yeel-a yaa: «Moasã, mam bãngame tɩ dũniyã gill fãa pʋga, Wẽnnaam ka be zĩig a to tɩ sã n ka Israyɛll ye. Dẽ, mam kotame tɩ y sak n deeg kũun ning mam sẽn na n kõ yãmbã!»

¹⁶ A Eliize leoka yẽnda n yeele: «Mam wẽenda ne Sẽn-Ka-Saab sẽn vɩ wã, mam sẽn yaa-a soab tʋmtʋmdã, tɩ mam kõn deeg bũmb ye!» La a Naama pẽdga a Eliize n dat t'a sak n deeg kũunã, la a Eliize zãgsame t'a ka na n deeg ye.

¹⁷ Dẽ, a Naama yeelame: «Sã n yaa tɩ yãmb zãgsame tɩ y ka na n deeg kũunã, mam kot-y lame tɩ y kõ noore, tɩ b wʋk y tẽngã tẽn-gãongã tom sẽn zems bõn-wees a yiib zɩlgre, n kõ y tʋmtʋmdã. Bala, yãmb tʋmtʋmdã ka na n leb n maan maoong sẽn yõogd bugum wall maoong a to n kõ wẽnd a to, sã n ka Sẽn-Ka-Saab bala.

¹⁸ Mam sẽn kote, yaa tɩ Sẽn-Ka-Saab maan maam sugri, bala, mam soaalã sã n mi n kẽng wẽn-naandg a Rimo roogẽ wã n na n tɩ pʋʋse, bãmb tikda maam la mam me naagda bãmb n wõgemd n waoog a Rimo. Dẽ yĩngã, mam sã n wa n wõgemd wẽn-naandg a Rimo roogẽ wã, bɩ Sẽn-Ka-Saab kõ-m sugri.»

¹⁹ A Eliize yeela a Naama yaa: «Kẽng ne laafɩ.» La a Naama loogame. La a Naama sẽn loog n zãag bilfu,

Yĩn-gãong bãag yõka a Geyaazi

²⁰ Wẽnnaam dao a Eliize rakõor a Geyaazi yeela a sũurẽ yaa: «Gese, mam soaalã basa Siiri rao a Naama t'a loog n ka sak n deeg kũun ning a sẽn wa ne wã ye. La mam wẽenda ne Sẽn-Ka-Saab sẽn vɩ wã, tɩ mam na n wudg n babs-a lame n tɩ reeg bũmbu!»

²¹ Dẽ, a Geyaazi zoeeme n na n babs a Naama. La a Naama sẽn yã yẽnda sẽn zoet n watẽ wã, a siga tao-tao n bas a saarã n na n seg a Geyaazi n sok-a n ges yaa noogo.

²² A Geyaazi leokame: «Yaa noogo! Mam soaalã n tʋm maam tɩ m wa yeel-y tɩ kom-bɩɩs a yiib n yi no-rɛɛsdbã karen-biis nins sẽn be Efrayiim soolem ning sẽn be tãmsã sʋkã sʋka, n wa n sig bãmba. La m soaalã kotame tɩ y kõ-b wanzuri kɩlo pis-tã, ne fu-neeb a yiibu.»

²³ La a Naama yeel-a lame yaa: «Sã n yaa woto bɩ f reeg wanzuri kɩlo pis-yoobe.» Dẽ, a Naama pẽdg-a lame n ning wanzuri kɩlo pis-yoob yond a yiib pʋg n sẽbg n kõ-a, la a kõ-a fu-neeb a yiibã, n kɩt tɩ yẽnda tʋmtʋmdb a yiib tʋk-b n lʋɩ a Geyaazi taoore.

²⁴ Bãmb sẽn wa n ta zĩig ning b sẽn boond tɩ Ofɛllã, a Geyaazi reega kũunã n bĩng a roogẽ, la a yeel a Naama tʋmtʋmdbã tɩ b looge, la b lebg n loogame.

²⁵ Dẽ poore, a Geyaazi mengã lebg n wa a soaal a Eliize nengẽ, la a Eliize sok-a lame yaa: «Fo rag n kẽnga yɛɛnẽ?» La a Geyaazi leokame tɩ yẽnda rag n ka kẽng ni ye.

²⁶ Woto, a Eliize yeela a Geyaazi yaa: «Fo tẽedame tɩ raoã sẽn wa n sig a saarã zug n segd foomã, mam ka yã la? Rẽ yĩnga, yaa wakat fo sẽn tog n deeg fu-neeba, la wanzuri sẽn na n yɩl n da oliiv tɩɩse, ne vĩy pʋto, la rũm-bɛd ne rũm-bãoonego, la f paam yem-daad ne yem-pogs sɩda?

²⁷ Fo sẽn maan a woto wã yĩnga, a Naama yĩn-gãong bãagã na n yõka foom ne f yagensã wakat sẽn kõn sa.» Dẽ, a Geyaazi ne a na n yi a Eliize nengẽ wã tɩ yĩn-gãong bãagã yõk-a lame t'a yĩngã lebg pɛɛlg wa lam-palga.